Read Nepali New Revised Version, 2012 लूका 18 Bible Online

लूका 18 - Nepali New Revised Version, 2012 bible

लूका 18

¹तिनीहरू सधैँ प्रार्थना गरिरहून्‌ र निराश नहोऊन्‌ भन्‍ने हेतुले उहाँले तिनीहरूलाई एउटा दृष्‍टान्‍त भन्‍नुभयो:

²“कुनै एउटा सहरमा परमेश्‍वरको भय नमान्‍ने र मानिसको वास्‍ता नगर्ने एक जना न्‍यायाधीश थिए।

³त्‍यसै सहरमा एउटी विधवा थिई। त्‍यो तिनीकहाँ आइरहन्‍थी, र भन्‍थी, ‘मेरो वादीको अगि मेरो न्‍याय गरिदिनुहोस्‌।’

⁴ “तिनले केही समयसम्‍म त मानेनन्, तर पछिबाट तिनले आफ्‍नो मनमा भने, ‘म परमेश्‍वरको डर मान्‍दिनँ। मानिसको वास्‍ता पनि गर्दिनँ।

⁵तर यस विधवाले मलाई हैरान पारेकी हुनाले म त्‍यसको न्‍याय गरिदिनेछु, नत्रता तिनी एकोहोरो आएर मलाई वाक्‍क बनाउनेछे’।”

⁶प्रभुले भन्‍नुभयो, “सुन, ती अधर्मी न्‍यायाधीशले के भन्‍दछन्‌।

⁷के परमेश्‍वरले उहाँलाई रातदिन पुकार्ने आफ्‍ना चुनिएकाहरूको न्‍याय गरिदिनुहुन्‍न र? के उहाँले तिनीहरूका निम्‍ति बियाँलो गर्नुहुन्‍छ र?

⁸म तिमीहरूलाई भन्‍दछु, उहाँले चाँड़ै नै तिनीहरूको न्‍याय गरिदिनुहुनेछ। तापनि मानिसको पुत्र आउँदा के उसले पृथ्‍वीमा विश्‍वास भेट्टाउनेछ र?”

⁹आफैमाथि भरोसा राख्‍नेहरू र आफैलाई धर्मी ठानी अरूहरूलाई तुच्‍छ ठान्‍नेहरू कसै-कसैलाई उहाँले यो दृष्‍टान्‍त सुनाउनुभयो:

¹⁰“दुई जना मानिस प्रार्थना गर्न मन्‍दिरमा गए— एक जना फरिसी र अर्कोचाहिँ कर उठाउने।

¹¹फरिसीले उभिएर मनमनै यसरी प्रार्थना गर्‍यो, ‘हे परमेश्‍वर, म तपाईंलाई धन्‍यवाद दिन्‍छु, म अरू मानिसहरूजस्‍तो धुताहा, अन्‍यायी, व्‍यभिचारी, अथवा यही कर उठाउनेजस्‍तो पनि छैनँ।

¹²म हप्‍तामा दुई पल्‍ट उपवास बस्‍तछु। मैले पाएका सबै थोकको दशांश म दिन्‍छु।’

¹³ “तर कर उठाउनेचाहिँ टाढ़ै उभिएर स्‍वर्गतिर आँखा पनि नउठाई यसो भन्‍दै आफ्‍नो छाती पिट्यो, ‘हे परमेश्‍वर, म पापीमाथि दया गर्नुहोस्‌!’

¹⁴ “म तिमीहरूलाई भन्‍दछु, योचाहिँ मानिस त्‍यस अर्काभन्‍दा धर्मी ठहरिएर आफ्‍नो घरतिर लाग्‍यो। किनभने हरेक जसले आफूलाई उच्‍च पार्दछ, त्‍यो होच्‍याइनेछ, तर जसले आफूलाई होच्‍याउँछ, त्‍यो उच्‍च पारिनेछ।”

¹⁵येशूले छोइदेऊन्‌ भनी मानिसहरूले शिशुहरूलाई उहाँकहाँ ल्‍याए। तर चेलाहरूले यो देखेर तिनीहरूलाई हप्‍काए।

¹⁶येशूले तिनीहरूलाई आफूकहाँ बोलाएर भन्‍नुभयो, “बालकहरूलाई मकहाँ आउन देओ, तिनीहरूलाई नरोक। किनभने परमेश्‍वरको राज्‍य यस्‍तैहरूको हो।

¹⁷साँच्‍चै म तिमीहरूलाई भन्‍दछु, जसले एउटा बालकले जस्‍तै परमेश्‍वरको राज्‍यलाई ग्रहण गर्दैन, त्‍यो कुनै रीतिले त्‍यसभित्र प्रवेश गर्नेछैन।”

¹⁸कोही एक जना शासकले येशूलाई यसो भनेर सोधे, “हे असल गुरु, अनन्‍त जीवन पाउनलाई म के गरूँ?”

¹⁹येशूले तिनलाई भन्‍नुभयो, “तिमी मलाई किन असल भन्‍दछौ? एक परमेश्‍वरबाहेक कोही असल छैन।

²⁰तिमी आज्ञाहरू त जान्‍दछौ: ‘व्‍यभिचार नगर्नू, हत्‍या नगर्नू, नचोर्नू, झूटा गवाही नदिनू, आफ्‍ना बुबा र आमाको आदर गर्नू’।”

²¹तिनले भने, “यी सब त मैले मेरो युवावस्‍थादेखि नै पालन गरेको छु।”

²²यो सुनेपछि येशूले तिनलाई भन्‍नुभयो, “तिमीलाई अझ एक कुराको अभाव छ। तिमीसँग भएका जे जति छन्‌ ती सबै बेचेर गरीबहरूलाई बाँड़िदेऊ, र तिमीलाई स्‍वर्गमा धन हुनेछ, र आऊ, र मेरो पछि लाग।”

²³तर यी कुरा सुनेर ती शासक अति उदास भए, किनभने तिनी अत्‍यन्‍त धनी थिए।

²⁴अनि येशूले तिनलाई हेरेर भन्‍नुभयो, “धन-सम्‍पत्ति हुनेहरूलाई परमेश्‍वरको राज्‍यभित्र प्रवेश गर्नु अति गाह्रो छ,

²⁵किनभने धनी मानिसलाई परमेश्‍वरको राज्‍यमा प्रवेश गर्नुभन्‍दा त ऊँटलाई सियोको नाथ्रीबाट छिर्नु सजिलो हुन्‍छ।”

²⁶अनि सुन्‍नेहरूले भने, “तब कसको उद्धार हुन सक्‍छ त?”

²⁷उहाँले भन्‍नुभयो, “मानिसहरूका लागि जे असम्‍भव छ, त्‍यो परमेश्‍वरको लागि सम्‍भव छ।”

²⁸तब पत्रुसले भने, “हेर्नुहोस्, आफ्‍नो घरद्वार छोड़ेर हामी तपाईंको पछि लागेका छौं।”

²⁹तब उहाँले तिनीहरूलाई भन्‍नुभयो, “साँच्‍चै म तिमीहरूलाई भन्‍दछु, जसले घर वा पत्‍नी, वा दाजुभाइ वा आमा-बुबा, अथवा छोराछोरीलाई परमेश्‍वरका राज्‍यको निम्‍ति त्‍याग्‍छ,

³⁰त्‍यसले यसै समयमा धेरै बढ़ी प्रतिफल पाउनेछ र आउने युगमा अनन्‍त जीवन प्राप्‍त गर्नेछ।”

³¹येशूले बाह्रैलाई अलग्‍गै लगेर भन्‍नुभयो, “हेर, हामी यरूशलेमतिर जाँदैछौं, र मानिसको पुत्रको विषयमा अगमवक्ताहरूले लेखेका हरेक कुरा पूरा हुनेछ।

³²किनभने ऊ अन्‍यजातिहरूका हातमा सुम्‍पिइनेछ, र तिनीहरूले उसको गिल्‍ला गर्नेछन्, र ऊसँग दुर्व्‍यवहार गर्नेछन्, र उसलाई थुक्‍नेछन्‌।

³³तिनीहरूले उसलाई कोर्रा लाउनेछन्‌ र मार्नेछन्, अनि तेस्रो दिनमा ऊ फेरि मृत्‍युबाट जीवित भई उठ्‌नेछ।”

³⁴तर चेलाहरूले यी कुराहरू एउटै पनि बुझेनन्‌। तिनीहरूका निम्‍ति यो कुरा गुप्‍तमा राखियो, अनि भनिएको यो कुरा तिनीहरूको समझले भ्‍याएन।

³⁵उहाँ यरीहोको नजिक पुग्‍नुभयो। त्‍यहाँ एक जना अन्‍धो बाटोको छेउमा बसेर भीख मागिरहेको थियो।

³⁶एउटा भीड छेउबाट गइरहेको सुनेर ‘यो के हो?’ भनेर त्‍यसले सोध्‍यो।

³⁷मानिसहरूले त्‍यसलाई भने, “नासरतका येशू यतैबाट जाँदैहुनुहुन्‍छ।”

³⁸तब त्‍यो यसो भन्‍दै करायो, “हे येशू, दाऊदका पुत्र, ममाथि दया गर्नुहोस्‌!”

³⁹अगिअगि हिँड्‌नेहरूले त्‍यसलाई चूप लाग्‌ भनेर हप्‍काए, तर त्‍यो झन्‌ साह्रो करायो, “हे दाऊदका पुत्र, ममाथि दया गर्नुहोस्‌!”

⁴⁰येशू अड़िनुभयो, र त्‍यसलाई आफूकहाँ ल्‍याउने आज्ञा गर्नुभयो। त्‍यो नजिक आएपछि उहाँले त्‍यसलाई सोध्‍नुभयो,

⁴¹“तिमी के चाहन्‍छौ? म तिम्रो निम्‍ति के गरूँ?” त्‍यसले भन्‍यो, “प्रभु, म देख्‍न सकूँ”।

⁴²तब येशूले त्‍यसलाई भन्‍नुभयो, “तिमी देख्‍ने भइजाऊ। तिम्रो विश्‍वासले तिमीलाई निको पारेको छ।”

⁴³अनि तुरुन्‍तै त्‍यो देख्‍ने भयो, र परमेश्‍वरको प्रशंसा गर्दै त्‍यो उहाँको पछि लाग्‍यो। यो देखेर सबै मानिसहरूले परमेश्‍वरको प्रशंसा गरे।