Read Nepali New Revised Version, 2012 यूहन्‍ना 10 Bible Online

यूहन्‍ना 10 - Nepali New Revised Version, 2012 bible

यूहन्‍ना 10

¹ “साँच्‍चै, म तिमीहरूलाई भन्‍दछु, जो भेड़ा-गोठको ढोकाबाट भित्र पस्‍दैन, तर अर्कोपट्टिबाट चढ़ेर पस्‍छ, त्‍योचाहिँ चोर र डाँकू हो,

²तर ढोकाबाट भित्र पस्‍नेचाहिँ भेड़ाको गोठालो हो।

³ढोकेले उसको लागि ढोका खोलिदिन्‍छ, र भेड़ाहरूले उसको सोर सुन्‍छन्, र उसले आफ्‍ना भेड़ाहरूलाई नाउँ काढ़ी-काढ़ी बोलाउँछ, अनि तिनीहरूलाई बाहिर लैजान्‍छ।

⁴जब उसले आफ्‍ना सबै भेड़ाहरूलाई बाहिर निकालिसक्‍छ, ऊ तिनीहरूका अगिअगि हिँड्‌छ, र भेड़ाहरूले उसलाई पछ्याउँछन्, किनभने तिनीहरूले उसको सोर चिन्‍छन्‌।

⁵तर अपरिचित व्‍यक्तिलाई तिनीहरू पछ्याउँदैनन्, तर त्‍यसदेखि भाग्‍नेछन्‌। किनभने अपरिचित व्‍यक्तिको सोर तिनीहरूले चिन्‍दैनन्‌।”

⁶येशूले तिनीहरूलाई यो दृष्‍टान्‍त भन्‍नुभयो, तर उहाँले तिनीहरूलाई भन्‍नुभएको कुरा तिनीहरूले बुझेनन्‌।

⁷यसकारण येशूले फेरि तिनीहरूलाई भन्‍नुभयो, “साँच्‍चै, म तिमीहरूलाई भन्‍दछु, भेड़ाहरूको ढोका मै हुँ।

⁸मभन्‍दा अघि आउने सबै चोर र डाँकूहरू हुन्, तर भेड़ाहरूले तिनीहरूका कुरा सुनेनन्‌।

⁹ढोका म नै हुँ, यदि कोही मानिस मबाट भित्र पस्‍यो भने त्‍यो बचाइनेछ, र भित्र-बाहिर आउने-जाने गर्नेछ, र खर्कमा चर्न पाउनेछ।

¹⁰ “चोर त चोर्न, मार्न र नाश पार्न मात्र आउँछ। म त तिनीहरूले जीवन पाऊन्, र त्‍यो प्रशस्‍त मात्रामा पाऊन्‌ भन्‍ने हेतुले आएँ।

¹¹म असल गोठालो हुँ। असल गोठालाले आफ्‍ना भेड़ाहरूका निम्‍ति आफ्‍नो प्राण अर्पण गर्छ।

¹²भाडाको मान्‍छेचाहिँ भेड़ाहरूको आफ्‍नै गोठालोजस्‍तो होइन। त्‍यसले त ब्‍वाँसोलाई आएको देखेर भेड़ाहरूलाई छोडी त्‍यो भाग्‍छ, र ब्‍वाँसोले भेड़ाहरूलाई गाँजी लैजान्‍छ, र तितरबितर पारिदिन्‍छ।

¹³त्‍यो भाग्‍छ, किनभने त्‍यो भाडाको मान्‍छे हो, त्‍यसले भेड़ाको केही वास्‍ता गर्दैन।

¹⁴ “म असल गोठालो हुँ, म आफ्‍ना भेड़ाहरूलाई चिन्‍छु, अनि मेरा भेड़ाहरूले मलाई चिन्‍छन्‌।

¹⁵जसरी पिताले मलाई चिन्‍नुहुन्‍छ, म पितालाई चिन्‍छु, अनि म भेड़ाहरूका लागि आफ्‍नो प्राण अर्पण दिन्‍छु।

¹⁶ “मेरा अरू भेड़ा छन्, जो यस गोठका होइनन्‌। तिनीहरूलाई पनि मैले ल्‍याउनुपरेको छ, र तिनीहरूले मेरो सोर सुन्‍नेछन्, र तिनीहरू एउटै बगाल हुनेछन्, र एउटै गोठालो हुनेछ।

¹⁷पिताले मलाई यसैकारण प्रेम गर्नुहुन्‍छ, किनकि म आफ्‍नो प्राण फेरि फिर्ता लिने हेतुले अर्पण गर्छु।

¹⁸कसैले मबाट मेरो प्राण लिन सक्‍दैन, तर म आफ्‍नै इच्‍छाले आफ्‍नो प्राण अर्पण गर्दछु। आफ्‍नो प्राण अर्पण गर्ने अधिकार मसित छ, अनि फेरि लिने अधिकार पनि मसित छ। यो आज्ञा मैले मेरा पिताबाट पाएको छु।”

¹⁹यी वचनका कारणले यहूदीहरूमा फेरि मतभेद भयो।

²⁰तिनीहरूमध्‍ये धेरैले भन्‍दथिए, “यसलाई भूत लागेको छ, र यो बौलाएको छ। तिमीहरू यसको कुरा किन सुन्‍छौ?”

²¹अरूहरूले भन्‍दथिए, “भूत लागेको मानिसको कुरा यस्‍तो हुँदैन। के भूतले अन्‍धाका आँखा खोल्‍न सक्‍तछ र?”

²²यरूशलेममा मन्‍दिर समर्पणको चाड थियो।

²³यो हिउँदको समय थियो। येशू मन्‍दिरभित्र सोलोमनको दलानमा टहलिरहनुभएको थियो।

²⁴यहूदीहरूले उहाँका चारैपट्टि भेला भएर सोधे, “कहिलेसम्‍म तपाईं हामीलाई दोधारमा राख्‍नुहुन्‍छ? तपाईं ख्रीष्‍ट हुनुहुन्‍छ भने हामीलाई स्‍पष्‍ट भनिदिनुहोस्‌।”

²⁵येशूले तिनीहरूलाई जवाफ दिनुभयो, “मैले तिमीहरूलाई भनिसकेको छु, तर तिमीहरू विश्‍वास गर्दैनौ। मेरा पिताको नाउँमा जे काम म गर्दछु, तिनैले मेरो गवाही दिन्‍छन्‌।

²⁶तर तिमीहरू विश्‍वास गर्दैनौ, किनभने तिमीहरू मेरा भेड़ामध्‍येका होइनौ।

²⁷ “मेरा भेड़ाहरूले मेरो सोर सुन्‍छन्, र तिनीहरूलाई म चिन्‍छु, र तिनीहरू मेरो पछि आउँछन्‌।

²⁸तिनीहरूलाई म अनन्‍त जीवन दिन्‍छु, र तिनीहरू कहिल्‍यै नष्‍ट हुनेछैनन्, र कसैले तिनीहरूलाई मेरो हातबाट खोसी लैजानेछैन।

²⁹मेरा पिताले ती मलाई दिनुभएको छ; उहाँ सबैभन्‍दा महान्‌ हुनुहुन्‍छ। पिताको हातबाट कसैले तिनीहरूलाई खोसी लानेछैनन्‌।

³⁰पिता र म एक हौं।”

³¹यहूदीहरूले उहाँलाई हानौं भनी फेरि ढुङ्गा उठाए।

³²येशूले तिनीहरूलाई भन्‍नुभयो, “मैले तिमीहरूलाई मेरा पिताबाट धेरै असल काम देखाएँ, तीमध्‍ये कुन कामको निम्‍ति तिमीहरू मलाई ढुङ्गाले हान्‍न चाहन्‍छौ?”

³³यहूदीहरूले उहाँलाई जवाफ दिए, “असल कामको लागि हामी तिमीलाई ढुङ्गाले हान्‍दैनौं, तर ईश्‍वर-निन्‍दा गरेको कारणले, किनकि तिमी मानिस भएर पनि आफैलाई परमेश्‍वर तुल्‍याउँछौ।”

³⁴येशूले तिनीहरूलाई जवाफ दिनुभयो, “के तिमीहरूको व्‍यवस्‍थामा यसो लेखिएको छैन, ‘मैले भनें, तिमीहरू देवहरू हौ’?

³⁵यदि जसकहाँ परमेश्‍वरको वचन आयो, तिनीहरू देवहरू कहलाइन्‍छन्‌ भने (धर्मशास्‍त्र भङ्ग हुन सक्‍दैन),

³⁶पिताले पवित्र तुल्‍याएर संसारमा पठाउनुभएको व्‍यक्तिले ‘म परमेश्‍वरको पुत्र हुँ’ भन्‍दा कसरी ईश्‍वर-निन्‍दा हुन्‍छ?

³⁷यदि मैले मेरा पिताका काम गरेको छैनँ भने ममाथि विश्‍वास नगर।

³⁸तर यदि म पिताका काम गर्दछु र पनि तिमीहरू ममाथि विश्‍वास गर्दैनौ भने यी कामहरूमाथि विश्‍वास गर, र तिमीहरूले थाहा पाउन सक्‍नेछौ र बुझ्‍नेछौ, कि पिता ममा हुनुहुन्‍छ, र म पितामा छु।”

³⁹तिनीहरूले फेरि उहाँलाई पक्रन खोजे, तर उहाँ तिनीहरूका हातबाट उम्‍कनुभयो।

⁴⁰अनि उहाँ फेरि यर्दन पारि त्‍यस ठाउँमा जानुभयो, जहाँ यूहन्‍नाले पहिले बप्‍तिस्‍मा दिने गर्थे, र उहाँ त्‍यहीँ बस्‍नुभयो।

⁴¹धेरै मानिसहरू उहाँकहाँ आउन लागे, र तिनीहरूले भने, “यूहन्‍नाले कुनै चिन्‍हहरू गरेनन्, तर यूहन्‍नाले यिनको विषयमा जे-जति भनेका थिए त्‍यो सत्‍य रहेछ।”

⁴²अनि त्‍यहाँ धेरैले उहाँमाथि विश्‍वास गरे।