Read Nepali New Revised Version, 2012 प्रेरित 22 Bible Online

प्रेरित 22 - Nepali New Revised Version, 2012 bible

प्रेरित 22

¹“भाइ हो तथा बाबै हो, तपाईंहरूका सामु मैले आफ्‍नो पक्षमा भन्‍नुपर्ने कुरा अब सुन्‍नुहोस्‌।”

²तिनी हिब्रू भाषामा बोलेका सुनेर उनीहरू अझ चूप भए।

³तिनले भने, “म किलिकियाको सहर टार्ससमा जन्‍मेको एक यहूदी हुँ, तर यस सहरमा गमलिएलका चरणमा हुर्किएको हुँ। हाम्रा पुर्खाका विधिअनुसार मैले ठीक-ठीक शिक्षा पाएको हुँ। आज तपाईंहरू परमेश्‍वरतर्फ जति उत्‍साही हुनुहुन्‍छ, म पनि त्‍यतिकै उत्‍साही थिएँ।

⁴मैले यस मार्गका मानिसहरूलाई मृत्‍युसम्‍मै सताएँ, अनि पुरुष र स्‍त्री दुवैलाई बाँध्‍दै झ्‍यालखानमा हालिदिएँ।

⁵प्रधान पूजाहारी र जम्‍मै महासभाले पनि मेरो पक्षमा गवाही दिन्‍छन्‌। उहाँहरूकै तर्फबाट भाइहरूका नाउँमा पुर्जी पाएर म त्‍यहाँ भएका विश्‍वासीहरूलाई बाँधेर यरूशलेममा ल्‍याई सजाय दिलाउन दमस्‍कसमा गएको थिएँ।

⁶“मेरो यात्रामा दमस्‍कसनेर आइपुग्‍दा प्राय: मध्‍यान्‍ह भएको हुँदो हो, अचानक स्‍वर्गबाट एउटा ठूलो ज्‍योति मेरो वरिपरि चम्‍क्‍यो,

⁷र म जमिनमा लोटें, अनि मलाई यसो भनिरहेको एउटा आवाज सुनें, ‘ए शाऊल, ए शाऊल, तिमी किन मलाई सताउँदछौ?’

⁸अनि मैले सोधें, ‘हे प्रभु, तपाईं को हुनुहुन्‍छ?’ अनि उहाँले मलाई भन्‍नुभयो, ‘नासरतको येशू मै हुँ, जसलाई तिमी सताइरहेछौ।’

⁹तब मसँग जति जना थिए, तिनीहरूले ज्‍योति त देखे, तर मसँग बोल्‍नेको शब्‍द भने सुनेनन्‌।

¹⁰“मैले भने, ‘हे प्रभु, अब के गरूँ?’ अनि प्रभुले मलाई भन्‍नुभयो, ‘उठ, दमस्‍कसमा जाऊ, र तिमीले गर्नुपर्ने तोकेका कामहरू तिमीलाई बताइनेछन्‌।’

¹¹त्‍यस ज्‍योतिको तेजले गर्दा जब मैले केही देख्‍न सकिनँ, तब मसँग हुनेहरूले हातले समाती डोर्‍याएर मलाई दमस्‍कसमा ल्‍याए।

¹²“हननिया भन्‍ने एक जना व्‍यवस्‍थाअनुसार चल्‍ने भक्त मानिस जसले त्‍यहाँ बस्‍ने सबै यहूदीहरूबाट आदर पाएका थिए,

¹³तिनी मकहाँ आए, र मेरो छेउमा खड़ा भएर मलाई भने, ‘भाइ शाऊल, दृष्‍टि प्राप्‍त गर्नुहोस्‌।’ र मैले त्‍यही घड़ी दृष्‍टि प्राप्‍त गरें, र तिनलाई देखें।

¹⁴“अनि तिनले भने, ‘हाम्रा पिता-पुर्खाका परमेश्‍वरले उहाँको इच्‍छा तपाईंले जान्‍न, र ती धार्मिक पुरुषलाई देख्‍न, र उहाँको मुखबाट शब्‍द सुन्‍न तपाईंलाई नियुक्त गर्नुभएको छ।

¹⁵किनकि सबै मानिसहरूका सामु उहाँको निम्‍ति तपाईंले जे देख्‍नु र सुन्‍नुभएको छ, तपाईं त्‍यसको साक्षी हुनुहुनेछ।

¹⁶त अब किन पर्खनुहुन्‍छ? उठ्‌नुहोस्, र बप्‍तिस्‍मा लिनुहोस्, अनि उहाँको नाउँको पुकार गरेर आफ्‍ना पाप धुनुहोस्‌।’

¹⁷“यरूशलेममा फर्केर आएपछि मन्‍दिरमा प्रार्थना गरिरहँदा म ध्‍यान-मग्‍न भएँ।

¹⁸उहाँले मलाई यसो भनिरहनुभएको मैले देखें, ‘चाँड़ो गरेर यरूशलेमबाट निस्‍किहाल, किनकि मेरो विषयमा तिमीले दिएको गवाही तिनीहरूले ग्रहण गर्नेछैनन्‌।’

¹⁹“मैले भनें, ‘हे प्रभु, मैले हरेक सभाघरमा गएर तपाईंमाथि विश्‍वास गर्नेहरूलाई झ्‍यालखानमा हालेको र कुटपिट गरेको यिनीहरू सबैलाई थाहै छ।

²⁰तपाईंको साक्षी स्‍तिफनसको रक्तपात हुँदा म आफै पनि नजिकै उभी त्‍यस हत्‍यामा सहमत भई, उसलाई मार्नेहरूका वस्‍त्र कुरेर बसेका थिएँ।

²¹“तब प्रभुले मलाई भन्‍नुभयो, ‘जाऊ, किनकि म तिमीलाई अन्‍यजातिहरूकहाँ टाढ़ा-टाढ़ासम्‍म पठाउनेछु’।”

²²उनीहरूले पावलका कुरा यहाँसम्‍म मात्र सुने, र यसो भन्‍दै उनीहरू चर्को सोरले चिच्‍च्‍याउन थाले, “यस्‍तो मानिस पृथ्‍वीबाट हटाइओस्‌। किनकि त्‍यो बाँच्‍ने योग्‍यको छैन।”

²³उनीहरू आफ्‍ना वस्‍त्र च्‍यात्‍दै र धुलो उड़ाउँदै कराउन लागे।

²⁴सेनापतिले हुकुम गरे, “त्‍यो ब्‍यारेकभित्र ल्‍याइओस्, र कोर्रा लाएर जाँचिओस्, कि किन त्‍यसको विरुद्धमा तिनीहरू यसरी कराइरहेछन्‌।”

²⁵अनि जब तिनीहरूले पावललाई छालाका डोरीले बाँधे, तब पावलले नजिकै उभिएका कप्‍तानलाई सोधे, “के रोमी नागरिक र दोषी नठहरिएको मानिसलाई कोर्रा लगाउन न्‍यायसङ्गत हो?”

²⁶कप्‍तानले यो सुनेपछि सेनापतिकहाँ आई यसो भने, “तपाईंले के गर्न आँट्‌नुभएको छ? किनकि यो मानिस त रोमी नागरिक रहेछ।”

²⁷तब सेनापतिले आएर पावललाई सोधे, “मलाई भन्, के तँ रोमी नागरिक होस्‌?” तिनले भने, “हुँ।”

²⁸सेनापतिले जवाफ दिए, “मैले त यो नागरिक हक धेरै रुपियाँ तिरेर किनेको हुँ।” पावलले भने, “तर म त जन्‍मसिद्ध रोमी हुँ।”

²⁹तर तिनलाई जाँच गर्न तयार भएकाहरू सबै तुरुन्‍तै हटेर गए, र पावल एक रोमी नागरिक रहेछन्‌ भनी थाहा पाएर सेनापति पनि डराए, किनकि उनले तिनलाई बाँधेका थिए।

³⁰तर भोलिपल्‍ट यहूदीहरूले पावललाई कुन खास कारणले दोष लाएका थिए सो बुझ्‍ने इच्‍छाले तिनलाई फुकाइदिए, र सबै मुख्‍य पूजाहारीहरू र महासभालाई जम्‍मा हुने आज्ञा गरे, अनि पावललाई तल ल्‍याई तिनीहरूका सामुन्‍ने खड़ा गरे।