Read Nepali New Revised Version, 2012 प्रेरित 23 Bible Online

प्रेरित 23 - Nepali New Revised Version, 2012 bible

प्रेरित 23

¹पावलले महासभातिर एकटक लाएर हेरे, र भने, “भाइ हो, आजको दिनसम्‍म परमेश्‍वरको दृष्‍टिमा मैले शुद्ध विवेकले जीवन बिताएको छु।”

²यस कुरामा प्रधान पूजाहारी हननियाले तिनको छेउमा उभिनेहरूलाई मुखमा हिर्काउने हुकुम दिए।

³तब पावलले उनलाई भने, “हे चून पोतेको भित्तो! तिमीलाई पनि परमेश्‍वरले प्रहार गर्नुहुनेछ। तिमी व्‍यवस्‍थाबमोजिम मेरो इन्‍साफ गर्न बसेर के व्‍यवस्‍थाको विपरीत मलाई हिर्काउने हुकुम दिन्‍छौ?”

⁴अनि छेउमा उभिनेहरूले भने, “के तँ परमेश्‍वरका प्रधान पूजाहारीको अपमान गर्छस्‌?”

⁵तब पावलले भने, “भाइ हो, उहाँ प्रधान पूजाहारी हुनुहुन्‍छ भन्‍ने मलाई थाहा थिएन। किनकि लेखिएको छ, ‘तैंले आफ्‍ना जनताका शासकको खराबी नबोल्‍नू’।”

⁶तर त्‍यस महासभामा एक दल सदुकी र अर्को दल फरिसीहरू रहेछन्‌ भन्‍ने थाहा पाएर पावलले उच्‍च सोरमा भने, “भाइ हो, म त फरिसीहरूका छोरो फरिसी नै हुँ। मरेकाहरूको आशा र पुनरुत्‍थानको कारण मेरो मुद्दा चलिरहेछ।”

⁷तिनले यसो भनेपछि फरिसीहरू र सदुकीहरूमा मतभेद भयो, र भीड़मा फाटो पर्‍यो।

⁸किनकि सदुकीहरू भन्‍दछन्‌ कि पुनरुत्‍थान, स्‍वर्गदूत, आत्‍मा भन्‍ने केही पनि छैन। तर फरिसीहरू ती सबै मान्‍छन्‌।

⁹त्‍यहाँ ठूलो होहल्‍ला मच्‍चियो, र फरिसी दलका कोही शास्‍त्रीहरू खड़ा भएर यसो भन्‍दै प्रतिवाद गर्न लागे, “यस मानिसमा हामी केही खराबी पाउँदैनौं। यदि आत्‍मा वा स्‍वर्गदूतले यिनलाई यसो भनेका हुन्‌ भने के त?”

¹⁰त्‍यहाँ ठूलो मतभेद भएपछि उनीहरूका हातबाट पावल लुछलाछ पारिएलान्‌ भन्‍ने डरले सेनापतिले सिपाहीहरूलाई तल गएर तिनलाई उनीहरूका बीचबाट बलजफतीसँग ल्‍याएर ब्‍यारेकभित्र लैजानू भनी आज्ञा दिए।

¹¹भोलिपल्‍ट राती प्रभुले तिनका नजिक उभिएर भन्‍नुभयो, “साहस गर, पावल, किनकि जसरी तिमीले यरूशलेममा मेरो विषयमा गवाही दियौ, त्‍यसरी तिमीले रोममा पनि गवाही दिनुपर्छ।”

¹²बिहान उज्‍यालो भएपछि यहूदीहरूले आपसमा गट्ठा बाँधेर पावलको हत्‍या नगरेसम्‍म केही नखाने र नपिउने शपथ खाए।

¹³यो षड्‌यन्‍त्र गर्ने मानिसहरू चालीसभन्‍दा पनि बढ़ी थिए।

¹⁴यिनीहरूले मुख्‍य पूजाहारीहरू र धर्म-गुरुहरूकहाँ गएर भने, “पावलको हत्‍या नगरेसम्‍म हामी केही खानेछैनौं भनी हामीले दृढ़ शपथ खाएका छौं।

¹⁵यसकारण तपाईंहरू र महासभा मिलेर सेनापतिलाई अपिल गर्नुहोस्, र त्‍यसको मुद्दाको निर्णय अझ ठीक रूपले गर्नुपर्छ भन्‍ने बहाना बनाई त्‍यसलाई झिकाउनुहोस्‌। अनि त्‍यो यहाँ आउनासाथ हामी त्‍यसको हत्‍या गर्न तयार रहन्‍छौं।”

¹⁶अब पावलको भानिजले यो षड्‌यन्‍त्र थाहा पाएर ब्‍यारेकभित्र गई पावललाई सुनाइदियो।

¹⁷तब पावलले कप्‍तानहरूमध्‍ये एक जनालाई बोलाएर भने, “यस युवकलाई सेनापतिकहाँ पुर्‍याइदिनुहोस्, किनकि यसको उहाँसँग केही भन्‍ने कुरा छ।”

¹⁸यसकारण उनले त्‍यसलाई लिएर सेनापतिकहाँ पुर्‍याएर भने, “बन्‍दी पावलले मलाई डाकेर यस ठिटालाई तपाईंकहाँ लैजानू भनेको छ, तपाईंलाई भन्‍नुपर्ने केही कुरा छ, अरे।”

¹⁹सेनापतिले त्‍यसको हात समातेर एकातिर लगी एकान्‍तमा सोधे, “तैंले मलाई भन्‍ने कुरा के हो?”

²⁰त्‍यसले भन्‍यो, “यहूदीहरूले पावलको विषयमा अझ राम्ररी सोधपूछ गर्ने निहुँ गरी भोलि तिनलाई महासभामा ल्‍याइदिनुहोस्‌ भनी तपाईंसँग अनुरोध गर्ने मतो गरेका छन्‌।

²¹तर तपाईंले तिनीहरूको कुरा नमान्‍नुहोला, किनकि तिनीहरूमध्‍ये चालीसभन्‍दा पनि बढ़ी मानिसहरूले तिनको हत्‍या नगरुञ्‍जेल केही खानपान नगर्ने शपथ खाएर तिनलाई मार्नलाई ढुकेर बसेका छन्, र अब तिनीहरू तपाईंका वचनको आशा गरी तयारीमा छन्‌।”

²²यसकारण सेनापतिले त्‍यस ठिटालाई यसो भनी आज्ञा दिएर पठाए, “तैंले मलाई यो खबर दिएको कुरा कसैलाई नभन्‌।”

²³त्‍यसपछि तिनले कप्‍तानहरूमध्‍ये दुई जनालाई बोलाई भने, “आज राती नौ बजेतिर दुई सय सिपाहीहरू, सत्तरी जना घोड़चढ़ी र दुई सय भालावालहरूलाई कैसरियासम्‍म जान तयार पारी राख।

²⁴अनि पावलको निम्‍ति पनि घोडाको व्‍यवस्‍था गर, र उनलाई सुरक्षासाथ हाकिम फेलिक्‍सकहाँ पुर्‍याऊ।”

²⁵तिनले यस किसिमको पत्र पनि लेखे:

²⁶“माननीय हाकिम फेलिक्‍सलाई, क्‍लौडियस लुसियसको अभिवादन!

²⁷यस मानिसलाई यहूदीहरूले पक्रेर मार्न खोजेका थिए, तर यो रोमी नागरिक रहेछ भन्‍ने मैले थाहा पाई फौजसँग त्‍यहाँ पुगी यसलाई छुटाएँ।

²⁸कुन अभियोगमा तिनीहरूले यसलाई दोष लाएका रहेछन्‌ भनी जान्‍ने इच्‍छाले मैले यसलाई तिनीहरूको महासभामा ल्‍याएँ।

²⁹तिनीहरूले व्‍यवस्‍थाका प्रश्‍नबारे यसलाई दोष लाएका रहेछन्‌। तर ज्‍यानसजाय अथवा कैद गर्नुपर्ने माफिकको केही दोष मैले भेट्टाइनँ।

³⁰यस मानिसको विरुद्ध षड्‌यन्‍त्र हुँदैछ भन्‍ने कुराको सूचना मलाई दिइयो, र यसलाई तुरुन्‍तै तपाईंको सामने पठाएको छु, र यसको विरुद्ध दोष लाउनेहरूलाई पनि तपाईंको सामु बयान दिनू भनी आदेश गरेको छु।”

³¹यसैले आज्ञा पाएबमोजिम सिपाहीहरूले पावललाई राती नै एन्‍टिपाट्रिसमा पुर्‍याए।

³²घोड़चढ़ीहरूलाई तिनको साथ जान त्‍यहीँ छोड़ेर अर्को दिन तिनीहरू ब्‍यारेक फर्के।

³³कैसरियामा पुगेपछि तिनीहरूले हाकिमलाई पत्र बुझाई पावललाई पनि उनका सामुन्‍ने हाजिर गराए।

³⁴उनले पत्र पढ़ेपछि तिनी कुन जिल्‍लाका हुन्‌ भनी सोधे। तिनी किलिकियाका हुन्‌ भन्‍ने थाहा पाएपछि उनले भने,

³⁵“तिमीलाई अभियोग लाउनेहरू आएपछि तिम्रो मुद्दा सुन्‍नेछु।” अनि उनले तिनलाई हेरोदले बनाएको दरबारमा राख्‍नू भनी हुकुम गरे।