Read Nepali New Revised Version, 2012 गलाती 1 Bible Online

गलाती 1 - Nepali New Revised Version, 2012 bible

गलाती 1

¹पावल ख्रीष्‍टको एक प्रेरित, जो मानिसहरूबाट वा कुनै मानिसद्वारा पठाइएको होइन, तर येशू ख्रीष्‍ट र परमेश्‍वर पिता, जसले उहाँलाई मृत्‍युबाट जीवित पार्नुभयो, उहाँबाट पठाइएको हुँ,

²म र मसँग हुने सबै भाइहरूबाट, गलातियाका मण्‍डलीहरूलाई:

³परमेश्‍वर पिता र हाम्रा प्रभु येशू ख्रीष्‍टबाट तिमीहरूलाई अनुग्रह र शान्‍ति।

⁴हाम्रा परमेश्‍वर र पिताको इच्‍छाअनुसार उहाँले यस वर्तमान दुष्‍ट युगबाट हामीलाई छुटकारा दिनलाई हाम्रा पापका निम्‍ति आफैलाई अर्पण गर्नुभयो।

⁵परमेश्‍वरलाई सदासर्वदा महिमा भइरहोस्‌। आमेन।

⁶मलाई आश्‍चर्य लागिरहेछ, कि ख्रीष्‍टको अनुग्रहमा तिमीहरूलाई बोलाउनुहुनेलाई यति चाँड़ै त्‍यागेर तिमीहरू भिन्‍न सुसमाचारतिर लागिरहेछौ।

⁷वास्‍तवमा अर्को सुसमाचार छैन, तर यस्‍ता कोहीकोही छन्, जसले ख्रीष्‍टको सुसमाचारलाई भ्रष्‍ट पार्न खोज्‍छन्‌।

⁸हामीले प्रचार गरेका सुसमाचारको विपरीत हामीले वा स्‍वर्गबाट आउने दूतले नै प्रचार गर्‍यो भने पनि त्‍यो व्‍यक्ति श्रापित होस्‌।

⁹हामीले अघिदेखि नै भनेजस्‍तै म फेरि अहिले पनि भन्‍दछु, तिमीहरूले जुन सुसमाचार ग्रहण गरेका छौ, त्‍यसको विपरीत अरू कसैले तिमीहरूलाई प्रचार गर्दछ भने, त्‍यो श्रापित होस्‌।

¹⁰के म मानिसहरूको निगाह खोज्‍दैछु, कि परमेश्‍वरको? अथवा के मैले मानिसहरूलाई खुशी पार्न खोज्‍दैछु? यदि मैले अझै मानिसहरूलाई खुशी पार्न कोसिस गरेको भए म ख्रीष्‍टको दास हुनेथिइनँ।

¹¹भाइ हो, तिमीहरूले यो जान भन्‍ने म चाहन्‍छु, कि मैले प्रचार गरेको सुसमाचार मानिसको सुसमाचार होइन।

¹²किनकि मैले यो कुनै मानिसबाट पाएको होइनँ, न मलाई यो सिकाइएको थियो, तर येशू ख्रीष्‍टको प्रकाशद्वारा मैले यो पाएको हुँ।

¹³यहूदी धर्ममा छँदा मेरो अघिको जीवनको विषयमा तिमीहरूले सुनेका छौ, कसरी मैले परमेश्‍वरको मण्‍डलीलाई भयानक रूपले सताएँ, र त्‍यसलाई नाश गर्न खोजें।

¹⁴हाम्रा जातिमा, मेरा दौँतरकाहरू धेरैलाई उछिनेर म यहूदी धर्ममा अगि बढ़ेको थिएँ, र मेरा पिता-पुर्खाको परम्‍परामा म ज्‍यादै जोशिलो थिएँ।

¹⁵तर, मेरो जन्‍म हुन अघि नै मलाई अलग गर्नुहुने, र आफ्‍नो अनुग्रहद्वारा मलाई बोलाउनुहुने परमेश्‍वरलाई,

¹⁶जब अन्‍यजातिहरूका बीचमा उहाँको प्रचार गर्नलाई आफ्‍ना पुत्र ममा प्रकट गराउन उहाँलाई खुशी लाग्‍यो, तब मैले कुनै मानिससँग केही सल्‍लाह लिइनँ,

¹⁷न त मभन्‍दा अघि प्रेरित हुनेहरूकहाँ म यरूशलेममा गएँ, तर तुरुन्‍तै अरब देशमा गएँ, र पछि दमस्‍कसमा फर्केर आएँ।

¹⁸तब तीन वर्षपछि केफाससँग भेट गर्न म यरूशलेम गएँ, र उनीसँग पन्‍ध्र दिनसम्‍म बसें।

¹⁹तर प्रभुका भाइ याकूबलाई बाहेक अरू कुनै प्रेरितलाई मैले भेटिनँ।

²⁰परमेश्‍वरको सामु म तिमीहरूलाई विश्‍वास दिलाउन चाहन्‍छु, कि म जे लेख्‍तछु त्‍यो झूटो होइन।

²¹त्‍यसपछि म सिरिया र किलिकियाका इलाकातिर गएँ।

²²त्‍यतिञ्‍जेल यहूदियाका ख्रीष्‍टका मण्‍डलीहरूले मेरो मुख देखेका थिएनन्‌।

²³तिनीहरूले यतिसम्‍म मात्र सुनेका थिए, “अघि हामीहरूलाई सताउने मानिसले जुन विश्‍वास नाश गर्न खोजेको थियो, अहिले त्‍यसले त्‍यही विश्‍वास प्रचार गरिरहेछ।”

²⁴तिनीहरूले मेरो कारण परमेश्‍वरलाई महिमा दिए।