Read Nepali New Revised Version, 2012 गलाती 4 Bible Online

गलाती 4 - Nepali New Revised Version, 2012 bible

गलाती 4

¹मेरो भनाइको अर्थ यो हो, उत्तराधिकारी जबसम्‍म बालकै छ, ऊ सबै थोकको मालिक भए तापनि कमाराभन्‍दा फरक हुँदैन,

²तर बाबुले ठहराएको समयसम्‍म ऊ अभिभावक र संरक्षकको अधीनमा हुन्‍छ।

³हामी पनि यसरी नै बालक छउञ्‍जेल संसारका दैवी शक्तिहरूको दासत्‍वमुनि थियौं,

⁴तर समयको पूर्णतामा परमेश्‍वरले आफ्‍ना पुत्रलाई पठाउनुभयो। उहाँ एउटी स्‍त्रीबाट जन्‍मनुभयो, तथा व्‍यवस्‍थाको अधीनमा जन्‍मनुभयो।

⁵व्‍यवस्‍थाको अधीनमा रहनेहरूलाई मोल तिरेर छुटाउनलाई उहाँ पठाइनुभयो, ताकि हामी पुत्रको पूरा हक प्राप्‍त गर्न सकौं।

⁶तिमीहरू पुत्र भएका हुनाले परमेश्‍वरले आफ्‍ना पुत्रको आत्‍मा हाम्रा हृदयमा पठाइदिनुभयो, जसले “हे अब्‍बा, पिता!” भनेर पुकार्नुहुन्‍छ।

⁷यसैकारण, परमेश्‍वरद्वारा तिमी अब उप्रान्‍त दास होइनौ, तर पुत्र हौ, र पुत्र हौ भनेता उत्तराधिकारी पनि हौ।

⁸अघिअघि जब तिमीहरूले परमेश्‍वरलाई चिनेका थिएनौ, तिमीहरू तिनका दास थियौ, जो स्‍वभावले नै देवहरू होइनन्,

⁹तर अब त तिमीहरूले परमेश्‍वरलाई चिनेका छौ, अथवा परमेश्‍वरबाट चिनिएका छौ, र पनि फेरि कसरी तिमीहरू ती निर्बल र सुरु-सुरुका तुच्‍छ सिद्धान्‍तहरूतिर फर्कन्‍छौ र फेरि तिनका दास बन्‍न चाहन्‍छौ?

¹⁰तिमीहरू तिथिहरू, महिनाहरू, ऋतुहरू र वर्षहरू मान्‍दछौ।

¹¹मलाई त यस्‍तो लाग्‍छ, कि तिमीहरूका निम्‍ति गरिरहेको मेरो परिश्रम व्‍यर्थ भयो।

¹²भाइ हो, तिमीहरू मजस्‍तै होओ भन्‍ने म बिन्‍ती गर्दछु, किनकि म पनि तिमीहरूजस्‍तै भएको छु। तिमीहरूले मेरो केही खराबी गरेका छैनौ।

¹³तिमीहरूलाई थाहा छ, कि शरीरको अस्‍वस्‍थताले गर्दा नै मैले पहिले तिमीहरूलाई सुसमाचार सुनाएथें।

¹⁴यद्यपि मेरो बिरामी अवस्‍था तिमीहरूका लागि एउटा परीक्षा थियो, तथापि तिमीहरूले मलाई तिरस्‍कार गरेनौ, न घृणा नै गर्‍यौ, तर परमेश्‍वरको एउटा दूतलाई, ख्रीष्‍ट येशूलाई झैँ मलाई ग्रहण गर्‍यौ।

¹⁵तिमीहरूले अनुभव गरेको सन्‍तोष कता गयो? किनभने म गवाही दिन सक्‍छु, कि यदि सम्‍भव भए तिमीहरूले आफ्‍ना आँखासम्‍म पनि निकालेर मलाई दिनेथियौ।

¹⁶तब तिमीहरूलाई साँचो भनेको कारणले के म तिमीहरूको शत्रु भएको छु र?

¹⁷तिमीहरूलाई आफूपट्टि तान्‍न तिनीहरू खूबै जोश देखाउँछन्, तर असल अभिप्रायले होइन। तिमीहरूले बढ़ी उत्‍साहसाथ तिनीहरूलाई स्‍वीकार गर भनेर तिनीहरूले हामीबाट तिमीहरूलाई अलग पार्न खोज्‍छन्‌।

¹⁸असल अभिप्रायको निम्‍ति जोशिलो हुनु असल हो, तर म तिमीहरूका माझमा हुँदा मात्र जोश देखाउनु असल होइन।

¹⁹मेरा साना बालक हो, ख्रीष्‍ट तिमीहरूमा नबनिनुभएसम्‍म म फेरि प्रसवपीडामा छु।

²⁰अहिले म तिमीहरूका साथमा भएर तिमीहरूसँग मेरो बोल्‍ने तरिका बदल्‍न सके कति असल हुनेथियो, किनकि तिमीहरूका विषयमा म अन्‍योलमा परेको छु।

²¹तिमीहरू व्‍यवस्‍थाको अधीनमा रहन चाहनेहरूले मलाई भन, व्‍यवस्‍थाले के भन्‍छ के तिमीहरूलाई थाहा छैन?

²²किनभने लेखिएको छ, अब्राहामका दुई छोराहरू थिए, कमारीतर्फबाट एक, अर्कोचाहिँ स्‍वतन्‍त्र स्‍त्रीबाट।

²³कमारीको छोरोचाहिँ शरीरअनुसार जन्‍मेको थियो, तर स्‍वतन्‍त्र स्‍त्रीबाट जन्‍मेको छोरो प्रतिज्ञाद्वारा।

²⁴यो कुरालाई रूपक दृष्‍टान्‍तको रूपमा लिन सकिन्‍छ। ती स्‍त्रीहरू दुई किसिमका करारहरू हुन्‌। एउटीचाहिँ सीनै पर्वतबाट दासत्‍वको लागि सन्‍तान जन्‍माउने हागार हो।

²⁵हागार अरब देशको सीनै पर्वत हो, र वर्तमान यरूशलेमसँग त्‍यसको तुलना गर्न सकिन्‍छ। किनकि त्‍यो आफ्‍ना बालकहरूका साथ दासत्‍वमा छ।

²⁶तर माथिको यरूशलेम स्‍वतन्‍त्र छ, जो हाम्री आमा हुन्‌।

²⁷किनभने लेखिएको छ, “हे नजन्‍माउने बाँझी, आनन्‍द गर, हे प्रसवपीडा थाहा नपाउने, मन खोलेर कराऊ, किनभने पति भएकी स्‍त्रीभन्‍दा त्‍यागिएकी स्‍त्रीका छोरा-छोरी धेरै छन्‌।”

²⁸अब हे भाइ हो, इसहाकजस्‍तै हामी पनि प्रतिज्ञाका सन्‍तान हौं।

²⁹तर त्‍यस बेला जसरी शरीरअनुसार जन्‍मेकोले आत्‍माअनुसार जन्‍मेकोलाई सताउँदथ्‍यो, अहिले पनि त्‍यस्‍तै छ।

³⁰तर धर्मशास्‍त्रले के भन्‍दछ? “कमारी र त्‍यसको छोरालाई निकालिदेऊ, किनभने दासी-पुत्र स्‍वतन्‍त्र स्‍त्रीको छोरासँग उत्तराधिकारी हुनेछैन।”

³¹यसकारण भाइ हो, हामी कमारीका होइनौं, तर स्‍वतन्‍त्र स्‍त्रीका सन्‍तान हौं।