Read Nepali New Revised Version, 2012 गलाती 6 Bible Online

गलाती 6 - Nepali New Revised Version, 2012 bible

गलाती 6

¹भाइ हो, यदि कुनै मानिस अपराधमा पक्राउ पर्‍यो भने तिमीहरू जो आत्‍मिक छौ, तिमीहरूले नै नम्रतापूर्वक तिनको सुधार गर। आफ्‍नै पनि विचार राख, नत्रता तिमीहरू पनि परीक्षामा पर्नेछौ।

²एउटाले अर्काको भार उठाओ, र यसरी ख्रीष्‍टको व्‍यवस्‍था पूरा गर।

³किनकि कुनै मूल्‍य नभएको मानिसले आफैलाई केही हुँ भनी ठान्‍छ भने त्‍यसले आफैलाई धोका दिन्‍छ।

⁴प्रत्‍येकले आफ्‍नै कामको जाँच गरोस्, तब मात्र त्‍यसले आफैलाई अरूसँग तुलना नगरी आफैमाथि गर्व गर्न सक्‍छ।

⁵किनभने हरेकले आफ्‍नो भार आफै उठाउनुपर्छ।

⁶वचनको शिक्षा पाउने हरेकले आफ्‍ना सबै असल थोकहरू वचन सिकाउनेसँग बाँड़चूड़ गर्नुपर्छ।

⁷धोकामा नपर, परमेश्‍वरको ठट्टा हुँदैन, किनभने मानिसले जे रोप्‍दछ त्‍यसैको कटनी पनि गर्नेछ।

⁸जसले आफ्‍नो पापमय स्‍वभावको निम्‍ति रोप्‍तछ, त्‍यसले आफ्‍नो पापमय स्‍वभावबाट नै सर्वनाशको कटनी गर्नेछ। तर जसले आत्‍माको निम्‍ति रोप्‍तछ, त्‍यसले आत्‍माबाट नै अनन्‍त जीवनको कटनी गर्नेछ।

⁹भलाइ गर्ने काममा हामी नथाकौं, किनभने यदि हिम्‍मत हारेनौं भने ठीक समयमा हामी कटनी गर्नेछौं।

¹⁰यसकारण मौका पाएअनुसार हामी सबै मानिसको भलाइ गर्दैजाऔं, विशेष गरी तिनीहरूको, जो हाम्रो विश्‍वासका परिवारका हुन्‌।

¹¹हेर, म कति ठूला-ठूला अक्षरहरूले आफ्‍नै हातले तिमीहरूलाई लेखिरहेछु।

¹²ख्रीष्‍टका क्रूसको कारणले सतावटमा नपरून्‌ भनी बाहिरी तवरले सब ठीक देखिन चाहनेहरूले नै तिमीहरूलाई खतना गर्न कर लाउँछन्‌।

¹³किनकि खतना गर्नेहरू आफै पनि व्‍यवस्‍था पालन गर्दैनन्, तर तिमीहरूको शरीरमा घमण्‍ड गर्नको निम्‍ति तिमीहरूले खतना गरेको तिनीहरू चाहन्‍छन्‌।

¹⁴हाम्रा प्रभु येशू ख्रीष्‍टको क्रूस बाहेक अरू कुनै पनि कुरामाथि घमण्‍ड गर्ने कुरा मदेखि दूर रहोस्, जसद्वारा मचाहिँ संसारको लेखि, र संसार मेरो लेखि क्रूसमा झुण्‍ड्याइएको छ।

¹⁵न त खतनाको केही महत्त्व छ, न बेखतनाको, तर नयाँ सृष्‍टि नै सब थोक हो।

¹⁶अब जो-जति यस नियममा चल्‍दछन्, तिनीहरूमाथि र परमेश्‍वरका इस्राएल जातिमाथि शान्‍ति र कृपा रहोस्‌।

¹⁷अबदेखि उसो कसैले मलाई कष्‍ट नदेओस्, किनभने म आफ्‍नो शरीरमा येशूका डामहरू धारण गर्दछु।

¹⁸भाइ हो, हाम्रा प्रभु येशू ख्रीष्‍टको अनुग्रह तिमीहरूको आत्‍मासँग रहोस्‌। आमेन।