Read Nepali New Revised Version, 2012 १ थेसलोनिकी 3 Bible Online

१ थेसलोनिकी 3 - Nepali New Revised Version, 2012 bible

१ थेसलोनिकी 3

¹यसकारण जब हामीले सहन सकेनौं, तब एथेन्‍समा एकलै छोडिन हामी राजी भयौं,

²र तिमीहरूलाई विश्‍वासमा स्‍थिर गराउन र अर्ती-उपदेश दिन, परमेश्‍वरमा ख्रीष्‍टका सुसमाचारको सेवक हाम्रा भाइ तिमोथीलाई हामीले पठायौं,

³ताकि यी कष्‍टहरूले गर्दा कोही नडग्‍मगाओस्‌। तिमीहरू आफैलाई थाहा छ, कि यसैको निम्‍ति हामी खटाइएका हौं।

⁴किनकि जब हामी तिमीहरूसँग थियौं, तब तिमीहरूले कष्‍ट भोग्‍नैपर्छ भनी हामीले अघिबाटै भनेको थियौं। यो साँच्‍चै हुन पनि आयो, सो तिमीहरूलाई थाहा छ।

⁵यसकारण मैले अझै सहन नसक्‍दा परीक्षा गर्नेले कुनै किसिमले तिमीहरूलाई परीक्षामा पार्‍यो कि भनी र हाम्रो परिश्रम व्‍यर्थै जाला कि भन्‍ने डरले तिमीहरूको विश्‍वास थाहा पाउनलाई मैले तिनलाई पठाएँ।

⁶तर अहिले तिमोथी तिमीहरूकहाँबाट हामीकहाँ आएर तिमीहरूको विश्‍वास र प्रेमको असल खबर हामीलाई सुनाए। तिमीहरूले हामीलाई भेट्‌न ज्‍यादै इच्‍छा गरी सधैँ प्रेमसँग हाम्रो सम्‍झना गर्दछौ भन्‍ने खबर तिनले दिए। हामी पनि तिमीहरूलाई भेट्‌न त्‍यतिकै चाहना गर्दछौं।

⁷त्‍यसैकारण भाइ हो, तिमीहरूका विश्‍वासको कारणले हाम्रा सारा दुःख र क्‍लेशमा तिमीहरूका विषयमा हामीले सान्‍त्‍वना पाएका छौं।

⁸किनकि यदि तिमीहरू प्रभुमा दह्रिला रह्यौ भने हामी जीवित रहन्‍छौं।

⁹सबै आनन्‍द जो तिमीहरूका खातिर परमेश्‍वरमा हामी अनुभव गर्छौं त्‍यसको निम्‍ति र तिमीहरूका लागि हामी परमेश्‍वरलाई के धन्‍यवाद दिन सक्‍छौं र?

¹⁰तिमीहरूलाई आमनेसामने भेटेर तिमीहरूका विश्‍वासको कमी पूरा गर्ने हेतुले हामी दिनरात जोशका साथ प्रार्थना गर्छौं।

¹¹अब हाम्रा परमेश्‍वर र पिता स्‍वयम्‌ले र हाम्रा प्रभु येशूले तिमीहरूकहाँ आउने हाम्रो बाटो खोलिदेऊन्‌।

¹²जसरी हामी तिमीहरूलाई प्रेम गर्दछौं त्‍यसरी नै प्रभुले तिमीहरूलाई एकले-अर्कासँग र सबै मानिससँग प्रेममा बढ्‌ने र प्रशस्‍त भइरहने तुल्‍याऊन्,

¹³यस हेतुले कि उहाँका सबै सन्‍तहरूका साथमा हाम्रा प्रभु येशू ख्रीष्‍टको पुनरागमन हुँदा उहाँले हाम्रा परमेश्‍वर पिताको सामुन्‍ने तिमीहरूका हृदय पवित्र र निष्‍खोट तुल्‍याई स्‍थिर गराऊन्‌।