Read Nepali New Revised Version, 2012 यहोशू 1 Bible Online

यहोशू 1 - Nepali New Revised Version, 2012 bible

यहोशू 1

¹परमप्रभुका दास मोशाको मृत्‍युपछि, मोशाका सहायक नूनका छोरा यहोशूलाई परमप्रभुले यसो भन्‍नुभयो,

²“मेरो दास मोशा मर्‍यो। यसकारण उठ्, तँ यी सबै मानिसहरूलाई लिएर यर्दन पारि मैले इस्राएलीहरूलाई दिन आँटेको देशमा जा।

³मैले मोशालाई प्रतिज्ञा गरेझैँ तेरा पैतालाले कुल्‍चिने सबै जग्‍गा म तँलाई दिनेछु।

⁴मरुभूमिदेखि लेबनानसम्‍म लिएर महानदी, अर्थात्‌ यूफ्रेटिस नदीदेखि— हित्तीहरूको जम्‍मै देश— पश्‍चिमतिर महासागरसम्‍मै [1] तिमीहरूको सिमाना हुनेछ।

⁵तेरो जीवनभरि तेरो सामुन्‍ने कोही मानिस खड़ा हुन सक्‍नेछैन। जसरी म मोशासँग रहें, त्‍यसरी नै म तँसँग रहनेछु। म तँलाई छोड्‌ने, अनि तँलाई त्‍याग्‍नेछैनँ।

⁶“बलियो र खूब साहसी बन्, किनकि मैले तिनीहरूका पिता-पुर्खाहरूलाई दिन्‍छु भनी प्रतिज्ञा गरेको देश तिनीहरूको अधिकारमा गराउन तैंले तिनीहरूलाई अगुवाइ गर्नेछस्‌।

⁷बलियो र अति साहसी हो। मेरो दास मोशाले तँलाई आज्ञा गरेअनुसार सबै व्‍यवस्‍था पालन गर्‌। त्‍यसबाट दाहिनेतिर वा देब्रेतिर नफर्कनू, र तँ जहीँ गए पनि सफलता पाउनेछस्‌।

⁸व्‍यवस्‍थाको यो पुस्‍तक तेरो ओठबाट नहटोस्, तर त्‍यसमाथि तैंले दिनरात ध्‍यान गर्नू अनि त्‍यसमा लेखिएका सबै कुरा होशियारीसाथ पालन गर्नू, र तेरा सबै मार्गहरूमा तैंले उन्‍नति गर्नेछस्‌ र सफलता पाउनेछस्‌।

⁹तँलाई मेरो आज्ञा छ बलियो र खूबै साहसी हो, नडरा, निराश नहो, किनकि तँ जहाँ गए पनि, परमप्रभु तेरा परमेश्‍वर, तेरो साथमा हुनुहुनेछ।”

¹⁰तब यहोशूले मानिसहरूका अधिकृतहरूलाई हुकुम गरे,

¹¹“छाउनीको बीचबाट गएर मानिसहरूलाई आदेश दिई भन, ‘आ-आफ्‍ना खाने सामान तयार गर, किनकि तीन दिनभित्र परमप्रभु तिमीहरूका परमेश्‍वरले तिमीहरूलाई दिनुभएको देश अधिकार गर्न तिमीहरू यो यर्दन पारि जानुपर्छ’।”

¹²तर यहोशूले रूबेनी, गादी र मनश्‍शेको आधा कुललाई भने,

¹³“परमप्रभुका दास मोशाले तिमीहरूलाई दिएको आज्ञा, अर्थात्‌ ‘परमप्रभु तिमीहरूका परमेश्‍वरले तिमीहरूलाई विश्राम दिनुहुन्‍छ र तिमीहरूलाई यो जमिन दिनुभएको छ,’ भन्‍ने वचन सम्‍झ।

¹⁴तिमीहरूका स्‍त्रीहरू, बालबच्‍चाहरू र गाईबस्‍तुहरू मोशाले तिमीहरूलाई यर्दनको पूर्वपट्टि दिएको देशमा रहन सक्‍नेछन्‌। तर तिमीहरूका सबै योद्धाहरू हतियार भिरी आ-आफ्‍ना दाजुभाइहरूका अगिअगि पारि जानुपर्छ।

¹⁵अनि जबसम्‍म तिमीहरूलाई झैँ परमप्रभुले उनीहरूलाई पनि विश्राम दिनुहुन्‍न र परमप्रभु तिमीहरूका परमेश्‍वरले दिनुहुने देश उनीहरूले जबसम्‍म अधिकार गर्नेछैनन्‌ तिमीहरूले उनीहरूलाई मदत गर्नुपर्छ। त्‍यसपछि परमप्रभुका दास मोशाले यर्दन वारि पूर्वतिर तिमीहरूलाई दिएको देशमा फर्केर त्‍यसको अधिकार गर्न सक्‍नेछौ।”

¹⁶अनि तिनीहरूले यहोशूलाई यसरी उत्तर दिए, “तपाईंले हामीलाई जे-जे आज्ञा गर्नुहुन्‍छ त्‍यो हामी गर्नेछौं, र तपाईंले हामीलाई जहाँ-जहाँ पठाउनुहुन्‍छ, हामी त्‍यहाँ जानेछौं।

¹⁷जसरी हामीले मोशाका सबै कुरा मान्‍थ्‍यौं त्‍यसरी हामी तपाईंलाई पनि मान्‍नेछौं। परमप्रभु तपाईंका परमेश्‍वर जसरी मोशाका साथमा हुनुहुन्‍थ्‍यो, त्‍यसरी तपाईंका साथमा पनि रहून्‌।

¹⁸तपाईंका आज्ञाका विरुद्धमा जो खड़ा होला र तपाईंले आज्ञा गर्नुभएका वचनहरू पालन नगर्ने जो होला, त्‍यो मारिनेछ। केवल तपाईं बलियो र साहसी हुनुहोस्‌।”