Read Nepali New Revised Version, 2012 यहोशू 10 Bible Online

यहोशू 10 - Nepali New Revised Version, 2012 bible

यहोशू 10

¹यहोशूले ऐ सहर कब्‍जा गरेर ध्‍वंस पारे, ऐका राजा र सहरलाई यरीहो र त्‍यहाँका राजालाई जस्‍तै गरे र गिबोनका बासिन्‍दाहरूले इस्राएलीहरूसँग सन्‍धि गरेर बसेका छन्‌ भन्‍ने खबर यरूशलेमका राजा अदोनिसेदेकले पाए।

²उनी र उनका मानिसहरू ज्‍यादै डराए, किनभने गिबोन एक ठूलो नगर थियो, राजकीय नगरझैँ, त्‍यो ऐभन्‍दा पनि ठूलो थियो र त्‍यहाँका सबै निवासीहरू शूरवीर थिए।

³यसकारण यरूशलेमका राजा अदोनिसेदेकले हेब्रोनका राजा होहाम, यर्मूतका राजा पिराम, लाकीशका राजा यापी र एग्‍लोनका राजा दबीरलाई आह्वान गरे,

⁴“मकहाँ आउनुहोस्‌ र गिबोनमाथि हमला गर्न मलाई मदत गर्नुहोस्, किनकि त्‍यसले यहोशू र इस्राएलीहरूसँग मिलाप गरेछ।”

⁵तब एमोरीहरूका पाँच राजा, अर्थात्‌ यरूशलेम, हेब्रोन, यर्मूत, लाकीश, र एग्‍लोनका पाँच राजाहरूले उनीहरूका आ-आफ्‍ना सबै सेनासमेत गिबोनको सामु छाउनी बनाएर त्‍यसको विरुद्ध लड़ाइँ गरे।

⁶यसर्थ गिबोनका मानिसहरूले गिलगालको छाउनीमा यहोशूकहाँ यसो भनेर मानिस पठाए, “हामीकहाँ चाँड़ो आएर हामीलाई बचाउनुहोस्, र मदत गर्नुहोस्‌। आफ्‍ना दासहरूलाई नत्‍याग्‍नुहोस्, किनकि पहाड़ी देशमा बस्‍ने एमोरीहरूका सबै राजाहरू हाम्रा विरुद्धमा भेला भएका छन्‌।”

⁷त्‍यसकारण सारा फौज र वीर योद्धाहरू लिएर यहोशू गिलगालबाट गए।

⁸अनि परमप्रभुले यहोशूलाई भन्‍नुभयो, “उनीहरूसँग नडरा किनकि मैले उनीहरूलाई तेरो हातमा सुम्‍पिदिएको छु। उनीहरू एक जना पनि तेरो सामुन्‍ने टिक्‍न सक्‍नेछैन।”

⁹यहोशू रातारात गिलगालबाट हिँड़ेर अचानक उनीहरूमाथि जाइलागे।

¹⁰परमप्रभुले उनीहरूलाई इस्राएलको सामुन्‍ने अस्‍तव्‍यस्‍त पार्नुभयो र इस्राएलीहरूले गिबोनमा उनीहरूलाई ठूलो विजयसाथ पराजय गरे, र बेथ-होरोनको उकालो बाटोमा उनीहरूलाई खेदेर आजेका र मक्‍केदासम्‍म मार्दैगए।

¹¹इस्राएलीहरूका सामुन्‍नेबाट उनीहरू जसै बेथ-होरोनदेखि आजेकासम्‍मै ओह्रालोमा भाग्‍दैथिए, परमप्रभुले स्‍वर्गबाट उनीहरूमाथि ठूला-ठूला असिना झारिदिनुभयो। उनीहरूमध्‍ये इस्राएलीहरूले तरवारले मारेका भन्‍दा धेरै जना असिनाले मरे।

¹²परमप्रभुले एमोरीहरूलाई इस्राएलीहरूका हातमा सुम्‍पनुभएको दिनमा यहोशूले परमप्रभुसँग इस्राएलीहरूको उपस्‍थितिमा भने, “हे सूर्य, तँ गिबोनमाथि, र हे चन्‍द्र, तँचाहिँ अय्‍यालोनको बेँसीमाथि अड़िरह।”

¹³जाति शत्रुमाथि प्रतिशोध नलिउञ्‍जेल सूर्य र चन्‍द्र थामिए। यो कुरोको उल्‍लेख याशारको पुस्‍तकमा पनि छ। सूर्य आकाशमण्‍डलको बीचमा अड़िरह्यो, र दिनभरि नै अस्‍ताउनलाई आतुरी गरेन।

¹⁴परमप्रभुले मानिसको कुरा सुन्‍नुभयो। त्‍यो दिनजस्‍तो उहिले र पछि कहिले भएन। अवश्‍य इस्राएलीहरूका निम्‍ति परमप्रभुले युद्ध गर्नुभयो।

¹⁵तब यहोशू र तिनका साथमा सारा इस्राएलीहरू गिलगालको छाउनीमा फर्के।

¹⁶अब ती पाँच राजाहरू भागेर मक्‍केदाको गुफामा लुकेका थिए।

¹⁷ती पाँचै राजा मक्‍केदाको गुफामा लुकेका फेला परे भन्‍ने समाचार यहोशूकहाँ पुग्‍यो।

¹⁸यहोशूले भने, “ठूला-ठूला ढुङ्गा गुड़ाएर त्‍यस गुफाको मुखमा राखिदेओ, र उनीहरूलाई रुँग्‍नलाई मानिसहरू नजिकै राख।

¹⁹तर तिमीहरूचाहिँ नपर्ख, आफ्‍ना शत्रुलाई पछिपछि खेद, उनीहरूलाई पछिल्‍तिरबाट आक्रमण गर। उनीहरूलाई उनका सहरहरूमा प्रवेश गर्न नदेओ, किनकि परमप्रभु तिमीहरूका परमेश्‍वरले उनीहरूलाई तिमीहरूका हातमा सुम्‍पनुभएको छ।”

²⁰जब यहोशू र इस्राएलीहरूले उनीहरूलाई संहार गरेर सत्‍यानाश पारे, र बाँचेकाहरू जति थिए उनीहरू पर्खालले घेरिएका सहरहरूभित्र प्रवेश गरे,

²¹तब सबै मानिस मक्‍केदाको छाउनीमा यहोशूकहाँ कुशलसाथ फर्के। इस्राएलीहरूका विरुद्धमा कसैको वाक्‍य फुटेन।

²²यहोशूले भने, “गुफाको मुख खोलेर ती पाँच राजालाई गुफाबाट निकालेर मकहाँ ल्‍याओ।”

²³तिनीहरूले त्‍यसै गरे— यरूशलेमका राजा, हेब्रोनका राजा, यर्मूतका राजा, लाकीशका राजा र एग्‍लोनका राजा— यी पाँचै राजालाई गुफाबाट निकालेर ल्‍याए।

²⁴तिनीहरूले ती राजालाई यहोशूकहाँ ल्‍याएपछि यहोशूले इस्राएलका सारा मानिसहरूलाई र तिनीसँग आउने लड़ाइँका सेनापतिहरूलाई बोलाएर भने, “यता आओ, र तिमीहरूका खुट्टाले यिनीहरूका गर्दनमा टेक।” अनि तिनीहरू आएर आ-आफ्‍ना खुट्टाले यिनीहरूका गर्दनमा टेके।

²⁵यहोशूले तिनीहरूलाई भने, “नडराओ, हरेस नखाओ। हिम्मत गरेर बलिया होओ, किनकि तिमीहरूले लड्‌नुपर्ने तिमीहरूका वैरीहरू सबैलाई परमप्रभुले यसै गर्नुहुनेछ।”

²⁶तब यहोशूले उनीहरूलाई हिर्काएर मारे, र उनीहरूलाई पाँच वटा रूखमा झुण्‍ड्याइदिए, अनि तिनीहरू साँझसम्‍मै रूखमा झुण्‍डिरहे।

²⁷सूर्यास्‍तको बेलामा यहोशूले आज्ञा गरे, र तिनीहरूले उनीहरूलाई रूखबाट झारेर उनीहरू लुकेका त्‍यही गुफामा फालिदिए, र गुफाको मुखमा ठूला-ठूला ढुङ्गाहरू राखिदिए, जो आजको दिनसम्‍म छँदैछ।

²⁸अनि त्‍यही दिन यहोशूले मक्‍केदा कब्‍जा गरे, र त्‍यसलाई र त्‍यसका राजालाई समेत तरवारले नाश गरे। तिनले त्‍यसमा भएका सबै मानिसहरूलाई नाश गरे, र कसैलाई पनि बाँकी राखेनन्‌। तिनले यरीहोका राजालाई गरेजस्‍तै मक्‍केदाका राजालाई पनि गरे।

²⁹त्‍यसपछि यहोशू सबै इस्राएलीहरूका साथमा मक्‍केदाबाट हिँड़ेर लिब्‍ना गए, र त्‍यसलाई आक्रमण गरे।

³⁰परमप्रभुले त्‍यो र त्‍यसका राजालाई इस्राएलीहरूको हातमा सुम्‍पिदिनुभयो, र तिनलाई र त्‍यहाँ भएका सबै मानिसहरूलाई तरवारले नाश गरे। तिनले त्‍यहाँ कसैलाई पनि बाँकी राखेनन्‌। यरीहोका राजालाई तिनले जसो गरेका थिए त्‍यहाँका राजालाई पनि तिनले त्‍यसै गरे।

³¹तब यहोशू सबै इस्राएलीहरूका साथमा लिब्‍नाबाट हिँड़ेर लाकीशमा गए, र घेरा हालेर त्‍यसलाई आक्रमण गरे।

³²परमप्रभुले लाकीशलाई इस्राएलीहरूका हातमा सुम्‍पिदिनुभयो, र दोस्रो दिन तिनीहरूले त्‍यो कब्‍जा गरे, अनि त्‍यसलाई र त्‍यसमा भएका सबै मानिसहरूलाई तिनले लिब्‍नालाई गरेबमोजिम गरे, तरवारले उनीहरूलाई नाश गरे।

³³त्‍यसै बेला गेजेरका राजा होराम लाकीशलाई मदत गर्नलाई आए। तर यहोशूले कसैलाई पनि जीवित नराखी उनलाई र उनका सेनाहरूलाई पराजित गरे।

³⁴त्‍यसपछि यहोशू सारा इस्राएलीहरूका साथमा लाकीशबाट हिँड़ेर एग्‍लोनमा गए, र तिनीहरूले घेरा हालेर त्‍यसमाथि आक्रमण गरे।

³⁵तिनीहरूले त्‍यही दिन त्‍यसलाई कब्‍जा गरेर तरवारले नाश गरे। तिनीहरूले लाकीशलाई झैँ त्‍यहाँका सबै प्राणीलाई तरवारले खतम गरे।

³⁶तब यहोशू सारा इस्राएलीहरूका साथमा एग्‍लोनबाट उक्‍लेर हेब्रोनमा गए, र तिनीहरूले त्‍यसमाथि आक्रमण गरे।

³⁷तिनीहरूले त्‍यो सहर कब्‍जा गरे, र त्‍यसलाई र त्‍यसका राजालाई, र त्‍यसका सबै गाउँहरू र तिनमा भएका सबै मानिसहरूलाई तरवारले नाश गरे। तिनीहरूले कसैलाई पनि बाँकी राखेनन्‌। एग्‍लोनमा झैँ तिनीहरूले त्‍यसलाई र त्‍यसमा भएका सबैलाई पूर्ण रूपले ध्‍वस्‍त पारे।

³⁸तब यहोशू सारा इस्राएलीहरूका साथमा फर्केर दबीरमा गए, र त्‍यसलाई आक्रमण गरे।

³⁹तिनीहरूले त्‍यसलाई, त्‍यसका राजालाई र त्‍यसका सारा गाउँहरूलाई कब्‍जा गरे, र तिनीहरूले उनीहरूलाई तरवारले नाश गरे। त्‍यसमा भएका सबै मानिसलाई नाश पारे। तिनले कसैलाई पनि बाँकी राखेनन्‌। तिनीहरूले हेब्रोन र लिब्‍ना तथा त्‍यहाँका राजालाई गरेझैँ, दबीर र त्‍यसका राजालाई पनि गरे।

⁴⁰यसरी यहोशूले सबै देश, अर्थात्‌ पहाड़ी क्षेत्र, नेगेव भनिने दक्षिण देश, तराई र पहाड़ र त्‍यहाँका सबै राजाहरूलाई समेत परास्‍त गरे। तिनले एउटालाई पनि बाँकी राखेनन्‌। परमप्रभु इस्राएलका परमेश्‍वरको आज्ञाबमोजिम सास फेर्ने जति सबैलाई तिनले नाश पारे।

⁴¹यहोशूले कादेश-बर्नेदेखि लिएर गाजासम्‍म र गोशेनदेखि गिबोनसम्‍मको सबै क्षेत्रलाई परास्‍त गरे।

⁴²यी सब राजाहरूलाई उनीहरूका देशहरूसमेत यहोशूले एउटै धावामा जिते, किनभने परमप्रभु इस्राएलका परमेश्‍वरले नै इस्राएलीहरूका निम्‍ति युद्ध गर्नुभएको थियो।

⁴³त्‍यसपछि यहोशू सबै इस्राएलीहरूका साथमा गिलगालको छाउनीमा फर्के।