Read Nepali New Revised Version, 2012 यहोशू 11 Bible Online

यहोशू 11 - Nepali New Revised Version, 2012 bible

यहोशू 11

¹यो सुनेर हासोरका राजा याबीनले मादोनका राजा योबाब, शिम्रोनका राजा, अक्षापको राजा,

²उत्तरतिर पहाड़ी देशका राजाहरूलाई, र किन्‍नरेतका दक्षिणतिरको अराबाका, र तराईका र पश्‍चिमतिर डोरको लेकका राजाहरूलाई,

³पूर्व र पश्‍चिम दुवैतिर बस्‍ने कनानी, पहाड़ी देशका एमोरी, हित्ती, परिज्‍जीहरू, यबूसीहरू र मिस्‍पा देशको हेर्मोन पहाड़मुनि बस्‍ने हिव्‍वीहरूलाई बोलाइपठाए।

⁴उनीहरू र उनीहरूका सारा सेनासमेत, समुद्रका किनारका बालुवाजत्तिकै प्रशस्‍त घोड़ाहरू र रथहरूका साथमा खचाखच भएर निस्‍केर आए।

⁵यी सब राजाहरू जम्‍मा भए, र उनीहरूले आएर इस्राएलीहरूसँग लड़ाइँ गर्न मेरोम नाउँका तालको नजिक सँगै छाउनी लगाए।

⁶परमप्रभुले यहोशूलाई भन्‍नुभयो, “उनीहरूसँग नडरा, किनकि भोलि यसै बेला उनीहरू सबैलाई मारेर म इस्राएलीहरूका हातमा सुम्‍पिदिनेछु। तैंले उनीहरूका घोड़ाहरूका ढोड़नसा काटिदिनू, र उनीहरूका रथहरू आगोले जलाइदिनू।”

⁷तब यहोशू सबै योद्धाका साथमा मेरोम नाउँको तालमा अचानक आएर उनीहरूमाथि जाइलागे।

⁸अनि परमप्रभुले उनीहरूलाई इस्राएलीहरूका हातमा सुम्‍पिदिनुभयो, र तिनीहरूले उनीहरूलाई पराजय गरे, र उनीहरूलाई ठूलो सीदोनसम्‍म, र मिस्रपोत-मैमसम्‍मै, र पूर्वतिर मिस्‍पाको मैदानसम्‍म खेदे, र एउटा पनि जीवित नराखी तिनीहरूले उनीहरूलाई मारे।

⁹परमप्रभुले आज्ञा गर्नुभएबमोजिम यहोशूले उनीहरूलाई गरे। तिनले उनीहरूका घोड़ाहरूका ढोड़नसा काटे, र उनीहरूका रथहरू आगोमा जलाइदिए।

¹⁰त्‍यस बेला यहोशूले फर्केर हासोर कब्‍जा गरे, र त्‍यहाँका राजालाई तरवारले काटे, किनकि अघि हासोर ती सबै राज्‍यमा नाइके थियो।

¹¹अनि त्‍यहाँ भएका सबैलाई तरवारले मारे। तिनीहरूले त्‍यहाँका सास फेर्ने जति एउटैलाई नछोड़ी पूर्ण रूपले नाश गरे। अनि तिनले हासोरमा आगो लगाइदिए।

¹²ती राजकीय सहरहरू र तिनका सबै राजाहरूलाई समेत यहोशूले लिए, र परमप्रभुका दास मोशाले आज्ञा गरेबमोजिम सबैलाई तरवारले काटेर नाश पारे।

¹³तर यहोशूले जलाएको हासोरबाहेक डाँड़ाहरूमा भएका अरू कुनै सहरलाई पनि इस्राएलीहरूले जलाएनन्‌।

¹⁴यी सहरहरूका सबै पशुहरू र धनमाल जति इस्राएलीहरूले आफ्‍नै निम्‍ति लिए। तर मानिसहरू जति सबैलाई तिनीहरूले तरवारले काटेर नाश पारे, सास फेर्ने कुनै प्राणी बाँकी राखेनन्‌।

¹⁵जसरी परमप्रभुले आफ्‍ना दास मोशालाई आज्ञा गर्नुभएको थियो, त्‍यसरी मोशाले यहोशूलाई अह्राएका थिए, र यहोशूले सबै पालन गरे। परमप्रभुले मोशालाई दिनुभएका सबै आज्ञाहरूमा कुनै पनि आज्ञा यहोशूले अपूरो राखेनन्‌।

¹⁶यसरी यहोशूले ती सारा भूमि, अर्थात्‌ पहाड़ी क्षेत्र, सारा नेगेव भनिने दक्षिण देश, र गोशेनको जम्‍मै देश, तराई, अराबा, इस्राएलको पहाड़ी मुलुक र त्‍यसैको तराई,

¹⁷सेइरको उकालोमा भएको हालाक नाउँको डाँड़ादेखि लिएर हेर्मोन डाँड़ामुनिको लेबनानको बेँसीमा बाल-गादसम्‍म जितेर लिए, र त्‍यहाँका सबै राजाहरूलाई पक्रेर मारे।

¹⁸ती सबै राजाहरूसँग यहोशूले धेरै दिनसम्‍म लड़ाइँ गरे।

¹⁹इस्राएलीहरूसँग मेल गर्ने गिबोन-निवासी हिव्‍वीहरूबाहेक अरू कुनै सहरले तिनीहरूसँग सम्‍झौता गरेनन्, सबै सहर तिनीहरूले युद्धद्वारा लिए।

²⁰परमप्रभुको उद्देश्‍य थियो, उनीहरू सबै इस्राएलको विरुद्धमा लड्‌न आऊन्‌ र सबै दयाविना नाश भई मरून्, जस्‍तो परमप्रभुले मोशालाई आदेश गर्नुभएको थियो।

²¹त्‍यस बखत यहोशूले पहाड़ी देशमा आएर हेब्रोन, दबीर, अनाब, र यहूदा र इस्राएलका सारा पहाड़ी देशमा रहने अनाकीहरूलाई बिलकुलै नाश गरिदिए— यहोशूले उनीहरूका सहरहरूसमेत उनीहरूलाई पूर्ण रूपले नाश पारिदिए।

²²इस्राएलीहरूको देशमा अनाकीहरूको एक जना पनि बाँकी रहेन, केवल गाजा, गात र अश्‍दोदमा केही बाँकी रहे।

²³यसरी परमप्रभुले मोशालाई भन्‍नुभएअनुसार नै यहोशूले सबै देश जितेर लिए, र तिनीहरूका कुलअनुसार भाग-भाग गरी त्‍यो देश इस्राएलीहरूलाई अधिकारको निम्‍ति बाँड़ेर दिए। अनि देशले लड़ाइँबाट विश्राम पायो।