Read Nepali New Revised Version, 2012 यहोशू 16 Bible Online

यहोशू 16 - Nepali New Revised Version, 2012 bible

यहोशू 16

¹योसेफका सन्‍तानको भाग यही हो: त्‍यसको सिमाना यरीहोको पूर्वतिरका पानी, अर्थात्‌ यरीहोका नजिकको यर्दनदेखि लिएर उकालो बाटो जाने उजाड़-स्‍थान भएर बेथेलको पहाड़ी देशसम्‍म पुगेको थियो।

²फेरि बेथेलदेखि लूजमा छिचलेर अरकीका सिमानाको अतारोतसम्‍मै पुगेको थियो।

³तब त्‍यो पश्‍चिमतिर ओर्लेर यल्‍पेतीको सिमाना भई तल्‍लो बेथ-होरोनको किनार भएर गेजेरसम्‍मै पुगेर समुद्रमा गएर टुङ्गिएको छ।

⁴यसरी मनश्‍शे र एफ्राइम, योसेफका दुई सन्‍तानले आफ्‍ना अधिकार लिए।

⁵एफ्राइमका सन्‍तानको सिमाना तिनीहरूका वंश-वंशअनुसार यही हो: तिनीहरूका भागको पूर्वतिरको सिमाना अतारोत-अद्दारदेखि उपल्‍लो बेथ-होरोन भएर

⁶समुद्रसम्‍म थियो। त्‍यो सिमाना उत्तरतिरको मिक्‍मतात भएर पूर्वतिर फर्केर तानत-शीलो पुगी यसको किनार-किनार भएर यानोहसम्‍म छिचलेको छ।

⁷अनि त्‍यो यानोहदेखि अतारोत र नारासम्‍म झरेर यरीहो पुगी यर्दनमा निस्‍केको थियो।

⁸त्‍यो सिमाना तप्‍पूहबाट पश्‍चिमतिर लागेर कनाको खोल्‍सासम्‍म झरी समुद्रमा टुङ्गिएको थियो। एफ्राइमका कुलको अधिकार तिनीहरूका वंश-वंशअनुसार यही हो।

⁹यसदेखि बाहेक, मनश्‍शेका सन्‍तानको अधिकारमध्‍येबाट एफ्राइमका सन्‍तानका निम्‍ति छुट्ट्याएर राखेका सबै सहरहरू र तिनका बस्‍तीहरूसमेत थिए।

¹⁰तर तिनीहरूले गेजेरमा रहेका कनानीहरूलाई धपाएनन्‌। आजको दिनसम्‍म कनानीहरू एफ्राइमीहरूका बीचमा रहेका छन्, तर उनीहरू बेगारीमा काम गर्ने दासहरू भएका छन्‌।