Read Nepali New Revised Version, 2012 यहोशू 18 Bible Online

यहोशू 18 - Nepali New Revised Version, 2012 bible

यहोशू 18

¹अनि इस्राएलीहरूका सारा समुदाय शीलोमा जम्‍मा भयो, र त्‍यहाँ भेट हुने पाल टाँग्‍यो। त्‍यो देश तिनीहरूका अधीनमा भइसकेको थियो,

²तर इस्राएलीहरूमा आ-आफ्‍नो अधिकार भाग नलागेका अझै सात कुल बाँकी थिए।

³यसकारण यहोशूले इस्राएलीहरूलाई भने, “तिमीहरूका पिता-पुर्खाका परमप्रभु परमेश्‍वरले तिमीहरूलाई दिनुभएको देश अधिकार गर्नलाई कति दिन ढिलो गर्छौ?

⁴अब कुलैपिच्‍छे तीन-तीन जना मानिसहरू तिमीहरूका निम्‍ति नियुक्त गर। म तिनीहरूलाई पठाउनेछु, र तिनीहरू गएर देशमा घुमेर आ-आफ्‍ना अधिकारको निम्‍ति भाग लेखेर मकहाँ फर्केर आउनेछन्‌।

⁵तिमीहरूले सात भागमा बन्‍डा गर। यहूदा दक्षिणमा आफ्‍नै सिमानाभित्र र योसेफको घरानाचाहिँ उत्तरतिर तिनीहरूकै सिमानामा रहनुपर्नेछ।

⁶तिमीहरूले त्‍यो देशको सात भागको विवरण लेखिसकेपछि मकहाँ ल्‍याओ। अनि परमप्रभु हाम्रा परमेश्‍वरको सामु तिमीहरूका निम्‍ति म चिट्ठा हालिदिनेछु।

⁷तर लेवीहरूलाई तिमीहरूमध्‍ये केही भाग हुनेछैन, किनकि परमप्रभुको पूजाहारी पद नै तिनीहरूको अधिकार हो। गाद, रूबेन र मनश्‍शेको आधा कुलले पूर्वपट्टि यर्दन पारि, परमप्रभुका दास मोशाले दिएका तिनीहरूका आ-आफ्‍नो अधिकार पाएकै छन्‌।”

⁸तब ती मानिस उठेर गए। अनि यहोशूले सो देशको नक्‍शा बनाएर ल्‍याउन जानेहरूलाई यसो भनेर आज्ञा दिए, “जाओ, सो देशभरि घुम, र त्‍यसको वर्णन लेखेर मकहाँ फर्केर आओ, र यहाँ शीलोमै परमप्रभुको सामु तिमीहरूका निम्‍ति म चिट्ठा हालिदिऊँला।”

⁹तब ती मानिसहरू गएर त्‍यस देशभरि घुमे, र सहर-सहर देखाएर सात भाग गरी प्रत्‍येकको विषयमा वर्णन गरे, र यहोशूकहाँ शीलोमा भएको छाउनीमा फर्के।

¹⁰अनि यहोशूले परमप्रभुको सामु शीलोमा तिनीहरूका निम्‍ति चिट्ठा हाले, र त्‍यहीँ नै यहोशूले तिनीहरूका भाग-भागअनुसार इस्राएलीहरूलाई सो देश बन्‍डा गरिदिए।

¹¹बेन्‍यामीनको कुलका वंश-वंशअनुसार चिट्ठा यसरी निस्‍क्‍यो। तिनीहरूका भागको सिमाना यहूदा र योसेफका कुलहरूका बीचमा पर्‍यो।

¹²तिनीहरूका उत्तरपट्टिको सिमाना यर्दनदेखि सुरु भएर यरीहोको नजिकबाट उत्तरतिर लागी, पश्‍चिमतिरको पहाड़ी देशमा उक्‍लेर बेथ-आवनको मरुभूमिमा पुगेको थियो।

¹³त्‍यो सिमाना त्‍यहाँबाट लूजसम्‍म (यसलाई बेथेल भन्‍दछ) त्‍यसको दक्षिणतिर पुगेर तल्‍लो बेथ-होरोनका दक्षिणपट्टिको पहाड़बाट अतारोत-अद्दारसम्‍म झरेको थियो।

¹⁴अनि त्‍यहाँबाट सो सिमाना पश्‍चिमतिर लागेर दक्षिणपट्टि घुमी बेथ-होरोनका सामुन्‍नेका दक्षिणतिरको डाँड़ाबाट यहूदाका सन्‍तानहरूको किर्यत-बालसम्‍म (यसैलाई किर्यत-यारीम भनिन्‍छ) पुगेको थियो। पश्‍चिम सिमाना यही हो।

¹⁵दक्षिणको सिमानाचाहिँ किर्यत-यारीमको छेउदेखि पश्‍चिमतिर लागेर नेप्‍तोहको मुहानमा निस्‍केको थियो।

¹⁶त्‍यो सिमाना बेन-हिन्‍नोमका बेँसीको सामु र रपाईहरूका बेँसीको उत्तरपट्टिका डाँड़ाको पल्‍लो छेउमा ओर्ली यबूसी सहरका दक्षिणपट्टिका हिन्‍नोमको बेँसीबाट झरेर एन-रोगेलमा झरेको थियो।

¹⁷त्‍यो उत्तरतिर तानिएर एन-शेमेशतिर लागी अदुम्‍मीमका उकालोका सामुन्‍नेको गलीलोतमा निस्‍की रूबेन वंशी बोहनको ढुङ्गामा झरेको थियो।

¹⁸त्‍यहाँबाट त्‍यो बेथ-अराबाको सीधा उत्तरपट्टि पुगेर अराबामा नै झरेको थियो।

¹⁹त्‍यो सिमाना फेरि बेथ-होग्‍लाका उत्तरको किनार छिचलेर यर्दनको दक्षिणपट्टि भएको खारा समुद्रको उत्तरीय खाड़ीमा टुङ्गिएको थियो। दक्षिण सिमाना यही हो।

²⁰त्‍यसका पूर्वपट्टिको सिमानाचाहिँ यर्दन भइहाल्‍यो। बेन्‍यामीनका वंशहरूको अधिकार चारैतिरको सिमानाबमोजिम यही हो।

²¹बेन्‍यामीनको कुललाई तिनीहरूका वंश-वंशअनुसार मिलेका सहरहरू यी नै हुन्‌: यरीहो, बेथ-होग्‍ला, एमेक-कसीस,

²²बेथ-अराबा, समारैम, बेथेल,

²³अब्‍बीम, पारा, ओप्रा,

²⁴कपरअमोनी, ओप्‍नी, गेबा। तिनीहरूका बस्‍तीहरूसमेत बाह्र सहरहरू हुन्‌।

²⁵गिबोन, रामा, बेरोत,

²⁶मिस्‍पा, कपीरा, मोशा,

²⁷रेकेम, यिर्पल, तरला,

²⁸सेलाह, एलेप, यबूसी सहर (अर्थात्‌ यरूशलेम), गिबा र किर्यत। तिनीहरूका बस्‍तीहरूसमेत चौध सहरहरू हुन्‌। बेन्‍यामीनका सन्‍तानको अधिकार तिनीहरूका वंशका निम्‍ति यही हो।