Read Nepali New Revised Version, 2012 यहोशू 19 Bible Online

यहोशू 19 - Nepali New Revised Version, 2012 bible

यहोशू 19

¹दोस्रो चिट्ठा शिमियोनका, अर्थात्‌ शिमियोनका कुलको नाउँमा तिनीहरूका वंश-वंशअनुसार निस्‍क्‍यो। तिनीहरूको अधिकारचाहिँ यहूदाका कुलका अधिकारको बीचमा पर्‍यो।

²तिनीहरूको अधिकारमा परेका यी नै हुन्‌: बेर्शेबा (अर्थात्‌ शेबा), मोलादा,

³हसर-शूआल, बाला, एसेम,

⁴एल्‍तोलद, बतूल, होर्मा,

⁵सिक्‍लग, बेथ-मर्काबोत, हसर-सूसा,

⁶बेथ-लबाओत, र शारूहेन। तिनीहरूका बस्‍तीहरूसमेत तेह्र सहरहरू हुन्‌।

⁷ऐन, रिम्‍मोन, एतेर र आशान— तिनीहरूका बस्‍तीहरूसमेत चार सहरहरू हुन्‌—

⁸र ती सहरहरूका वरिपरिका सबै बस्‍तीहरू बालात-बेअर, अर्थात्‌ नेगेव भनिने अर्थात्‌ दक्षिण देशको रामासम्‍मै। शिमियोनका कुलको अधिकार तिनीहरूका वंश-वंशअनुसार यही हो।

⁹शिमियोनका सन्‍तानहरूले यहूदाका सन्‍तानहरूको हिस्‍साबाटै अधिकार पाएका थिए, किनकि यहूदाका सन्‍तानहरूलाई तिनीहरूलाई चाहिएकोभन्‍दा बढ्‌ता भाग परेको थियो। यसकारण शिमियोनका सन्‍तानहरूले यहूदाका भागको सिमानाभित्रै नै अधिकार पाएका थिए।

¹⁰तेस्रो चिट्ठा जबूलूनका सन्‍तानहरूका नाउँमा तिनीहरूका वंश-वंशअनुसार यसरी निस्‍क्‍यो: तिनीहरूका अधिकारको सिमाना सारीदसम्‍म भयो।

¹¹अनि तिनीहरूको सिमाना पश्‍चिमतिर मरलासम्‍म बढ़ेर दब्‍बेशेतसम्‍म पुगी योक्‍नामका अगाड़िको खोल्‍सासम्‍म पुगेको थियो।

¹²त्‍यो सिमाना सारीदबाट फेरि पूर्वपट्टि किस्‍लोथतबोरको सिमानासम्‍म पूर्वतिर मोड़िएको थियो। त्‍यो दाबरतमा निस्‍केर यापीसम्‍म चढ़ेर गएको थियो।

¹³त्‍यहाँबाट त्‍यो पूर्वतिर लागेर गात-हेपेर र इथ-कासीनसम्‍म छिचली रिम्‍मोनसम्‍म पुगेर नेआतिर गएको थियो।

¹⁴अनि त्‍यो सिमाना हन्‍नतोनतिर उत्तर मोड़िएर यिप्‍ताहएलको बेँसीमा पुगेको थियो।

¹⁵त्‍यस सिमानाभित्र काथाथ, नहलल, शिम्रोन, इदलाह र बेथलेहेम पनि थिए। तिनीहरूका बस्‍तीहरूसमेत बाह्र सहरहरू हुन्‌।

¹⁶तिनीहरूका वंश-वंशअनुसार जबूलूनका कुलका अधिकारका सहरहरू तिनका बस्‍तीहरूसमेत यी नै हुन्‌।

¹⁷चौथो चिट्ठा इस्‍साखारका सन्‍तानहरूका नाउँमा तिनीहरूका वंश-वंशअनुसार यसरी निस्‍क्‍यो:

¹⁸तिनीहरूको सिमाना यिजरेल, कसुल्‍लोत, शूनेम,

¹⁹हपरैम, शीओन, अनाहारत,

²⁰रब्‍बीत, किश्‍योन, एबेस,

²¹रेमेत, एन-गन्‍नीम, एन-हद्दा र बेथ-पसेस भएर

²²सो सिमाना तबोर, शहसूमा र बेथ-शेमेशसम्‍म पुगेर यर्दनमा टुङ्गिएको थियो। तिनीहरूका बस्‍तीहरूसमेत सोह्र सहरहरू हुन्‌।

²³तिनीहरूका वंश-वंशअनुसार इस्‍साखारका कुलको अधिकारका सहरहरू तिनका बस्‍तीहरूसमेत यी नै हुन्‌।

²⁴पाँचौँ चिट्ठा आशेरका कुलको निम्‍ति तिनीहरूका वंश-वंशअनुसार यसरी निस्‍क्‍यो:

²⁵तिनीहरूको सिमाना हेल्‍कत, हली, बेतेन, अक्षाप,

²⁶अल्‍लम्‍मेलेक, अमाद, मिशाल, र पश्‍चिम कर्मेलतिर शीहोरलिब्‍नातसम्‍म पुगेको थियो।

²⁷अनि त्‍यो पूर्वतिर मोड़िएर बेथ-दागोनतिर लागी जबूलून र यिप्‍ताह-एलको बेँसीसम्‍म पुगेको थियो, र बेथ-एमेक र नीएलको उत्तरतिर गएर त्‍यो बायाँ हातपट्टि काबूलमा निस्‍केको थियो।

²⁸त्‍यो सिमाना एब्रोन, रहोब, हम्‍मोन र कना भएर महा-सीदोनसम्‍म पुगेको थियो।

²⁹अनि त्‍यो सिमाना रामा र पर्खाल भएको टुरोस सहरतिर मोड़िएको थियो। त्‍यो सिमाना फेरि होसातिर मोड़िएर अक्‍जीब, उम्‍मा, अपेक र रहोबका नजिकको समुद्रमा टुङ्गिएको थियो।

³⁰तिनीहरूका बस्‍तीहरूसमेत बाईस सहरहरू हुन्‌।

³¹तिनीहरूका वंश-वंशअनुसार आशेरका कुलको अधिकारका सहरहरू तिनका बस्‍तीहरूसमेत यी नै हुन्‌।

³²छैटौँ चिट्ठा नप्‍तालीका कुलको निम्‍ति तिनीहरूका वंश-वंशअनुसार यसरी निस्‍क्‍यो:

³³तिनीहरूको सिमाना हेलेप र सानन्‍नीममा भएको ठूलो रूखदेखि, अदामी-नेकेब र यब्‍नेल छिचली लक्‍कूमसम्‍म भएर यर्दनमा टुङ्गिएको थियो।

³⁴अनि सो सिमाना पश्‍चिमतिर अज्‍नोथ-तबोरपट्टि मोड़िएर, त्‍यहाँबाट हुक्‍कोकमा निक्‍लेको थियो, र त्‍यो दक्षिणतिर जबूलूनसम्‍म, पश्‍चिमतिर आशेरसम्‍म र पूर्वतिर यर्दनसम्‍म पुगेको थियो।

³⁵पर्खाल भएका सहरहरूचाहिँ सिद्दीम, सेर, हम्‍मत, रक्‍कत, किन्‍नरेत,

³⁶अदामा, रामा, हासोर,

³⁷केदेश, एद्रई, एन-हासोर,

³⁸यिरोन, मिग्‍दलएल, होरेम, बेथ-अनात र बेथ-शेमेश थिए। तिनीहरूका बस्‍तीहरूसमेत उन्‍नाईस सहरहरू हुन्‌।

³⁹तिनीहरूका वंश-वंशअनुसार नप्‍तालीका कुलको अधिकारका सहरहरू तिनका बस्‍तीहरूसमेत यी नै हुन्‌।

⁴⁰सातौँ चिट्ठा दानका कुलको निम्‍ति

⁴¹तिनीहरूका वंश-वंशअनुसार यसरी निस्‍क्‍यो: तिनीहरूका अधिकारको सिमाना सोरा, एश्‍तोल, इर-शेमेश,

⁴²शालवीन, अय्‍यालोन, इत्‍ला,

⁴³एलोन, तिम्‍ना, एक्रोन,

⁴⁴एल्‍तके, गिब्‍बतोन, बालात,

⁴⁵यहूद, बने-बरक, गात-रिम्‍मोन,

⁴⁶मे-यरकोन र रक्‍कोन, साथै योप्‍पाको सिमानासम्‍म थियो।

⁴⁷तर दानका खलकहरूलाई आफ्‍नो भूभागमाथि अधिकार जमाउन गाह्रो भएको थियो, यसर्थ दानका खलकहरू लेशेममा गएर त्‍यससँग युद्ध गरेर त्‍यसलाई तरवारले नाश गरी कब्‍जा गरे, र त्‍यहाँ बसेर लेशेमलाई आफ्‍ना पुर्खा दानको नाउँअनुसार दान नाउँ राखे।

⁴⁸तिनीहरूका वंश-वंशअनुसार दानका कुलको अधिकारका सहरहरू तिनका बस्‍तीहरूसमेत यी नै हुन्‌।

⁴⁹यसरी तिनीहरूले अधिकारको निम्‍ति सिमाना-सिमाना छुट्ट्याई देश बन्‍डा गरी सिद्ध्याए। अनि इस्राएलीहरूले नूनका छोरा यहोशूलाई परमप्रभुको आज्ञाअनुसार तिनीहरूका बीचमा अधिकारको एक भाग दिए।

⁵⁰तिनीहरूले तिनलाई तिनले मागेकै, एफ्राइमको पहाड़ी देशको तिम्‍नथ-सेरह जग्‍गा दिए, अनि तिनले सहर बसालेर त्‍यहाँ बसे।

⁵¹पूजाहारी एलाजार, नूनका छोरा यहोशू र इस्राएलका कुलनायकहरूले परमप्रभुको सामुन्‍ने शीलोमा भेट हुने पालको ढोकामा बसेर चिट्ठा हाली बन्‍डा गरेका अधिकारका सिमाना यी नै हुन्‌। यसरी तिनीहरूले देश बन्‍डा दिने काम सिद्धयाए।