Read Nepali New Revised Version, 2012 यहोशू 3 Bible Online

यहोशू 3 - Nepali New Revised Version, 2012 bible

यहोशू 3

¹यहोशू बिहान सखारै उठे, र तिनी र सबै इस्राएलीहरू शित्तीम छोड़ेर यर्दनमा आए, जहाँ पारि तर्नभन्‍दा पहिले तिनीहरू वास बसे।

²तीन दिनपछि अधिकृतहरू छाउनीका बीच-बीचमा गए,

³र मानिसहरूलाई यसो भनेर आज्ञा गरे, “जब तिमीहरूले परमप्रभु आफ्‍ना परमेश्‍वरको करारको सन्‍दूक, र त्‍यो बोकेर लैजाने पूजाहारीहरू र लेवीहरूलाई देख्‍छौ, तब तिमीहरू आ-आफ्‍नो ठाउँ छोड़ेर त्‍यसको पछि लाग।

⁴यसरी जानुपर्ने बाटो तिमीहरूले थाहा पाउँछौ— किनभने त्‍यो बाटो तिमीहरू पहिले हिँड़ेका छैनौ। तर तिमीहरू र त्‍यसको बीचमा करीब एक हजार मिटरको अन्‍तर राख। त्‍यसको नजिक नआओ।”

⁵यहोशूले मानिसहरूलाई भने, “तिमीहरू आफैलाई पवित्र बनाओ, किनकि भोलि तिमीहरूका बीचमा परमप्रभुले उदेकका काम गर्नुहुनेछ।”

⁶यहोशूले पूजाहारीहरूलाई यसो भने, “करारको सन्‍दूक उठाएर मानिसहरूका अगिअगि हिँड़।” तब तिनीहरूले करारको सन्‍दूक उठाए र मानिसहरूका अगिअगि हिँड़े।

⁷अनि परमप्रभुले यहोशूलाई भन्‍नुभयो, “जसरी म मोशाको साथमा थिएँ त्‍यसरी नै म तेरो साथमा पनि छु भनी यिनीहरूले थाहा पाउनलाई आजको दिनदेखि सारा इस्राएलीहरूको नजरमा तँलाई उठाउनेछु।

⁸करारको सन्‍दूक बोक्‍ने पूजाहारीहरूलाई तैंले यस्‍तो आज्ञा गर्नू, ‘तिमीहरू यर्दनका पानीको किनारमा आइपुग्‍नासाथ यर्दनमा खड़ा रहनू’।”

⁹यहोशूले इस्राएलीहरूलाई भने, “यता आओ, र परमप्रभु तिमीहरूका परमेश्‍वरका वचन सुन।

¹⁰“जीवित परमेश्‍वर तिमीहरूका बीचमा हुनुहुन्‍छ र उहाँले निश्‍चय नै तिमीहरूका सामुन्‍नेबाट कनानी, हित्ती, हिव्‍वी, परिज्‍जी, गिर्गाशी, एमोरी र यबूसीहरूलाई धपाउनुहुनेछ भन्‍ने तिमीहरूले यसैबाट थाहा पाउनेछौ।

¹¹हेर, सारा पृथ्‍वीका परमप्रभुका करारको सन्‍दूक तिमीहरूका अगिअगि यर्दनमा जानेछ।

¹²अब इस्राएलका कुलहरूबाट बाह्र पुरुष, कुलैपिच्‍छे एक-एक पुरुष गरी छान।

¹³जब सारा पृथ्‍वीका परमप्रभुका करारको सन्‍दूक बोक्‍ने पूजाहारीहरूका पैताला यर्दनको पानीमा पर्छ, त्‍यही बेला माथिदेखि बगेर आउने यर्दनको पानी थामिनेछ, र रास लागेर अड़िरहनेछ।”

¹⁴यसकारण जब यर्दन तर्नलाई मानिसहरूले आ-आफ्‍ना पालहरू उठाए, पूजाहारीहरू करारको सन्‍दूक बोकेर मानिसहरूका अगि लागे।

¹⁵कटनीको अवधिभरि यर्दनमा बाढ़ी आइरहन्‍छ। तापनि सन्‍दूक बोक्‍ने पूजाहारीहरू यर्दनमा आइपुगेर तिनीहरूका खुट्टाले किनारको पानीमा छुने बित्तिकै

¹⁶माथिबाट आएको पानी धेरै पर, सार्तानको नजिक आदम भनिने सहरनेरै थामिएर एउटा रास भएर अड़्यो, र अराबाको समुद्र, अर्थात्‌ खारा समुद्रमा [1] बगेर जाने पानी पूर्ण रूपले काटिएर सुक्‍यो। यसर्थ मानिसहरू यरीहोको पारिबाट पार तरे।

¹⁷सारा इस्राएलीहरू ओबानो जमिनमाथिबाट तरेर त्‍यस जातिका सबै मानिसहरू यर्दन पार नगरुञ्‍जेलसम्‍म परमप्रभुका करारको सन्‍दूक बोक्‍ने पूजाहारीहरू यर्दनको बीचमा ओबानो जमिनमा स्‍थिर भई खड़ा रहे।