Read Nepali New Revised Version, 2012 यहोशू 4 Bible Online

यहोशू 4 - Nepali New Revised Version, 2012 bible

यहोशू 4

¹जब सबै मानिसहरू पार तरिसके, तब परमप्रभुले यहोशूलाई भन्‍नुभयो,

²“मानिसहरूबाट बाह्र जना पुरुष, कुलैपिच्‍छे एक-एक पुरुष गरी लिएर

³तिनीहरूलाई यसो भन्‍ने आज्ञा दे, ‘यर्दन नदीको बीचमा पूजाहारीहरूका खुट्टाले टेकेको ठाउँबाट बाह्र वटा ढुङ्गा लिई तिमीहरूका साथमा बोकेर ल्‍याओ, र आज राती तिमीहरू जहाँ डेरा हालेर बस्‍छौ त्‍यहीँ राखिदेओ’।”

⁴यसकारण इस्राएलीहरूबाट यहोशूले कुलैपिच्‍छेको एक-एक गरी चुनेका बाह्र जनालाई बोलाए।

⁵यहोशूले तिनीहरूलाई भने, “तिमीहरू परमप्रभु आफ्‍ना परमेश्‍वरका सन्‍दूकको सामु यर्दन नदीको बीचमा जाओ, र इस्राएलीहरूका कुलको गन्‍तीअनुसार हरेकले एक-एक वटा ढुङ्गा आफ्‍नो काँधमा राखेर ल्‍याओ।

⁶तिमीहरूका बीचमा यो एक चिनो रहोस्, र पछि भविष्‍यमा तिमीहरूका छोराछोरीहरूले, ‘यी ढुङ्गाहरूको अर्थ के हो?’ भनेर सोध्‍दा

⁷तिमीहरूले तिनीहरूलाई यसो भन्‍नू, ‘परमप्रभुका करारका सन्‍दूकको सामु यर्दनको पानी रोकिएको थियो। यर्दन पार गर्दा यर्दनको पानी रोकिएको थियो। यी ढुङ्गाहरू इस्राएलीहरूका निम्‍ति सदाका स्‍मारकको रूपमा रहनेछन्‌।”

⁸परमप्रभुले यहोशूलाई भन्‍नुभएअनुसार यहोशूको आदेश पालन गरेर इस्राएलका कुलको संख्‍याअनुसार इस्राएलीहरूले यर्दनको बीचबाट ढुङ्गाहरू ल्‍याए र तिनीहरू बसेका ठाउँमा राखे।

⁹करारको सन्‍दूक बोक्‍ने पूजाहारीहरूका खुट्टाले टेकेको ठाउँ, अर्थात्‌ यर्दनको बीचबाट ल्‍याइएका बाह्र वटा ढुङ्गा यहोशूले उभ्‍याए। ती आजको दिनसम्‍म त्‍यहीँ छन्‌।

¹⁰मोशाले यहोशूलाई अह्राएअनुसार, मानिसहरूलाई सुनाउनलाई परमप्रभुले यहोशूलाई दिनुभएको आज्ञाका सबै काम पूरा नहोउञ्‍जेल सन्‍दूक बोक्‍ने पूजाहारीहरू यर्दनको बीचमै उभिरहे, र मानिसहरू चाँड़ो-चाँड़ो गरेर पार तरे।

¹¹अनि जब सबै मानिसहरू पार तरिसके, तब परमप्रभुको सन्‍दूक र पूजाहारीहरू पनि मानिसहरूका सामुन्‍ने पार तरे।

¹²मोशाले तिनीहरूलाई भनेबमोजिम रूबेनका सन्‍तान, गादका सन्‍तान र मनश्‍शेको आधा कुल पनि इस्राएलीहरूका सामुन्‍ने हातहतियार भिरेर तरे।

¹³करीब चालीस हजार जति लड़ाइँको लागि हातहतियार भिरेका पुरुषहरू लड़ाइँ गर्नलाई परमप्रभुको सामु पार तरेर यरीहोको मैदानतिर लागे।

¹⁴त्‍यस दिन सबै इस्राएलीहरूका नजरमा परमप्रभुले यहोशूलाई उचाल्‍नुभयो र तिनीहरूले तिनको जीवनभरि मोशालाई झैँ यहोशूलाई आदर गरे।

¹⁵तब परमप्रभुले यहोशूलाई भन्‍नुभयो,

¹⁶“गवाहीको सन्‍दूक बोक्‍ने पूजाहारीहरूलाई यर्दनबाट उक्‍लिआउनू भनी हुकुम गर्‌।”

¹⁷यसकारण यहोशूले पूजाहारीहरूलाई, “तिमीहरू यर्दनबाट उक्‍लेर आओ,” भन्‍ने हुकुम गरे।

¹⁸परमप्रभुका करारको सन्‍दूक बोक्‍ने पूजाहारीहरू यर्दनको बीचबाट उक्‍लिसकेपछि तिनीहरूका पैतालाले ओबानो भूइँमा टेक्‍ने बित्तिकै यर्दनको पानी आफ्‍नो बाटोमा फर्केर आयो र अघिझैँ किनार ढाकेर बग्‍न थाल्‍यो।

¹⁹पहिलो महिनाको दशौँ दिनमा मानिसहरूले यर्दनबाट उक्‍लेर आई यरीहोको पूर्व सिमानामा गिलगाल भन्‍ने ठाउँमा आफ्‍नो छाउनी बनाए।

²⁰तिनीहरूले यर्दन नदीबाट निकालेर ल्‍याएका ती बाह्र वटा ढुङ्गाहरू यहोशूले गिलगालमा खड़ा गरे।

²¹अनि तिनले इस्राएलीहरूलाई यसो भने, “पछि तिमीहरूका बालबच्‍चाले आफ्‍ना बुबाहरूसँग ‘यी ढुङ्गाहरूको अर्थ के हो?’ भनेर सोधे भने,

²²तिमीहरूले आफ्‍ना बालबच्‍चालाई यसो भनेर बताइदिनू, ‘इस्राएलीहरूले यर्दन नदी सुक्‍खा जमिनमा टेकेर तरेका थिए’।

²³जसरी परमप्रभु तिमीहरूका परमेश्‍वरले लाल समुद्रलाई हामीले पार नगरुञ्‍जेल हाम्रा सामुन्‍ने सुकाउनुभएको थियो, त्‍यसरी नै तिमीहरूका सामुन्‍ने तिमीहरू पार नगरुञ्‍जेल यर्दन नदीको पानी पनि सुकाउनुभएको थियो।

²⁴पृथ्‍वीका सारा मानिसहरूले परमप्रभुका बाहुलीको सामर्थ्‍य थाहा पाऊन्, र तिमीहरूले परमप्रभु आफ्‍ना परमेश्‍वरको भय मान भन्‍ने ध्‍येयले यो सब भएको हो।”