Read Nepali New Revised Version, 2012 यहोशू 5 Bible Online

यहोशू 5 - Nepali New Revised Version, 2012 bible

यहोशू 5

¹यर्दन वारि पश्‍चिम तीरका एमोरीहरूका सबै राजाहरूले र समुद्रको नजिकका कनानीहरूका सबै राजाहरूले, इस्राएलीहरूका निम्‍ति तिनीहरू पार नतरुञ्‍जेल परमप्रभुले यर्दन नदीको पानी सुकाउनुभयो भन्‍ने कुरा जब सुने, तब इस्राएलीहरूको डरले गर्दा उनीहरूको हृदय काम्‍न लाग्‍यो र उनीहरूमा इस्राएलीहरूको सामना गर्ने साहस रहेन।

²त्‍यस बेला परमप्रभुले यहोशूलाई भन्‍नुभयो, “पत्‍थरका कर्दहरू बनाएर फेरि दोस्रो पल्‍ट इस्राएलीहरूलाई खतना गर्‌।”

³तब यहोशूले पत्‍थरका कर्दहरू बनाएर गिबियथ-हाअरालोथमा इस्राएलीहरूको खतना गरे।

⁴यहोशूले खतना गराउनुपरेको कारण यही थियो, कि जति जना मानिसहरू, अर्थात्‌ योद्धाहरू मिश्रदेशबाट आएका थिए, तिनीहरू सबै मिश्रबाट निस्‍केपछि उजाड़-स्‍थानको यात्रामा मरिसकेका थिए।

⁵मिश्रदेशबाट जति निस्‍केर आएका थिए, ती सबैको खतना भएकै थियो। तर मिश्रदेशबाट निस्‍केपछि उजाड़-स्‍थानको यात्रामा जन्‍मेका जति कसैको पनि खतना भएको थिएन।

⁶इस्राएलीहरूले परमप्रभुका आज्ञा नमानेका हुनाले मिश्रदेशबाट निस्‍केर आएका सारा मानिसहरू, अर्थात्‌ योद्धाहरू नष्‍ट नभएसम्‍म तिनीहरू उजाड़-स्‍थानमा चालीस वर्ष हिँड्‌दैरहेथे। किनभने तिनीहरूका पिता-पुर्खाहरूलाई दूध र मह बग्ने देश दिनेछु भनी प्रतिज्ञा गर्नुभएको देश म तिनीहरूलाई देख्‍न दिन्‍नँ भनेर परमप्रभुले प्रण गर्नुभएको थियो।

⁷यसकारण तिनीहरूको स्‍थानमा उहाँले फेरि उत्‍पन्‍न गराउनुभएको सन्‍तान यहोशूले खतना गराए, किनकि तिनीहरू यात्रामा खतना नपाएका हुनाले बेखतनाका थिए।

⁸अनि सबै मानिसहरूको खतना भइसकेपछि तिनीहरू निको नहोउञ्‍जेल छाउनीमा आ-आफ्‍ना ठाउँमा बसे।

⁹अनि परमप्रभुले यहोशूलाई भन्‍नुभयो, “आजको दिन मिश्रको निन्‍दा तिमीहरूबाट मैले गुड़ाइदिएको छु।” यसकारण त्‍यस ठाउँको नाउँ आजको दिनसम्‍म गिलगाल भनिन्‍छ।

¹⁰जब इस्राएलीहरू गिलगालमा छाउनी खड़ा गरी बसे, तब तिनीहरूले चौधौँ दिनको साँझमा यरीहोको मैदानमा नै निस्‍तार-चाड़ मनाए।

¹¹निस्‍तार-चाड़को भोलिपल्‍ट, त्‍यही दिन तिनीहरूले त्‍यस देशको उब्‍जनीबाट अखमिरी रोटी र भुटेको अन्‍न खाए।

¹²तिनीहरूले त्‍यस देशको उब्‍जनीको अन्‍न खाएको भोलिपल्‍टदेखि नै मन्‍न थामियो, र त्‍यसपछि इस्राएलीहरूलाई मन्‍न कहिल्‍यै पनि मिलेन। तर त्‍यस साल तिनीहरूले कनान देशको अन्‍न खाए।

¹³यहोशू यरीहोको नजिक हुँदा तिनले आफ्‍ना आँखा उठाएर हेरे, र आफ्‍नो सामुन्‍ने हातमा नाङ्गो तरवार लिएका एक जना मानिस उभिरहेका रहेछन्‌। यहोशू उनीकहाँ गएर, “तपाईं हामीपट्टि हुनुहुन्‍छ कि हाम्रा शत्रु हुनुहुन्‍छ?” भनेर सोधे।

¹⁴अनि उनले भने, “होइन, तर परमप्रभुको फौजको कप्‍तान भएर म यहाँ आएको हुँ।” तब यहोशूले जमिनमा घोप्‍टो परेर दण्‍डवत्‌ गरे, र उनलाई भने, “मेरा प्रभु, आफ्‍नो दासलाई के भन्‍नुहुन्‍छ?”

¹⁵अनि परमप्रभुका फौजका कप्‍तानले यहोशूलाई भने, “तेरा खुट्टाबाट जुत्ता फुकाल्, किनकि तँ उभिएको ठाउँ पवित्र छ।” अनि यहोशूले त्‍यसै गरे।