Read Nepali New Revised Version, 2012 यहोशू 8 Bible Online

यहोशू 8 - Nepali New Revised Version, 2012 bible

यहोशू 8

¹तब परमप्रभुले यहोशूलाई भन्‍नुभयो, “नडरा, निराश नहो। सारा योद्धालाई साथमा लैजा। उठ्, ऐमाथि लडाइँ गर्‌। हेर्, ऐको राजालाई, त्‍यसको प्रजालाई, त्‍यसको सहर, र त्‍यसको देशलाई मैले तेरो हातमा सुम्‍पेको छु।

²तैंले यरीहो र त्‍यसको राजालाई जे-जसो गरेको थिइस्, ऐ र त्‍यसको राजालाई पनि त्‍यसै गर्नेछस्, केवल त्‍यहाँको धनमाल र त्‍यहाँका पशुहरू तिमीहरूले आफ्‍नो निम्‍ति लिन सक्‍छौ। त्‍यस सहरको पछाड़ितिर ढुकेर बस्‍नू।”

³यसकारण यहोशू सबै योद्धाहरूका साथमा ऐमाथि आक्रमण गर्न जानलाई उठे। यहोशूले तीस हजार सर्वोत्तम योद्धाहरू छानेर तिनीहरूलाई राती नै पठाए।

⁴तिनले तिनीहरूलाई यसो भनेर आज्ञा दिए, “हेर, तिमीहरू त्‍यस सहरको पछिल्‍तिर ढुकिरहनू। सहरबाट धेरै टाढ़ा नजानू, र चनाखो रहनू।

⁵मेरो साथमा रहेका मानिसहरूसँग म सहरतिर बढ्‌नेछु, र जब उनीहरू हाम्रा विरुद्धमा आउनेछन्, तब हामी अघिजस्‍तै उनीहरूले खेद्‌दा भाग्‍नेछौं।

⁶उनीहरूले हामीलाई खेद्‌नेछन्‌ र हामी उनीहरूलाई सहरबाट निकै टाढ़ा निकाली ल्‍याउनेछौं, अनि उनीहरूले भन्‍नेछन्, ‘पहिलेझैँ इस्राएलीहरू हाम्रा सामुन्‍नेबाट भाग्‍दैछन्‌।’ यसैले जब हामी उनीहरूका सामुन्‍नेबाट भाग्‍नेछौं,

⁷तब तिमीहरूले ढुकेको ठाउँबाट उठेर त्‍यो सहर कब्‍जा गर्नू, किनकि परमप्रभु तिमीहरूका परमेश्‍वरले तिमीहरूका हातमा त्‍यो सुम्‍पनुहुनेछ।

⁸जब सहर कब्‍जा गर्नेछौ, तब तिमीहरूले त्‍यसमा आगो लगाइदिनू। परमप्रभुको वचनअनुसार तिमीहरूले गर्नू। हेर, मैले तिमीहरूलाई यी आज्ञा दिएको छु।”

⁹यसरी यहोशूले तिनीहरूलाई पठाए, र तिनीहरू गएर ऐको पश्‍चिमतिर बेथेल र ऐको बीचमा ढुकी बसे। तर यहोशूचाहिँ त्‍यो रात मानिसहरूका साथमा रहे।

¹⁰यहोशू बिहान सखारै उठे, र मानिसहरूलाई भेला गराएर इस्राएलीहरूका अगुवाहरूसमेत तिनीहरूका अगिअगि ऐतिर गए।

¹¹तिनीसँग भएका सबै योद्धाहरू सहरको सामुन्‍ने नजिकै आए, र ऐको उत्तरतिर पाल टाँगे। तिनीहरूका र ऐको बीचमा एउटा बेँसी थियो।

¹²यहोशूले पाँच हजार जति मानिसहरू लिएर सहरको पश्‍चिमतिर, बेथेल र ऐको बीचमा मानिसहरूलाई ढुक्‍न राखे।

¹³तिनीहरूले उत्तरपट्टि र ढुकेर बस्‍नेहरूलाई चाहिँ सहरको पश्‍चिमपट्टि गराए। यहोशूले चाहिँ बेँसीमा नै रात बिताए।

¹⁴जब ऐका राजाले यो देखे तब उनी र सहरका सबै मानिसहरू सबेरै उठेर इस्राएलीहरूका विरुद्धमा लड़ाइँ गर्न तोकिएको ठाउँमा अराबाको सामु हतारसाथ निस्‍के। तर सहरको पछिल्‍तिर आफ्‍नो विरुद्धमा ढुकेर बसेका छन्‌ भन्‍ने उनलाई थाहा थिएन।

¹⁵तब यहोशू र सबै इस्राएलीहरू उनीहरूका सामुन्‍ने हारेका भान पारेर उजाड़-स्‍थानको बाटो भागे।

¹⁶यिनीहरूलाई खेद्‌नलाई त्‍यस सहरमा भएका सारा मानिसहरू बोलाइए, र उनीहरू यहोशूको पछिपछि खेद्‌दैगए, र सहरदेखि धेरै टाढ़ा निक्‍लिआए।

¹⁷इस्राएलीहरूका पछि नलागेको ऐ र बेथेलमा एक जना मानिस पनि थिएन। उनीहरूले सहर खुला छोड़ेर इस्राएलीहरूलाई खेदे।

¹⁸तब परमप्रभुले यहोशूलाई भन्‍नुभयो, “तेरो हातमा भएको भाला ऐतिर पसार्, किनकि म त्‍यो तेरो हातमा दिनेछु।” तब यहोशूले आफ्‍नो हातमा भएको भाला सहरतिर पसारे।

¹⁹तिनले हात पसार्ने बित्तिकै ढुकेर बस्‍ने मानिसहरू झट्टै आ-आफ्‍नो ठाउँबाट उठे, र दौड़ेर सहरभित्र पसेर त्‍यो कब्‍जा गरे, र तुरुन्‍तै त्‍यसमा आगो लगाए।

²⁰जब ऐका मानिसहरूले पछि फर्केर हेरे, तब सहरको धूवाँ आकाशतिर उठिरहेको उनीहरूले देखे, तर उनीहरूका लागि यताउता भाग्‍ने मौका नै रहेन, किनभने उजाड़-स्‍थानतिर भाग्‍ने इस्राएलीहरू खेद्‌नेहरूतिर फर्केर जाइलागे।

²¹किनकि जब यहोशू र सारा इस्राएलीहरूले ती ढुकेर बस्‍नेहरूले सहर कब्‍जा गरेका र सहरको धूवाँ मास्‍तिर उठिरहेको देखे, तब तिनीहरूले फर्केर ऐका मानिसहरूलाई आक्रमण गरे।

²²उनीहरूका विरुद्धमा ढुकेर बसेका मानिसहरू पनि सहरबाट निस्‍केर आए। यसरी कोही उनीहरूका यतापट्टि र कोही उतापट्टि भएर उनीहरू इस्राएलीहरूका बीचमा परे, र इस्राएलीहरूले तिनीहरू एक जनालाई पनि उम्‍कन र बाँच्‍न नदिई मारे।

²³तर ऐका राजालाई तिनीहरूले जीवितै समातेर यहोशूकहाँ ल्‍याए।

²⁴इस्राएलीहरूले ऐका सबै बासिन्‍दाहरूलाई आफूहरूलाई खेदेको मैदान र उजाड़-स्‍थानमा खतम गरे, र उनीहरू सबैलाई तरवारले निमिट्यान्‍न पारे। तब सबै इस्राएलीहरू ऐमा फर्केर त्‍यसमा भएकाहरूलाई पनि नाश गरे।

²⁵त्‍यस दिन मारिएका पुरुष र स्‍त्री दुवै गरी जम्‍मा बाह्र हजार थिए, ऐका सब मानिसहरू त्‍यत्ति नै थिए।

²⁶किनकि यहोशूले ऐका सारा बासिन्‍दाहरू नाश नभएसम्‍म आफूले भाला समातेर पसारेको हात बिसाएनन्‌।

²⁷तर पशु र सहरको धनमाल मात्रै, परमप्रभुले यहोशूलाई आज्ञा गर्नुभएबमोजिम, इस्राएलीहरूले आफ्‍नै निम्‍ति लिए।

²⁸यसरी यहोशूले ऐलाई जलाएर ध्‍वंसको रास बनाइदिए, जो आजसम्‍म छँदैछ।

²⁹अनि तिनले ऐका राजालाई साँझसम्‍म एउटा रूखमा झुण्‍ड्याइराखे र सूर्यास्‍त हुँदा यहोशूको आज्ञाबमोजिम तिनीहरूले त्‍यसको लाश रूखबाट तल झारेर सहरको ढोकाभित्र पस्‍ने ठाउँमा फालिदिए, र त्‍यसमाथि ढुङ्गाको थुप्रो लगाइदिए, जो आजसम्‍मै छ।

³⁰यहोशूले परमप्रभु इस्राएलका परमेश्‍वरको निम्‍ति एबाल डाँड़ामा

³¹परमप्रभुका दास मोशाले इस्राएलीहरूलाई आज्ञा गरेबमोजिम र मोशाले दिएको व्‍यवस्‍थाको पुस्‍तकमा लेखिएअनुसार, नकाटेको, अर्थात्‌ फलामले नछोएका ढुङ्गाहरूको एउटा वेदी बनाए, र त्‍यसमा तिनीहरूले परमप्रभुको निम्‍ति होमबलि चढ़ाए, र मेलबलि पनि चढ़ाए।

³²यहोशूले इस्राएलीहरूका सामुन्‍ने मोशाले लेखेको व्‍यवस्‍थाको नकल पत्‍थरहरूमा खोपे।

³³इस्राएलीहरूलाई आशीर्वाद दिनुपर्छ भनी परमप्रभुका दास मोशाले पहिले नै आज्ञा दिएबमोजिम, परदेशी, स्‍वदेशी, सारा इस्राएली, तिनीहरूका धर्म-गुरुहरू, अधिकारीहरू, न्‍यायकर्ताहरूसमेत परमप्रभुका, करारको सन्‍दूक बोक्‍ने लेवी पूजाहारीहरूका सामुन्‍ने सन्‍दूकको दुईतिर आधा एबाल डाँड़ाको सामु र अर्को आधा गीरीज्‍जीम डाँड़ाको सामु खड़ा भए।

³⁴पछिबाट आशिष्‌ र सरापको विषयमा व्‍यवस्‍थाका सबै वचन, जो व्‍यवस्‍थाको पुस्‍तकमा लेखिएका छन्, सो यहोशूले पढ़ेर सुनाए।

³⁵जति कुराको मोशाले आज्ञा दिएका थिए तिनीहरूमा यहोशूले इस्राएलका सारा समाज अन्‍तर्गत स्‍त्रीहरू, केटाकेटीहरू र तिनीहरूका साथमा रहने परदेशीहरूका सामुन्‍ने नपढ़ेको कुरा कुनै पनि रहेन।