Read Nepali New Revised Version, 2012 यहोशू 9 Bible Online

यहोशू 9 - Nepali New Revised Version, 2012 bible

यहोशू 9

¹जब यर्दन पारि पहाड़ र तराईमा, र लेबनानसम्‍म महासमुद्रको [1] किनारमा बस्‍ने हित्ती, एमोरी, कनानी, परिज्‍जी, हिव्‍वी र यबूसीहरूका राजाहरूले यो सब सुने,

²तब उनीहरू एक मनका भएर यहोशू र इस्राएलीहरूसँग युद्ध गर्नलाई जम्‍मा भए।

³तर गिबोनका बासिन्‍दाहरूले यरीहो र ऐलाई यहोशूले गरेका कुरा जब सुने,

⁴तब उनीहरूले एउटा चलाखी अपनाए। उनीहरूले थाङ्‌ने बोराहरू र फाटेका टालेका छालाका दाखमद्यका मशकहरू आफ्‍ना गधामा लदाए।

⁵अनि पुरुषहरूले आफ्‍ना खुट्टामा पुराना टालटुल गरिराखेका जुत्ताहरू र जीउमा पुराना लुगाहरू लगाए। उनीहरूका खानेकुरा पनि सब सुकिसकेका र ढुसी परेका थिए।

⁶तब उनीहरूले गिलगालको छाउनीमा यहोशूकहाँ आएर तिनलाई र इस्राएलीहरूलाई भने, “हामी टाढ़ा देशबाट आएका हौं। यसकारण हामीसँग सन्‍धि गर्नुहोस्‌।”

⁷अनि इस्राएली पुरुषहरूले ती हिव्‍वीहरूलाई भने, “शायद तिमीहरू हाम्रै बीचमा रहने मानिसहरू हौ, तिमीहरूसँग हामीले कसरी सन्‍धि गर्न सक्‍छौं?”

⁸उनीहरूले यहोशूलाई भने, “हामी तपाईंकै दासहरू हौं।” तर यहोशूले उनीहरूलाई सोधे, “तिमीहरू को हौ र कहाँबाट आयौ?”

⁹उनीहरूले तिनलाई भने, “हामी तपाईंका दासहरू धेरै टाढ़ा मुलुकबाट परमप्रभु तपाईंका परमेश्‍वरको नाउँ सुनेर आएका हौं, किनकि हामीले उहाँको कीर्ति र उहाँले मिश्रदेशमा गर्नुभएको कामको वृत्तान्‍त सुनेका छौं,

¹⁰यर्दन पारि एमोरीहरूका दुवै राजा, हेश्‍बोनका राजा सीहोनलाई र अस्‍तारोतवासी बाशानका राजा ओगलाई जे-जे गर्नुभयो, सो सुनेका छौं।

¹¹यसकारण हाम्रा बुढापाका र हाम्रो देशका सबै बासिन्‍दाहरूले हामीलाई यसो भने, ‘तिमीहरूले आफ्‍नो बाटोमा खानेकुरा लिएर उनीहरूलाई भेट्‌न जाओ, र उनीहरूलाई “हामी त तपाईंहरूकै दासहरू हौं, यसकारण अब हामीसँग सन्‍धि गर्नुहोस्‌” भन’।

¹²तपाईंहरूकहाँ निस्‍केर आउने दिन हामीले हाम्रा घरबाट हाम्रो खानेकुराको निम्‍ति यो हाम्रो रोटी तातै लिएर आएका थियौं, तर अब हेर्नुहोस्, यो सुकेर ढुसी परिसकेको छ।

¹³हामीले दाखमद्य भरेका यी छालाका मशकहरू नयाँ नै थिए, तर हेर्नुहोस्, ती फाटिसकेका छन्, र यी हाम्रा लुगाहरू र जुत्ताहरू पनि लामो बाटो भएको हुनाले थोत्रा भइसकेका छन्‌।”

¹⁴ती इस्राएलीहरूले परमप्रभुबाट निर्देशन नमागी उनीहरूको भोजनबाट चाखे।

¹⁵अनि यहोशूले उनीहरूसँग मिलाप गरी उनीहरूलाई जीवितै राखेर सम्‍झौता गरे र समुदायका नायकहरूले पनि शपथद्वारा यसको अनुमोदन गरे।

¹⁶गिबोनीहरूसँग सम्‍झौता गरेको तीन दिनपछि नै उनीहरू त आफ्‍नै छिमेकी रहेछन्, र आफ्‍ना बीचमै रहनेहरू रहेछन्‌ भन्‍ने कुरा इस्राएलीहरूले सुने।

¹⁷यसकारण इस्राएलीहरू हिँड़ेर तेस्रो दिनमा उनीहरूका सहरहरूमा पुगे। उनीहरूका सहरहरू गिबोन, कपीरा, बेरोत र किर्यत-यारीम रहेछन्‌।

¹⁸इस्राएलीहरूले उनीहरूमाथि आक्रमण गरेनन्, किनकि समुदायका नायकहरूले उनीहरूसँग परमप्रभु इस्राएलका परमेश्‍वरको शपथ खाएका थिए। सारा समुदाय नायकहरूका विरुद्धमा गनगनाउन लागे।

¹⁹तर सबै नायकहरूले समुदायका मानिसहरूलाई भने, “हामीले उनीहरूसँग परमप्रभु इस्राएलका परमेश्‍वरको शपथ खाएका छौं। यसकारण अब हामीले उनीहरूलाई छुन सक्‍दैनौं।

²⁰हामीले यसै गर्नुपर्छ: हामी उनीहरूलाई जीवितै रहन दिनेछौं, नत्रता हामीले खाएको शपथले गर्दा हामीमाथि क्रोध आउनेछ।”

²¹अनि ती नायकहरूले भने, “उनीहरूलाई जीवितै राख। तर उनीहरूलाई सबै समुदायको लागि दाउरे र पनेरे भएर जिउन देओ।” यसैले नायकहरूले उनीहरूलाई गरेको प्रतिज्ञाअनुसार सारा समुदायको निम्‍ति उनीहरू दाउरे र पनेरे भए।

²²अनि यहोशूले गिबोनीहरूलाई बोलाएर भने, “वास्‍तवमा तिमीहरू त हामीहरूमध्‍ये बस्‍नेहरू रहेछौ, तर ‘हामी धेरै टाढ़ा देशका हौं’, भनी हामीलाई किन छकायौ?

²³यसकारण अब तिमीहरू श्रापित भएका छौ। तिमीहरू मेरा परमेश्‍वरको घरमा सधैँ दाउरे र पनेरे भएर बस्‍नुपर्नेछ।”

²⁴उनीहरूले यहोशूलाई भने, “परमप्रभु तपाईंका परमेश्‍वरले आफ्‍नो दास मोशालाई यो देश जम्‍मै तपाईंहरूलाई दिने र यस देशका सारा बासिन्‍दाहरूलाई नष्‍ट गर्ने आज्ञा दिनुभएको कुरा हामी तपाईंका दासहरूलाई प्रष्‍ट बताइएको थियो। यसकारण तपाईंसँग आफ्‍नो ज्‍यानको साह्रो डर लागेर हामीले यसो गरेका हौं।

²⁵अब हेर्नुहोस्, हामी तपाईंको हातमा छौं। जसो उचित र भलो लाग्‍छ, हामीसित गर्नुहोस्‌।”

²⁶यसरी यहोशूले इस्राएलीहरूबाट उनीहरूलाई बचाए र तिनीहरूले उनीहरूलाई मारेनन्‌।

²⁷त्‍यस दिन यहोशूले उनीहरूलाई समुदायको निम्‍ति र परमप्रभुले छान्‍नुभएको ठाउँमा उहाँका वेदीको निम्‍ति दाउरे र पनेरे तुल्‍याए। उनीहरू आजको दिनसम्‍म त्‍यस्‍तै छन्‌।