Read Nepali New Revised Version, 2012 २ थेसलोनिकी 2 Bible Online

२ थेसलोनिकी 2 - Nepali New Revised Version, 2012 bible

२ थेसलोनिकी 2

¹भाइ हो, हाम्रा प्रभु येशू ख्रीष्‍टका आगमनको विषयमा र उहाँलाई भेट्‌न हामी एकसाथ भेला हुने विषयमा हामी तिमीहरूलाई बिन्‍ती गर्दछौं,

²कि कुनै अगमवाणी वा वचन वा कुनै पत्रले प्रभुको दिन नजिक आएको छ भनी बतायो भने, ती हामीबाट आएका भन्‍ठानेर तिमीहरूको मन चाँड़ै विचलित नहोस्‌ अथवा तिमीहरू नआत्तिओ।

³कसैले कुनै किसिमले तिमीहरूलाई धोका नदेओस्‌। किनकि पहिले विद्रोह नभएसम्‍म पापको मानिस, अर्थात्‌ सर्वनाशको छोरो प्रकट नभएसम्‍म त्‍यो दिन आउनेछैन।

⁴त्‍यसले ईश्‍वर कहलिएका सबै अथवा पूज्‍य वस्‍तुहरूको विरोध गर्छ र तीभन्‍दा आफैलाई उच्‍च तुल्‍याउँछ, यहाँसम्‍म कि आफैलाई परमेश्‍वर नै घोषणा गरेर परमेश्‍वरको मन्‍दिरमा त्‍यो बस्‍छ।

⁵के तिमीहरूलाई याद छैन, म तिमीहरूसँग छँदा नै मैले यी कुराहरू तिमीहरूलाई भनेको थिएँ?

⁶त्‍यो आफ्‍नो समयमा प्रकट होस्‌ भन्‍ने हेतुले कुन कुराले त्‍यसलाई अहिलेसम्‍म रोकिराखेको छ, यो तिमीहरू जान्‍दछौ।

⁷किनकि अधर्मको रहस्‍यले अघिबाटै काम गरिरहेछ। अहिलेसम्‍म जसले त्‍यसलाई रोकिराख्‍नुभएको छ, उहाँ नहटुञ्‍जेल त्‍यसलाई रोकी नै राख्‍नुहुनेछ।

⁸तब त्‍यस पापको मानिस प्रकट हुनेछ, जसलाई प्रभु येशूले आफ्‍नो मुखको सासले नाश पार्नुहुनेछ, र उहाँका आगमनको प्रकाशले त्‍यसलाई नाश गर्नुहुनेछ।

⁹शैतानको कामकाजबमोजिम पापको मानिस सारा शक्ति र छलपूर्ण चिन्‍हहरू र चमत्‍कारसहित,

¹⁰र नाश हुनेहरूलाई छलमा पार्ने समस्‍त दुष्‍टतासहित आउनेछ, किनकि तिनीहरूले सत्‍यलाई प्रेम गर्न र त्‍यसरी बाँच्‍न इन्‍कार गरे।

¹¹यसैकारण तिनीहरूले झूटा कुरामा विश्‍वास गरून्‌ भनेर परमेश्‍वरले तिनीहरूमाथि एक शक्तिशाली भ्रम पठाउनुहुन्‍छ,

¹²ताकि सत्‍यमाथि विश्‍वास नगर्ने, तर अधार्मिकतामा आनन्‍द मनाउने सबै जना दोषी ठहरिऊन्‌।

¹³प्रभुले प्रेम गर्नुभएका भाइहरू, तिमीहरूका निम्‍ति हामी परमेश्‍वरमा सधैँ धन्‍यवाद चढ़ाउन बाध्‍य छौं, किनकि सुरुदेखि नै पवित्र आत्‍माको पवित्र तुल्‍याउने कामद्वारा र सत्‍यतामाथिको विश्‍वासद्वारा बाँच्‍नलाई परमेश्‍वरले तिमीहरूलाई चुन्‍नुभयो।

¹⁴यसैको निम्‍ति हाम्रो सुसमाचारद्वारा हाम्रा प्रभु येशू ख्रीष्‍टको महिमा प्राप्‍त गर्न उहाँले तिमीहरूलाई बोलाउनुभयो।

¹⁵यसकारण भाइ हो, दह्रिला भई खड़ा होओ, र चाहे मुखको वचनबाट होस्, चाहे हाम्रो पत्रबाट होस्‌ तिमीहरूले जे शिक्षा पाएका छौ तिनलाई थामिराख।

¹⁶अब हामीलाई प्रेम गर्नुहुने र अनुग्रहद्वारा अनन्‍तको सान्‍त्‍वना र उत्तम आशा दिनुहुने हाम्रा प्रभु येशू ख्रीष्‍ट आफैले तथा परमेश्‍वर हाम्रा पिताले,

¹⁷तिमीहरूका हृदयलाई सान्‍त्‍वना देऊन्‌ र हरेक असल काम र वचनमा तिमीहरूलाई स्‍थिर गराऊन्‌।