Read Nepali New Revised Version, 2012 १ तिमोथी 6 Bible Online

१ तिमोथी 6 - Nepali New Revised Version, 2012 bible

१ तिमोथी 6

¹दासत्‍वका जुवामुनि हुने सबैले आ-आफ्‍ना मालिकलाई पूरा सम्‍मानको योग्‍य ठानून्, ताकि परमेश्‍वरको नाउँ र हाम्रो शिक्षाको बदनामी नहोस्‌।

²विश्‍वासी मालिकहरूलाई तिनका कमाराहरूले विश्‍वासमा दाजुभाइ भन्‍दैमा अनादर नगरून्‌। बरु तिनीहरूले उनीहरूको झन्‌ बढ़ी सेवा गरून्, किनभने तिनीहरूका सेवाबाट लाभ पाउनेहरू विश्‍वासी र प्रियहरू नै हुन्‌। यी कर्तव्‍यहरू पालन गर्न सिकाऊ, र आग्रह गर।

³यदि कसैले अरू सिद्धान्‍त सिकाउँछ र हाम्रा प्रभु येशू ख्रीष्‍टको उचित वचन र ईश्‍वरभक्तिअनुसारको शिक्षासँग सहमत हुँदैन भने,

⁴त्‍यो घमण्‍डले फुलेको हुन्‍छ, र त्‍यसले केही जानेको हुँदैन। त्‍यसले व्‍यर्थको वाद-विवाद गर्छ, र एक-एक शब्‍द लिएर झगड़ा गर्न खोजिहिँड्‌छ। यी कुराहरूले डाह, कलह, बदनामी र खराब शङ्काहरू उत्‍पन्‍न गराउँछन्,

⁵र बुद्धि भ्रष्‍ट भएका र सत्‍यबाट अलग भएका मानिसहरूका माझमा कचिङ्गल उठाउँछन्, अनि भक्तिचाहिँ फाइदा उठाउने उपाय हो भनी तिनीहरू ठान्‍छन्‌।

⁶सन्‍तुष्‍टिसहितको भक्ति नै ठूलो लाभ हो।

⁷किनकि हामीले न त यस संसारमा केही ल्‍यायौं न यहाँबाट केही लैजान नै सक्‍छौं।

⁸तर खान र लाउनसम्‍म छ भने हामी त्‍यसैमा सन्‍तुष्‍ट हुनेछौं।

⁹तर धनी हुने इच्‍छा गर्नेहरू परीक्षामा पर्छन्, पासोमा फस्‍छन्‌ र धेरै अर्थहीन र दुःखदायी इच्‍छाहरूमा डुब्‍छन्, जसले मानिसहरूलाई बरबादी र सर्वनाशमा डुबाउँछन्‌।

¹⁰किनभने रुपियाँपैसाको मोह नै सबै किसिमका खराबीको जड़ हो। पैसाको लोभमा परेर कोही-कोही विश्‍वासबाट कुमार्गतिर लागेका छन्, र धेरै पीडाले तिनीहरूका हृदय घोचेका छन्‌।

¹¹तर परमेश्‍वरका जन तिमीले यी सबै त्‍याग, र धार्मिकता, भक्ति, विश्‍वास, प्रेम, स्‍थिरता र नम्रताको लक्ष्य राख।

¹²विश्‍वासको उत्तम लड़ाइँ लड़। अनन्‍त जीवन पक्रिराख। यसैमा तिमीलाई बोलावट भएको थियो, जब तिमीले धेरै साक्षीहरूका उपस्‍थितिमा तिम्रो विश्‍वासको असल साक्षी दिएका थियौ।

¹³सबै थोकलाई जीवन दिनुहुने परमेश्‍वर र पन्‍तियस पिलातसको अगाडि असल गवाही दिनुहुने ख्रीष्‍ट येशूको सामने,

¹⁴म तिमीलाई आदेश दिँदछु, कि प्रभु येशू ख्रीष्‍ट देखा नपरुञ्‍जेल यस आज्ञालाई कलङ्क र अपवादबाट अलग राख।

¹⁵अनि धन्‍य र सर्वोच्‍च, राजाहरूका महाराजा, प्रभुहरूका महाप्रभुले उचित समयमा ख्रीष्‍टको आगमनलाई प्रकट गर्नुहुनेछ।

¹⁶उहाँमा नै अमरत्‍व छ, र उहाँ त्‍यस ज्‍योतिमा वास गर्नुहुन्‍छ जसको नजिक कोही जान सक्‍दैन। उहाँलाई कुनै मानिसले कहिल्‍यै देखेको छैन न देख्‍न सक्‍छ। उहाँलाई नै आदर र पराक्रम सदासर्वदा होस्‌। आमेन।

¹⁷यस संसारका धनीहरूलाई घमण्‍डी नहुने आज्ञा देऊ, र अनिश्‍चित सम्‍पत्तिमा होइन तर हामीलाई हरेक थोक प्रशस्‍तसँग उपभोग गर्न दिनुहुने परमेश्‍वरमाथि तिनीहरूले आशा राखून्‌।

¹⁸तिनीहरूले असल कार्य गरून्, र असल कामहरूमा धनी, उदार-चित्त र दानी होऊन्‌।

¹⁹यसरी आफ्‍नै लागि भविष्‍यको असल जग बसाल्‍न सकून्, ताकि तिनीहरूले त्‍यो जीवन पक्रिराखून्‌ जो साँच्‍ची नै जीवन हो।

²⁰तिमोथी, जे तिमीलाई सुम्‍पिएको छ, त्‍यो सुरक्षित राख। भक्तिहीन गनथन र खण्‍डनहरू, जो झूटो ज्ञान हो, तिनलाई परित्‍याग गर।

²¹यी कुराहरूका पछि लागेर कति जना आफ्‍नो विश्‍वासको लक्ष्यबाट चुकेर गएका छन्‌। तिमीसँग अनुग्रह रहोस्‌।