Read Nepali New Revised Version, 2012 २ तिमोथी 2 Bible Online

२ तिमोथी 2 - Nepali New Revised Version, 2012 bible

२ तिमोथी 2

¹यसकारण तिमी, मेरो बालक, ख्रीष्‍ट येशूमा भएको अनुग्रहमा बलियो होऊ।

²धेरै जना साक्षीहरूका उपस्‍थितिमा तिमीले मबाट जे कुरा सुनेका छौ, ती अरूहरूलाई पनि सिकाउन सक्‍ने विश्‍वासयोग्‍य मानिसहरूलाई सुम्‍पिदेऊ।

³ख्रीष्‍ट येशूका असल सिपाहीझैँ दुःख-भोगमा हामीसँग सहभागी होऊ।

⁴सेनामा भर्ना भएको सिपाही अरू धन्‍धामा अल्‍झँदैन, किनकि उसलाई भर्ना गर्नेलाई सन्‍तुष्‍ट पार्नु नै उसको लक्ष्य हुन्‍छ।

⁵प्रतियोगितामा नियमबमोजिम भाग नलिएसम्‍म कुनै खेलाडीले पनि इनाम पाउन सक्‍दैन।

⁶परिश्रम गर्ने किसानले नै बालीको पहिलो हिस्‍सा पाउनुपर्दछ।

⁷म के भन्‍दछु त्‍यो विचार गर, किनभने प्रत्‍येक कुरामा प्रभुले तिमीलाई समझ दिनुहुनेछ।

⁸मरेकाहरूबाट जीवित हुनुभएको दाऊद वंशका येशू ख्रीष्‍टलाई सम्‍झना गर, मैले प्रचार गरेको सुसमाचार यही हो।

⁹त्‍यही सुसमाचार, जसको निम्‍ति म कष्‍ट भोगिरहेछु र अपराधीजस्‍तै साङ्‌लामा बाँधिएको छु। तर परमेश्‍वरको वचन त साङ्‌लामा बाँधिँदैन।

¹⁰यसकारण चुनिएकाहरूका खातिर म हरेक कुरा सहन्‍छु, ताकि तिनीहरूले पनि अनन्‍त महिमासहित ख्रीष्‍ट येशूमा भएको मुक्ति प्राप्‍त गर्न सकून्‌।

¹¹यो भनाइ निश्‍चित छ, यदि हामी उहाँसँग मरेका छौं भने, हामी पनि उहाँसँगै जिउनेछौं,

¹²हामीले सह्यौं भने, हामी पनि उहाँसँगै राज्‍य गर्नेछौं, हामीले उहाँलाई इन्‍कार गर्‍यौं भने, उहाँले पनि हामीलाई इन्‍कार गर्नुहुनेछ,

¹³हामी अविश्‍वासी छौं भने, उहाँ विश्‍वासयोग्‍य रहनुहुनेछ, किनकि उहाँले आफैलाई इन्‍कार गर्न सक्‍नुहुन्‍न।

¹⁴यो कुरा तिनीहरूलाई सम्‍झाइदेऊ, र प्रभुको सामु आज्ञा देऊ, कि तिनीहरूले शब्‍दहरूका विषयमा तर्कवितर्क नगरून्, जसले भलाइ गर्दैन, तर केवल सुन्‍नेहरूलाई हानि पुर्‍याउँछ।

¹⁵शर्माउन नपर्ने र सत्‍यको वचनलाई ठीकसँग प्रयोग गर्ने कामदारजस्‍तै आफूले आफूलाई परमेश्‍वरमा ग्रहणयोग्‍य तुल्‍याउने भरमग्‍दूर प्रयत्‍न गर।

¹⁶भक्तिहीन बकबक त्‍याग, किनकि यसले मानिसहरूलाई झन्‌ बढ़ी भक्तिहीनतातिर लानेछ।

¹⁷तिनीहरूको बातचीत सइनको घाउजस्‍तो गाडिँदैजानेछ। तिनीहरूमध्‍ये हुमेनियस र फिलेतस हुन्‌।

¹⁸पुनरुत्‍थान अघि नै भइसकेको छ भनेर यिनीहरू सत्‍यबाट तर्किएका छन्‌। कति जनाको विश्‍वासलाई यिनीहरूले खलबल्‍याइरहेका छन्‌।

¹⁹तर परमेश्‍वरको दृढ़ जग खड़ै रहन्‍छ, र त्‍यसमा यो छाप लागेको छ, “प्रभुले आफ्‍ना जतिलाई चिन्‍नुहुन्‍छ,” र “प्रभुको नाउँ लिने जति हरेक अधर्मबाट टाढ़ै रहोस्‌।”

²⁰ठूलो घरमा सुन र चाँदीका भाँड़ाहरू मात्र हुँदैनन्, तर काठ र माटोका पनि हुन्‍छन्, कुनै आदर र कुनै अनादरका निम्‍ति।

²¹जे कुरो अनादरको छ, यदि कसैले त्‍यसबाट आफूलाई शुद्ध पार्‍यो भने त्‍यो आदरका कामको लागि एउटा पात्र बन्‍नेछ, र घरका मालिकको निम्‍ति चोखो, उपयोगी, र कुनै पनि असल कामको निम्‍ति तयार रहनेछ।

²²यसकारण जवानीका अभिलाषाहरू त्‍याग, र शुद्ध हृदयले प्रभुको नाउँ लिनेहरूका साथसाथै धार्मिकता, विश्‍वास, प्रेम र शान्‍तिको लक्ष्य राख।

²³तर मूर्ख र बेसमझका सवाल जवाफलाई इन्‍कार गर— तिमी जान्‍दछौ यिनीहरूबाट झगड़ा हुन्‍छ।

²⁴प्रभुको सेवक झगड़ालु हुनुहुँदैन, तर हरेकको लागि दयालु, योग्‍य शिक्षक, सहनशील,

²⁵र नम्रतासाथ आफ्‍ना विरोधीहरूलाई सुधार्ने हुनुपर्दछ, र शायद परमेश्‍वरले तिनीहरूलाई पश्‍चात्ताप गर्ने, सत्‍यतालाई बुझ्‍ने मन दिनुहुनेछ,

²⁶र तिनीहरू चेतना पाएर दियाबलसको पासोबाट उम्‍कनेछन्, जसले तिनीहरूलाई त्‍यसको इच्‍छाअनुसार चल्‍नलाई कैदी बनाएको छ।