Read Nepali New Revised Version, 2012 न्यायकर्ताहरू 10 Bible Online

न्यायकर्ताहरू 10 - Nepali New Revised Version, 2012 bible

न्यायकर्ताहरू 10

¹अबीमेलेकको पालोपछि इस्‍साखारको एक जना मानिस, पुवाका छोरा दोदोका नाति, एफ्राइमको पहाड़ी देशको शामीरमा बस्‍ने तोला इस्राएललाई छुटाउनलाई खड़ा भए।

²तिनी तेईस वर्षसम्‍म इस्राएलका अगुवा [1] भए, अनि जब तिनी मरे तब शामीरमा गाड़िए।

³तिनीपछि गिलादी याईर आए। तिनी बाईस वर्षसम्‍म इस्राएलका अगुवा भए।

⁴तिनका तीस जना छोराहरू थिए, जो तीस वटा गधामा सवार हुन्‍थे। गिलाद देशमा तिनीहरूका तीस वटा सहरहरू थिए, जो आजको दिनसम्‍म पनि हब्‍बात-याईर कहलाइन्‍छ।

⁵याईर मरेपछि तिनी कामोनमा गाड़िए।

⁶फेरि इस्राएलीहरूले अराम, सीदोन र मोआबका अम्‍मोनीहरू र पलिश्‍तीहरूका देवता-देवीहरू तथा बाल र अश्‍तोरेत देवताहरूलाई पुजेर परमप्रभुको दृष्‍टिमा जुन कुरा खराब थियो त्‍यही गरे। तिनीहरूले परमप्रभुलाई त्‍यागे, र उहाँको सेवा गरेनन्‌।

⁷यसैकारण परमप्रभु इस्राएलसँग क्रोधित हुनुभयो, र उहाँले तिनीहरूलाई पलिश्‍तीहरू र अम्‍मोनीहरूका हातमा बेचिदिनुभयो, जसले त्‍यस वर्ष तिनीहरूलाई चकनाचूर पारे र दबाए।

⁸उनीहरूले यर्दनको पूर्वपट्टि एमोरीहरूको देशमा अर्थात्‌ गिलादमा बस्‍ने सबै इस्राएलीहरूलाई अठार वर्षसम्‍म सताउँदै र अत्‍याचार गर्दैरहे।

⁹तब यहूदा, बेन्‍यामीन र एफ्राइममाथि आक्रमण गर्नलाई अम्‍मोनीहरू यर्दन पारि तरे, र इस्राएल साह्रै सङ्कष्‍टमा पर्‍यो।

¹⁰अनि इस्राएलीहरूले सहायताको निम्‍ति परमप्रभुको पुकारा गरेर भने, “हामीले तपाईंको विरुद्धमा पाप गरेका छौं। हामीले आफ्‍ना परमेश्‍वरलाई त्‍यागेर बाल देवताहरूलाई पुजेका छौं।”

¹¹परमप्रभुले इस्राएलीहरूलाई भन्‍नुभयो, “जब मिश्री, एमोरी, अम्‍मोनी, पलिश्‍ती,

¹²सीदोनी, अमालेकी र मिद्यानीहरू सबैले तिमीहरूलाई अत्‍याचार गरे, र तिमीहरूले सहायताको निम्‍ति मेरो पुकारा गर्‍यौ, तब मैले तिमीहरूलाई उनीहरूका हातबाट छुटाइनँ र?

¹³तर तिमीहरूले मलाई त्‍याग्‍यौ र अरू देवताहरूलाई पुज्‍यौ। यसैले अब म तिमीहरूलाई फेरि छुटाउनेछैनँ।

¹⁴गएर तिमीहरूले चुनेका देवताहरूलाई सहायताको निम्‍ति पुकार, र तिनीहरूले नै तिमीहरूका दु:खको समयमा बचाऊन्‌।”

¹⁵तर इस्राएलीहरूले परमप्रभुलाई भने, “हामीले पाप गरेका छौं। हामीलाई तपाईं जे चाहनुहुन्‍छ त्‍यही गर्नुहोस्‌। तर हामी तपाईंलाई बिन्‍ती गर्दछौं कि केवल अहिले हाम्रो उद्धार गर्नुहोस्‌।”

¹⁶तब तिनीहरूले पराई देवताहरूलाई त्‍यागे र परमप्रभुको आराधना गरे। अनि उहाँले इस्राएलको दुर्गतिलाई अरू बढ्‌ता हेर्न सक्‍नुभएन।

¹⁷तब अम्‍मोनीहरू युद्धको निम्‍ति भेला गरिएर गिलादमा छाउनी हालेर बसे, र इस्राएलीहरूचाहिँ भेला भएर मिस्‍पामा छाउनी हाले।

¹⁸तब गिलादका मानिसहरूका नायकहरूले आपसमा भने, “जुन मानिसले अम्‍मोनीहरूलाई पहिले आक्रमण गर्ला त्‍यही नै गिलादका बासिन्‍दाहरूका शासक हुनेछ।”