Read Nepali New Revised Version, 2012 न्यायकर्ताहरू 12 Bible Online

न्यायकर्ताहरू 12 - Nepali New Revised Version, 2012 bible

न्यायकर्ताहरू 12

¹एफ्राइमीहरूले आफ्‍ना फौज भेला गरे, र पारि तरेर सापोनमा गए। तिनीहरूले यिप्‍तालाई भने, “अम्‍मोनीहरूसँग लड़ाइँ गर्न जाँदा हामीलाई किन बोलाउनुभएन? हामी तपाईंलाई तपाईंको घरसमेत जलाइदिनेछौं।”

²यिप्‍ताले जवाफ दिए, “म र मेरा मानिसहरूको अम्‍मोनीहरूसँग झगड़ा थियो, र मैले तिमीहरूलाई सहायताको निम्‍ति बिन्‍ती गरेको थिएँ। तिमीहरूले हामीलाई उनीहरूका हातदेखि बचाएनौ।

³जब मैले यो देखें कि हामीले तिमीहरूबाट केही सहायता नपाउने रहेछौं, तब आफ्‍नो प्राण जोखिममा हालेर अम्‍मोनीहरूका विरुद्धमा हिँड़ें, र परमप्रभुले उनीहरूलाई मेरो हातमा सुम्‍पिदिनुभयो। अब किन तिमीहरू आज मलाई आक्रमण गर्दैछौ?”

⁴तब यिप्‍ताले गिलादका सबै मानिसहरूलाई भेला गरेर एफ्राइमसँग लड़ाइँ गरे। गिलादीहरूले तिनीहरूमाथि प्रहार गरे, किनकि एफ्राइमीहरूले यसो भनेका थिए, “तिमी गिलादीहरू एफ्राइम र मनश्‍शेबाट बागी भएर गएका हौ।”

⁵गिलादीहरूले यर्दनका जँघारहरू लिए, र एफ्राइमीहरूलाई जान नदिने गरी रोकिराखे। जब भागेको कुनै एफ्राइमीले पारि जानलाई बिन्‍ती गर्थ्‍यो, तब गिलादका मानिसहरूले त्‍यसलाई सोध्‍दथे, “के तँ एफ्राइमी होस्‌?” र त्‍यसले “होइन” भन्‍यो भनेदेखि

⁶तिनीहरूले भन्‍थे, “त्‍यसो भए, ‘शिब्‍बोलेत’ भन्‌।” त्‍यसले त्‍यो शब्‍द ठीकसित उच्‍चारण गर्न नसकेर “सिब्‍बोलेत” भन्‍यो भने, तिनीहरूले त्‍यसलाई यर्दनका जँघारहरूमा पक्रेर मार्दथे। त्‍यस बेला एफ्राइमका बयालीस हजार मानिसहरू मारिए।

⁷यिप्‍ता छ वर्षसम्‍म इस्राएलका अगुवा [1] भए। तब गिलादी यिप्‍ता मरे, अनि तिनी गिलादको एउटा सहरमा गाड़िए।

⁸यिप्‍तापछि बेथलेहेमका इब्‍सान इस्राएलका अगुवा भए।

⁹तिनका तीस जना छोरा र तीस छोरी थिए। तिनले ती तीस छोरीहरूलाई अरू वंशसित विवाह गरिदिए, र आफ्‍ना छोराहरूका निम्‍ति तीस जना बुहारीहरूलाई अरू वंशबाट ल्‍याए। तिनी सात वर्षसम्‍म इस्राएलका अगुवा भए।

¹⁰तब तिनी मरे, र बेथलेहेममा गाड़िए।

¹¹तिनीपछि जबूलूनी एलोन दश वर्षसम्‍म इस्राएलका अगुवा भए।

¹²तब तिनी मरे, र जबूलूनका देशको अय्‍यालोनमा गाड़िए।

¹³त्‍यसपछि पिरातोनी हिल्‍लेलका छोरा अब्‍दोन इस्राएलका अगुवा भए।

¹⁴तिनका चालीस छोरा र तीस नाति थिए, र हरेक आ-आफ्‍नो गधामा सवार हुन्‍थ्‍यो। तिनी आठ वर्षसम्‍म इस्राएलका अगुवा भए।

¹⁵त्‍यसपछि तिनी मरे, र अमालेकीहरूको पहाड़ी देशका एफ्राइमको पिरातोनमा गाड़िए।