Read Nepali New Revised Version, 2012 न्यायकर्ताहरू 3 Bible Online

न्यायकर्ताहरू 3 - Nepali New Revised Version, 2012 bible

न्यायकर्ताहरू 3

¹यी तिनै जातिहरू हुन्‌ जसलाई परमेश्‍वरले ती इस्राएलीहरूलाई जाँच्‍नलाई छोड्‌नुभएको थियो, जसले कनानका लड़ाइँहरूको अनुभव पाएका थिएनन्‌।

²इस्राएलका आउने पुस्‍ताहरूलाई, अर्थात्‌ जस-जसले पहिले युद्ध गर्न जानेका थिएनन्, तिनीहरूलाई कसरी लड़ाइँ गर्नुपर्ने सो सिकाउने उहाँको अभिप्राय थियो।

³ती जातिहरू यी नै हुन्‌: पलिश्‍तीहरूका पाँच शासकहरू, सबै कनानीहरू, सीदोनीहरू र लेबनानका पहाड़हरूमा बाल-हेर्मोन डाँड़ादेखि लेबो-हमातसम्‍म बस्‍ने हिव्‍वीहरू।

⁴उहाँको अभिप्रायचाहिँ मोशाद्वारा तिनीहरूका पिता-पुर्खाहरूलाई परमप्रभुले दिनुभएका आज्ञाहरू इस्राएलीहरूले पालन गर्छन्‌ कि गर्दैनन्‌ भनेर जाँच्‍नलाई थियो।

⁵यसरी इस्राएलीहरू कनानी, हित्ती, एमोरी, परिज्‍जी, हिव्‍वी र यबूसीहरूसँग रहन लागे।

⁶तिनीहरूले उनीहरूका छोरीहरू विवाह गरे, र आफ्‍नै छोरीहरू पनि उनीहरूका छोराहरूलाई विवाहमा दिए। र तिनीहरूले उनीहरूका देवताहरूलाई पनि पूजा गर्न लागे।

⁷जुन कुरा परमप्रभुको दृष्‍टिमा खराब थियो इस्राएलीहरूले त्‍यही गरे। तिनीहरूले परमप्रभु आफ्‍ना परमेश्‍वरलाई बिर्से र बाल देवताहरू र अशेरा देवीहरूलाई पुज्‍न लागे।

⁸इस्राएलसँग परमप्रभु क्रोधित हुनुभयो, र उहाँले तिनीहरूलाई अरामनाहारैमका राजा कूशन-रिशातैमको हातमा बेचिदिनुभयो, जसले तिनीहरूलाई आठ वर्षसम्‍म आफ्‍नो अधीनमा राखे।

⁹तर जब इस्राएलीहरूले सहायताको निम्‍ति परमेश्‍वरलाई पुकारे, तब उहाँले तिनीहरूलाई छुटाउनलाई कालेबका भाइ कनजका छोरा ओत्‍निएललाई खड़ा गर्नुभयो, र तिनले तिनीहरूलाई मुक्त गरे।

¹⁰परमप्रभुका आत्‍मा तिनीमाथि आउनुभयो, र तिनी इस्राएलमाथि न्‍यायकर्ता [1] भए। तिनी युद्ध गर्नलाई निस्‍के, र परमप्रभुले अरामका राजा कूशन-रिशातैमलाई तिनको हातमा सुम्‍पिदिनुभयो। ओत्‍निएल उनीमाथि विजयी भए।

¹¹यसरी कनजका छोरा ओत्‍निएलको मृत्‍यु नहोउञ्‍जेल देशमा चालीस वर्षसम्‍म शान्‍ति भयो।

¹²फेरि इस्राएलीहरूले परमप्रभुको दृष्‍टिमा जुन कुरा खराब थियो त्‍यही गरे। यसैकारण परमप्रभुले मोआबका राजा एग्‍लोनलाई इस्राएलमाथि अधिकार दिनुभयो।

¹³एग्‍लोनले अम्‍मोनीहरू र अमालेकीहरूलाई युद्धको निम्‍ति भेला गरे, र इस्राएलीहरूलाई आक्रमण गर्नलाई अगि बढ़े, र खजूरका रूखहरूको सहरमाथि [2] अधिकार गरे।

¹⁴इस्राएलीहरू अठार वर्षसम्‍म मोआबका राजा एग्‍लोनको अधीनमा रहे।

¹⁵फेरि तिनीहरूले सहायताको निम्‍ति परमप्रभुलाई पुकारे, र उहाँले एक जना मानिस, अर्थात्‌ बेन्‍यामीनी गेराका छोरा, देब्रे हात चल्‍ने एहूदलाई तिनीहरूलाई छुटाउनलाई खड़ा गर्नुभयो। इस्राएलीहरूले तिनलाई मोआबका राजा एग्‍लोनकहाँ तिनीहरूको कर तिर्नलाई पठाए।

¹⁶एहूदले आफ्‍नो निम्‍ति एक हात लामो एउटा चुपी बनाएर लुगाभित्र दाहिने जाँघमा बाँधिराखे।

¹⁷त्‍यसपछि तिनी मोआबका राजा एग्‍लोनकहाँ कर लिएर गए। एग्‍लोन साह्रै मोटा मानिस थिए।

¹⁸एहूदले कर टक्र्याइसकेपछि तिनले करको सौगात बोकेर ल्‍याउने मानिसहरूलाई पठाइदिए।

¹⁹तिनी आफूचाहिँ गिलगालमा भएको, मूर्तिहरूको ठाउँदेखि फर्केर आए, र तिनले राजालाई भने, “हे महाराज, मैले हजूरलाई गुप्‍तिमा केही भन्‍नु छ।” तब एग्‍लोनले चूप लाग्‍ने आदेश दिएर आफ्‍ना सबै सेवकहरूलाई बाहिर पठाए।

²⁰जब उनी आफ्‍नो महलको कौसीको शीतल कोठामा बसिरहेका थिए तब उनका नजिक आएर एहूदले भने, “परमेश्‍वरबाट हजूरलाई मैले एउटा कुरो भन्‍नु छ।”

²¹तब एग्‍लोन आफ्‍नो आसनबाट उठे, र एहूदले आफ्‍नो देब्रे हातले दाहिनेतिर भएको चुपी निकालेर, उनको भुँड़ीमा रोपिदिए।

²²चुपी बीँड़समेत पस्‍यो, र उनको ढाड़बाट निस्‍कियो। बोसोले चुपीलाई छोप्‍यो। तिनले चुपी निकालेनन्, तर त्‍यत्तिकै अवस्‍थामा छोड़िराखे।

²³तब एहूद दलानमा निस्‍के र एग्‍लोनलाई भित्रै छोड़ेर ढोकाहरू थुनिदिए र ताल्‍चा लगाइदिए।

²⁴जब तिनी निस्‍किसकेका थिए तब एग्‍लोनका सेवकहरू भित्र आए, र ढोकाहरूमा ताल्‍चा लगाइएको देखेर तिनीहरूले भने, “राजा आफ्‍नो महलको शीतल कोठामा दिसा बसिरहनुभएको होला।”

²⁵धेरै बेरसम्‍म पर्खंदा-पर्खंदा तिनीहरूलाई लाज पनि लाग्‍यो, तापनि एग्‍लोनले कौसीको कोठाका ढोकाहरू खोलेनन्‌। तब तिनीहरूले साँचो लिएर ढोकाहरू खोले, र आफ्‍ना मालिकलाई भूइँमा मरेर लड़िरहेका भेट्टाए।

²⁶तिनीहरू पर्खिरहँदा एहूद उम्‍केर भागे। तिनी मूर्तिहरूको ठाउँदेखि छिरिगएर सीरा भन्‍ने ठाउँमा पुगे।

²⁷अनि एफ्राइमको पहाड़ी देशमा पुगेपछि त्‍यहाँ तिनले तुरही फुके, र इस्राएलीहरू पहाड़बाट आएर तिनले तिनीहरूलाई अगि लाए।

²⁸एहूदले तिनीहरूलाई भने, “मेरो पछि आओ, किनभने परमप्रभुले तिमीहरूका शत्रु मोआबीहरूलाई तिमीहरूका हातमा सुम्‍पिदिनुभएको छ।” यसकारण तिनीहरू तिनका पछिपछि ओर्लेर आए र तिनीहरूले मोआबको सामुको यर्दनका जँघारहरू लिए, र कसैलाई पनि त्‍यहाँबाट पारि जान दिएनन्‌।

²⁹तिनीहरूले त्‍यस दिन दश हजार मोआबीहरूलाई मारे। ती सबै बलिया-बलिया र शूरवीर पुरुषहरू थिए। एक जना पनि उम्‍कन पाएन।

³⁰यसरी त्‍यस दिन मोआब इस्राएलको अधीनमा भए, र देशमा असी वर्षसम्‍म शान्‍ति भइरह्यो।

³¹एहूदपछि अनातका छोरा शमगर खड़ा भए। तिनले छ सय पलिश्‍तीहरूलाई गोरु धपाउने लहुरोले मारे। तिनले पनि इस्राएलको उद्धार गरे।