Read Nepali New Revised Version, 2012 प्रकाश 10 Bible Online

प्रकाश 10 - Nepali New Revised Version, 2012 bible

प्रकाश 10

¹मैले बादलमा लपेटिएको अर्का शक्तिशाली स्‍वर्गदूतलाई स्‍वर्गबाट ओर्लेका देखें। तिनको शिरमा इन्‍द्रेनी थियो, र तिनको मुहार सूर्यजस्‍तो र पाउहरू आगोका खामाजस्‍ता थिए।

²तिनको हातमा खोलिराखेको एउटा सानो चर्मपत्रको मुट्ठो थियो। तिनले आफ्‍नो दाहिने खुट्टा समुद्रमा र देब्रे खुट्टा जमिनमा राखे।

³अनि सिंह गर्जेझैँ तिनी ठूलो सोरले कराए, र तिनी कराएपछि सात मेघ गर्जनहरूको आवाज आयो।

⁴जब ती सात मेघ गर्जनहरूले आ-आफ्‍ना आवाज निकाले, म लेख्‍नै लागेको थिएँ, त्‍यसै बेला स्‍वर्गबाट यसो भन्‍ने आवाज मैले सुनें, “ती सात मेघ गर्जनहरूले निकालेका आवाजलाई गुप्‍त राख, र ती नलेख।”

⁵तब समुद्र र जमिनमा उभिएका जुन स्‍वर्गदूतलाई मैले देखेका थिएँ, तिनले आफ्‍नो हात स्‍वर्गतिर उचाले।

⁶अनि सदासर्वदा जीवित रहनुहुने, तथा स्‍वर्ग र त्‍यसमा भएका कुराहरू, पृथ्‍वी र त्‍यसमा भएका कुराहरू, समुद्र र त्‍यसमा भएका कुराहरूलाई सृष्‍टि गर्नुहुनेको नाउँमा तिनले शपथ खाएर अब ढिलो हुनेछैन भने।

⁷तर ती दिनहरूमा जब सातौँ स्‍वर्गदूतले आफ्‍नो तुरही फुक्‍नै लाग्‍छन्, उहाँले आफ्‍ना दास अगमवक्ताहरूलाई घोषणा गर्नुभएझैँ परमेश्‍वरको रहस्‍य पूरा हुनेछ।

⁸तब स्‍वर्गबाट मैले सुनेको आवाजले मलाई फेरि यसो भन्‍यो, “जाऊ, समुद्र र जमिनमा उभिने दूतको हातमा भएको खुला चर्मपत्रको मुट्ठो लेऊ।”

⁹अनि म स्‍वर्गदूतकहाँ गएँ र त्‍यो सानो चर्मपत्रको मुट्ठो मागें। अनि तिनले मलाई भने, “यो लेऊ, र खाऊ। यसले तिम्रो पेट अमिलो गराउनेछ, तर तिम्रो मुखमा चाहिँ त्‍यो महजस्‍तै गुलियो हुनेछ।”

¹⁰मैले ती स्‍वर्गदूतको हातबाट त्‍यो सानो चर्मपत्रको मुट्ठो लिएँ, र खाएँ। मेरो मुखमा त्‍यो महजस्‍तै गुलियो भयो। तर त्‍यो खाएपछि मेरो पेट अमिलो भयो।

¹¹तब मलाई यो भनियो, “तिमीले धेरै मानिसहरू, जातिहरू, भाषाहरू र राजाहरूका विषयमा फेरि अगमवाणी बोल्‍नुपर्नेछ।”