Read Nepali New Revised Version, 2012 १ शमूएल 15 Bible Online

१ शमूएल 15 - Nepali New Revised Version, 2012 bible

१ शमूएल 15

¹शमूएलले शाऊललाई भने, “परमप्रभुले तपाईंलाई इस्राएलमाथि राजा अभिषेक गर्न भनी मलाई पठाउनुभयो। अब परमप्रभुको वचन ध्‍यान दिएर सुन्‍नुहोस्‌।

²सर्वशक्तिमान्‌ परमप्रभु भन्‍नुहुन्‍छ: ‘मिश्रदेशबाट इस्राएल उक्‍लेर आउँदा अमालेकीहरूले इस्राएललाई आक्रमण गरे। यसकारण त्‍यसको निम्‍ति अमालेकीहरूलाई दण्‍ड दिने निश्‍चय मैले गरेको छु’।

³अब अमालेकीहरूमाथि जाइलागेर उनीहरूलाई नाश गर्, र उनीहरूका सबै धन-सम्‍पत्ति नाश गर्, एउटै थोक पनि नछोड्‌, र सबैलाई खतम पार्‌। उनीहरूका पुरुष, स्‍त्री, केटाकेटीहरू, दूध खाने बालकहरू, गाई-गोरु, भेड़ाबाख्रा, ऊँट र गधा सबैलाई नाश गर्‌।”

⁴यसकारण शाऊलले सेनालाई बोलाएर तेलैममा भेला गरे। त्‍यहाँ दुई लाख पैदल-सिपाही र यहूदाका दश हजार मानिसहरू थिए।

⁵शाऊल अमालेकको सहरमा गए, र त्‍यहाँ साँघुरो खोँचमा केही समयसम्‍म बसे।

⁶तब उनले केनीहरूलाई भने, “तिमीहरू अमालेकीहरूलाई छोड़ेर जाओ, कि तिमीहरू पनि उनीहरूसँगै नष्‍ट नहोओ। किनभने इस्राएल मिश्रदेशबाट उक्‍लेर आउँदा तिमीहरूले मित्रताको व्‍यवहार देखाएका थियौ।” यसैकारण केनीहरूले अमालेकीहरूलाई छोड़े।

⁷तब हवीलादेखि मिश्रको पूर्व सिमानामा भएको शूरसम्‍मै अमालेकीहरूलाई शाऊलले आक्रमण गरे।

⁸उनले अमालेकीहरूका राजा अगागलाई जिउँदै पक्रे, र अगागका सबै मानिसहरूलाई तरवारले मारे।

⁹तर शाऊल र उनका सेनाले अगाग र असल-असल भेड़ा र गाई-गोरु, मोटा-मोटा बाछा र पाठा, र राख्‍ने योग्‍यका सबै चीजहरू बचाइराखे। तिनीहरूले तिनलाई नाश गर्ने इच्‍छा गरेनन्‌। तर बेकामका र केही मोल नभएकाहरूलाई चाहिँ तिनीहरूले नाश गरे।

¹⁰तब परमप्रभुले शमूएललाई यसो भन्‍नुभयो,

¹¹“शाऊललाई राजा तुल्‍याएकोमा मलाई पछितो लागेको छ, किनभने त्‍यसले आफ्‍नो मुख मदेखि मोड़ेको छ, र मेरो आज्ञा त्‍यसले पालन गरेको छैन।” शमूएल विचलित भए, र तिनले रातभरि परमप्रभुलाई पुकारा गर्दैरहे।

¹²भोलिपल्‍ट बिहान सबेरै तिनी शाऊललाई भेट गर्न हिँड़े। तर “शाऊल त कर्मेलमा गएर त्‍यहाँ आफ्‍नो सम्‍झनाको निम्‍ति एउटा स्‍मारक खड़ा गरेका छन्, र त्‍यसपछि फर्केर गिलगालमा झरिसकेका छन्‌” भनी तिनलाई सुनाइयो।

¹³त्‍यहीँ नै तिनले शाऊललाई भेट्टाए, र शाऊलले तिनलाई यसो भनेर अभिवादन गरे, “परमप्रभुको आशिष्‌ तपाईंमा रहोस्‌। मैले परमप्रभुको आज्ञा पालन गरें।”

¹⁴तर शमूएलले भने, “मेरो कानमा परेका भेड़ाको आवाजचाहिँ के हो? गाई-गोरुका आवाज म किन सुन्‍दैछु?”

¹⁵शाऊलले जवाफ दिए, “सिपाहीहरूले ती अमालेकीहरूबाट लिएका हुन्‌। तिनीहरूले असल-असल भेड़ा र गाई-गोरु परमप्रभु तपाईंका परमेश्‍वरको निम्‍ति बलिदान चढ़ाउनलाई जोगाइराखेका हुन्‌। बाँकीलाई त हामीले बिलकुलै नाश गर्‍यौं।”

¹⁶शमूएलले शाऊललाई भने, “बस, भयो! गत रात परमप्रभुले मलाई के भन्‍नुभयो सो म तपाईंलाई बताउनेछु।” शाऊलले भने, “भन्‍नुहोस्‌।”

¹⁷शमूएलले भने, “यस्‍तो समय थियो जब तपाईं आफूले आफैलाई तुच्‍छ सम्‍झनुहुन्‍थ्‍यो, तर अब तपाईं इस्राएलका कुलहरूका शिर हुनुहुन्‍छ। परमप्रभुले तपाईंलाई इस्राएलमाथि राजा अभिषेक गर्नुभयो।

¹⁸अनि उहाँले तपाईंलाई ‘त्‍यस दुष्‍ट जाति, ती अमालेकीहरूलाई बिलकुलै नाश गर्नू’ भनी कड़ा आज्ञा दिएर पठाउनुभएको थियो। उनीहरूलाई निमिट्यान्‍न नपारुञ्‍जेल तपाईंले उनीहरूका विरुद्धमा लड़ाइँ गरिरहनुपर्नेथियो।

¹⁹तपाईंले किन परमप्रभुको आज्ञापालन गर्नुभएन? तपाईंले किन लूटका माल लिनुभयो, र परमप्रभुको दृष्‍टिमा जे कुरो खराब थियो त्‍यही गर्नुभयो?”

²⁰शाऊलले शमूएललाई उत्तर दिए, “तर मैले त परमप्रभुको आज्ञापालन गरें। परमप्रभुले पठाउनुभएको ठाउँमा म गएँ, र अमालेकीहरूका राजा अगागलाई समातेर ल्‍याएँ। उनीहरूमध्‍येका बाँकीलाई चाहिँ मैले नष्‍ट पारिदिएँ।

²¹लूटका मालबाट सिपाहीहरूले भेड़ा र गाई-गोरु, अनि सबभन्‍दा असल-असल चीजचाहिँ गिलगालमा परमप्रभु तपाईंका परमेश्‍वरको निम्‍ति बलिदान चढ़ाउनलाई राखेका छन्‌।”

²²तर शमूएलले भने, “होमबलि र बलिदानभन्‍दा बेसी परमप्रभुले आज्ञापालन नै रुचाउनुहुन्‍न र? आज्ञापालन बलिदानभन्‍दा उत्तम हो, र उहाँको वचन मान्‍नु भेड़ाको बोसोभन्‍दा असल हो।

²³उहाँको आज्ञा उल्‍लङ्घन गर्नु तन्‍त्रमन्‍त्रको पापजस्‍तै हो, र हठी हुनु मूर्तिपूजा गर्नुजस्‍तै खराब हो। तपाईंले परमप्रभुको वचनलाई त्‍याग्‍नुभयो, यसैले परमप्रभुले पनि तपाईंलाई राजाको पददेखि त्‍याग्‍नुभएको छ।”

²⁴शाऊलले शमूएललाई भने, “मैले पाप गरें। मैले परमप्रभुको आज्ञा र तपाईंका हुकुमको वास्‍ता गरिनँ। म मानिसहरूसँग डराएँ, र तिनीहरूको कुरा मैले मानें।

²⁵म अब आग्रह गर्दछु, कि मेरो पाप क्षमा गर्नुहोस्, मसँग आउनुहोस्, र म परमप्रभुको सामु दण्‍डवत्‌ गरूँ।”

²⁶तर शमूएलले जवाफ दिए, “म तपाईंको साथ दिनेछैनँ। तपाईंले परमप्रभुको वचनलाई त्‍याग्‍नुभयो, र तपाईंलाई पनि परमप्रभुले इस्राएलमाथि राजाको पददेखि त्‍याग्‍नुभएको छ।”

²⁷तिनी जानलाई फर्के, तर शाऊलले तिनको खास्‍टोको किनार समाते, र त्‍यो च्‍यातियो।

²⁸शमूएलले उनलाई भने, “आज परमप्रभुले इस्राएलको राज्‍य तपाईंको हातदेखि च्‍यातेर तपाईंका छिमेकीलाई दिनुभएको छ, जो तपाईंभन्‍दा असल हुनुहुन्‍छ।

²⁹परमप्रभु, जो इस्राएलका गौरव हुनुहुन्‍छ, उहाँ छल गर्नुहुन्‍न, आफ्‍नो मन पनि बद्‌लनुहुन्‍न। आफ्‍नो मन बद्‌लने उहाँ मानिस हुनुहुन्‍न।”

³⁰शाऊलले भने, “मैले पाप गरें। तापनि कृपा गरी मेरो प्रजाका धर्म-गुरुहरू र इस्राएलको सामुन्‍ने एक पल्‍ट मात्र मेरो इज्‍जत गरिदिनुहोस्, र मसँग आउनुहोस्, कि म परमप्रभु तपाईंका परमेश्‍वरको सामु दण्‍डवत्‌ गरूँ।”

³¹यसैले शमूएल शाऊलसँग फर्केर गए, र शाऊलले परमप्रभुको सामु दण्‍डवत्‌ गरे।

³²तब शमूएलले भने, “अमालेकीहरूका राजा अगागलाई यहाँ ल्‍याऊ।” अगाग निर्भयसाथ सोच्‍दै आए, “निश्‍चय नै मृत्‍युको भय गयो।”

³³तर शमूएलले भने, “तेरो तरवारले स्‍त्रीहरूलाई निर्वश तुल्‍याएको छ। यसकारण तेरै आमा पनि सबै स्‍त्रीहरूका बीचमा निर्वश हुनेछे।” अनि शमूएलले अगागलाई परमप्रभुको सामुन्‍ने गिलगालमा मारे।

³⁴तब शमूएलचाहिँ रामामा गए, तर शाऊल गिबामा आफ्‍नै घरमा गए।

³⁵शमूएल आफ्‍नो मृत्‍युको दिनसम्‍मै फेरि कहिल्‍यै शाऊललाई भेट्‌न गएनन्, तर तिनी शाऊलको निम्‍ति शोक गरिरहे। अनि शाऊललाई इस्राएलमाथि राजा तुल्‍याउनुभएकोमा परमप्रभुले पछितो गर्नुभयो।