Read Nepali New Revised Version, 2012 १ शमूएल 18 Bible Online

१ शमूएल 18 - Nepali New Revised Version, 2012 bible

१ शमूएल 18

¹दाऊदले शाऊलसँग बातचीत गरिसकेपछि, जोनाथन दाऊदसँग आत्‍मामा एक भए, र आफूलाई झैँ तिनलाई प्रेम गर्न लागे।

²त्‍यस दिनदेखि शाऊलले दाऊदलाई आफूसित राखे, र आफ्‍ना बुबाको घरमा फेरि फर्किजान दिएनन्‌।

³जोनाथनले दाऊदलाई आफैलाई झैँ प्रेम गरेका हुनाले, जोनाथनले तिनीसँग एउटा करार बाँधे।

⁴तब जोनाथनले आफूले लाएका खास्‍टो र लबेदा फुकाले, र ती दाऊदलाई आफ्‍नो तरवार, धनु र पेटीसमेत दिए।

⁵शाऊलले पठाएको जुनसुकै काममा पनि दाऊद यति सफल भए कि शाऊलले तिनलाई आफ्‍नो सेनाको उच्‍च पदमा नियुक्त गरे। यसरी दर्जा बढ़ेकामा साधारण मानिसहरू र शाऊलका अधिकृतहरू पनि प्रसन्‍न भए।

⁶जब दाऊदले पलिश्‍तीहरूलाई ध्‍वंस गरेर मानिसहरू फर्किरहेका थिए, तब स्‍त्रीहरू इस्राएलका सबै सहरबाट निस्‍के, अनि तिनीहरू सितार र खैँजड़ी बजाउँदै, गाउँदै र नाच्‍दै शाऊल राजालाई भेट्‌न आए।

⁷स्‍त्रीहरू आनन्‍दित भएर यसो भनेर गाउँदथे: “शाऊलले हजारौँ हजारलाई ध्‍वंस गरे, र दाऊदले त लाखौँ लाखलाई ध्‍वंस गरे।”

⁸शाऊल साह्रै रिसाए, र ती शब्‍दहरूले उनलाई चोट लाग्‍यो। उनले भने, “दाऊदको निम्‍ति तिनीहरूले लाखौँ लाख ठहराए, तर मलाई चाहिँ हजारौँ मात्र। अब तिनलाई राजा तुल्‍याउनु मात्र त बाँकी रह्यो।”

⁹त्‍यस दिनदेखि उसो शाऊलले दाऊदलाई डाहको दृष्‍टिले हेर्न लागे।

¹⁰भोलिपल्‍ट परमेश्‍वर तर्फको एउटा हानिकारक आत्‍माले शाऊललाई पक्र्यो। उनी घरैमा अगमवाणी बोलिरहेका थिए। दाऊदले अघिझैँ शाऊलको निम्‍ति वीणा बजाउँदैथिए। शाऊलको हातमा आफ्‍नो भाला थियो।

¹¹“दाऊदलाई भित्तैमा उनिदिन्‍छु” मनमनै भन्‍दै त्‍यो हाने, तर दाऊद दुवै पल्‍ट तर्के।

¹²शाऊल दाऊदसँग डराउन लागे, किनभने परमप्रभु दाऊदसँग हुनुहुन्‍थ्‍यो, तर शाऊललाई उहाँले छोड़िसक्‍नुभएको थियो।

¹³यसैकारण उनले दाऊदलाई आफ्‍नो दरबारबाट अलग गरेर एक हजार मानिसहरूका सेनानी नियुक्त गरिदिए। दाऊदले आफ्‍ना मानिसहरूलाई धावामा लगे,

¹⁴र परमप्रभु तिनीसँग हुनुभएको हुनाले आफूले जिम्‍मा लिएका सबै काममा तिनी सफल भए।

¹⁵जब शाऊलले तिनलाई यसरी सफल भएका देखे तब उनी दाऊदसँग डराए।

¹⁶सबै इस्राएल र यहूदाले दाऊदलाई प्रेम गरे, किनभने तिनी रणभूमिमा तिनीहरूका अगुवा भएर जान्‍थे।

¹⁷शाऊलले दाऊदलाई भने, “म मेरी जेठी छोरी मेराबलाई तिमीसँग विवाह गरिदिनेछु, तर त्‍यसको सट्टामा तिमीले वीरतापूर्वक मेरो सेवा गर, र परमप्रभुको निम्‍ति लड़ाइँ गर।” किनभने शाऊलले आफ्‍नै हातबाट होइन, तर पलिश्‍तीहरूका हातबाट दाऊदलाई मार्ने विचार गरेका थिए।

¹⁸तर दाऊदले उत्तर दिए, “म को हुँ, र मेरा बुबाको परिवार, मेरा आफन्‍तहरू इस्राएलमा को हुन्, र म राजाको जुवाइँ हुन सक्‍छु?”

¹⁹यसकारण जब शाऊलकी छोरी मेराबको दाऊदसँग विवाह गर्ने बेला आयो, तब बरु महोलाको अद्रीएलसँग मेराबको विवाह भयो।

²⁰तर शाऊलकी अर्की छोरी मीकल दाऊदसँग प्रेममा फसिन्‌। जब यो कुरो शाऊलको कानमा पुग्‍यो तब शाऊल प्रसन्‍न भए।

²¹उनले आफ्‍नो मनमनै भने, “म त्‍यसलाई नै दाऊदसँग विवाह गरिदिनेछु, कि पलिश्‍तीहरूका हातबाट मारिनलाई तिनको निम्‍ति त्‍यो एउटा फन्‍दा होस्, र पलिश्‍तीहरूले तिनको विरोध गरून्‌।” यसैले शाऊलले दाऊदलाई आफ्‍ना जुवाइँ बनाउनलाई दोस्रो पल्‍ट प्रस्‍ताव राखे।

²²दाऊदलाई सुटुक्‍क यसो भन्‍नू भनी शाऊलले आफ्‍ना भारदारहरूलाई हुकुम गरे, “राजा तपाईंसँग अत्‍यन्‍तै खुशी हुनुहुन्‍छ, अनि तपाईं हामी सबैका प्रिय हुनुहुन्‍छ। अब राजाका जुवाइँ हुनुहोस्‌।”

²³जब शाऊलका मानिसहरूले दाऊदसँग यसरी कुरा गरे, तिनले उनीहरूलाई भने, “राजाका छोरीलाई विवाह गर्न तपाईंहरू सानो कुरा सम्‍झनुहुन्‍छ? म केही नभएको गरीब मानिस मात्र हुँ।”

²⁴दाऊदले भनेका कुरा शाऊलका भारदारहरूले उनलाई सुनाइदिए।

²⁵उनले भने, “दाऊदलाई यसो भन: शत्रुहरूलाई बदला लिनका निम्‍ति राजाले दुलहीको दामको रूपमा एक सय पलिश्‍तीहरूका खलड़ी मात्र माग्‍नुहुन्‍छ।” पलिश्‍तीहरूका हातबाट दाऊद मरून्‌ भन्‍ने शाऊलको इच्‍छा थियो।

²⁶शाऊलले भनेका कुरा भारदारहरूले दाऊदलाई सुनाइदिए। यो शर्तमा राजाका छोरीसँग विवाह गर्न तिनी राजी भए। तोकिएको समयअघि दाऊद आफ्‍ना मानिसहरूसँग गए,

²⁷र दुई सय पलिश्‍तीहरूलाई मारे। तिनले उनीहरूका खलड़ी लगेर आफूलाई जुवाइँ स्‍वीकार गरिओस्‌ भनी राजाको सामु ती गनिदिए। यसैले शाऊलले आफ्‍नी छोरी मीकललाई दाऊदसँग विवाह गरिदिए।

²⁸परमप्रभु दाऊदसँग हुनुहुँदोरहेछ भनी शाऊलले देखे, अनि आफ्‍नी छोरी मीकलले तिनलाई प्रेम गर्दीरहिछ भनेर पनि उनलाई थाहा भयो।

²⁹यसकारण उनी दाऊदसँग झन्‌ डराउन लागे, र आफ्‍नो बाँकी जीवनभरि नै उनी दाऊदका शत्रु भए।

³⁰पलिश्‍तीहरूका सैनिक अधिकृतहरू लड्‌नलाई आइरहन्‍थे। जब उनीहरू यसरी आउँथे तब शाऊलका अन्‍य मानिसहरूभन्‍दा दाऊद तिनीहरूउपर ज्‍यादा सफल भए, अनि तिनले ठूलो नाउँ कमाए।