Read Nepali New Revised Version, 2012 १ शमूएल 4 Bible Online

१ शमूएल 4 - Nepali New Revised Version, 2012 bible

१ शमूएल 4

¹अनि शमूएलको वचन इस्राएलभरि नै आयो। यतिखेर इस्राएलीहरू पलिश्‍तीहरूसित युद्ध गर्नलाई अगि बढ़े। इस्राएलीहरूले एबेन-एजेरमा र पलिश्‍तीहरूले अपेकमा छाउनी हाले।

²पलिश्‍तीहरूले इस्राएलको सामुन्‍ने आफ्‍ना पङ्‌क्ति बाँधे, र जब तिनीहरूका बीचमा लड़ाइँ भयो तब इस्राएलीहरू पलिश्‍तीहरूद्वारा पराजित भए, अनि तिनीहरूका चार हजार मानिसहरू रणभूमिमा मारिए।

³सेना छाउनीमा फर्केर आएपछि इस्राएलका धर्म-गुरुहरूले सोधे, “आज परमप्रभुले हामीलाई किन पलिश्‍तीहरूद्वारा पराजित गराउनुभयो? उहाँ हामीसँग जाऊन्‌ र हामीलाई हाम्रा शत्रुहरूको हातबाट मुक्त गराऊन्‌ भनेर हामी परमप्रभुका करारको सन्‍दूक शीलोबाट ल्‍याऔं।”

⁴यसकारण तिनीहरूले शीलोमा मानिसहरू पठाए, र सर्वशक्तिमान्‌ परमप्रभु, जो करूबहरूका बीचमा विराजमान हुनुहुन्‍छ, उहाँका करारको सन्‍दूक तिनीहरूले ल्‍याए। एलीका दुई छोरा, होप्‍नी र पीनहास, त्‍यहाँ सन्‍दूकको साथमा थिए।

⁵जब सन्‍दूक छाउनीमा ल्‍याइयो तब सारा इस्राएलीहरूले यति ठूलो सोरले कराए कि पृथ्‍वी नै काम्‍यो।

⁶पलिश्‍तीहरूले त्‍यो सोर सुने, र सोधे, “हिब्रूहरूको छाउनीमा भएको त्‍यो ठूलो हल्‍ला के हो?” परमप्रभुको सन्‍दूक छाउनीमा आयो भनी जब पलिश्‍तीहरूले थाहा पाए,

⁷तब उनीहरूले डराएर भने, “देवताहरू छाउनीमा आएछन्‌।

⁸हाम्रो त सर्वनाश भयो! यस्‍तो त पहिले कहिल्‍यै भएको थिएन। हामीमाथि हाय, यस्‍ता शक्तिशाली देवताहरूका शक्तिबाट हामीलाई कसले छुटाउन सक्‍नेछ? यी ती नै देवताहरू हुन्‌ जसले मिश्रीहरूलाई विभिन्‍न महामारीद्वारा उजाड़-स्‍थानमा ध्‍वंस बनाए।

⁹हे पलिश्‍ती हो, आँटिला होओ, र मर्दझैँ काम गर, नत्रता जस्‍तो तिनीहरू तिमीहरूका कमारा थिए तिमीहरू पनि तिनीहरूका कमारा हुनेछौ। मर्दझैँ लड़ाइँ गर।”

¹⁰यसर्थ पलिश्‍तीहरूले युद्ध गरे, र इस्राएलीहरू पराजित भएर आ-आफ्‍नो पालमा भागे। त्‍यो ठूलो हार थियो, र तीस हजार इस्राएली पैदल-सिपाहीहरू नष्‍ट भए।

¹¹परमेश्‍वरको सन्‍दूक कब्‍जा गरियो, अनि एलीका दुवै छोरा, होप्‍नी र पीनहास मरे।

¹²त्‍यसै दिन रणभूमिबाट आफ्‍नो लुगा च्‍यातिएको एउटा बेन्‍यामीनी टाउकोभरि धूलैधूलो लिएर शीलोमा दौड़ेर पुग्‍यो।

¹³त्‍यो आइपुग्‍दा एली बाटोको छेउमा आफ्‍नो आसनमा बसेर हेरिरहेका थिए, किनभने परमेश्‍वरका सन्‍दूकको कारण उनी साह्रै विचलित भएका थिए। समाचार लिएर त्‍यो मानिस सहरभित्र पस्‍यो, र जब त्‍यसले जे भएको थियो सबै भन्‍यो तब पूर्ण सहरले नै चीत्‍कार गरे।

¹⁴जब एलीले त्‍यो सुने तब उनले भने, “यो केको हल्‍लाखल्‍ला हो?” त्‍यो मानिस हतार-हतार एलीकहाँ गयो।

¹⁵एली त्‍यस बेला अन्‍ठान्‍नब्‍बे वर्ष पुगेका थिए, र आँखा देख्‍दैनथे।

¹⁶तब त्‍यस मानिसले उनलाई भन्‍यो, “म लड़ाइँबाट भर्खरै आएको हुँ। आजै म रणभूमिबाट भागेर आएको छु।” एलीले सोधे, “हे मेरो छोरो, के भयो?”

¹⁷त्‍यो समाचार ल्‍याउने मानिसले जवाफ दियो, “इस्राएलीहरू पलिश्‍तीहरूको सामुबाट भागे। सेनामा ठूलो विनाश भएको छ। तपाईंका दुवै छोरा, होप्‍नी र पीनहास मारिए, र परमेश्‍वरको सन्‍दूक पनि खोसियो।”

¹⁸परमेश्‍वरका सन्‍दूकको विषयमा सुन्‍ने बित्तिकै ढोकाको छेउमा भएको आसनबाट एली पछिल्‍तिर लड़े, र उनको घाँटी भाँचिएर उनी मरे, किनभने उनी वृद्ध र ठूलो शरीर भएका मानिस थिए। उनी चालीस वर्षसम्‍म इस्राएलका अगुवा भएका थिए।

¹⁹उनकी बुहारी, पीनहासकी पत्‍नी गर्भवती थिई, र बालक जन्‍मने समय भइसकेको थियो। जब त्‍यसले परमेश्‍वरको सन्‍दूक कब्‍जा गरेर लगेको र आफ्‍ना ससुरा र पति मरेका थाहा पाई तब त्‍यति नै बेला थुचुक्‍क बसेर त्‍यसले बालक जन्‍माई। तर त्‍यसको प्रसववेदनाले गर्दा त्‍यो ग्रस्‍त भई।

²⁰जब त्‍यो मर्नै लागेकी थिई तब त्‍यसलाई स्‍याहार्ने स्‍त्रीहरूले भने, “हरेस नखाऊ, तिम्रो एक जना छोरो भयो।” तर तिनीहरूले भनेको कुराको त्‍यसले जवाफ दिइन, त्‍यसले ध्‍यानै दिइन।

²¹त्‍यसले यसो भनेर बालकको नाउँ ईकाबोद [1] राखी, “इस्राएलबाट महिमा हरायो,” कारण परमेश्‍वरका करारको सन्‍दूक कब्‍जा गरिएको तथा त्‍यसका ससुरा र पतिको मृत्‍यु भएको थियो।

²²“इस्राएलबाट महिमा हरायो, किनभने परमेश्‍वरको सन्‍दूक खोसिएको छ,” त्‍यसले भनी।