Read New Revised Asante Twi Bible Gyenesis 11 Bible Online

Gyenesis 11 - New Revised Asante Twi Bible bible

Gyenesis 11

¹Na asase nyinaa sofoɔ yɛ anokorɔ kasa kasa korɔ.

²Na wɔtuu kwan faa apueeɛ no, wɔhunuu asasetam bi wɔ Sinear asase so, na wɔtenaa hɔ.

³Na wɔsesee wɔn ho wɔn ho sɛ: Wiɛ, momma yɛnyɛ ntaayaa, na yɛnto! Na ntaayaa no yɛɛ wɔn aboɔ, na ama yɛɛ wɔn dɔteɛ.

⁴Ɛnna wɔkaa sɛ: Wiɛ, momma yɛnkyekyere kuro, na yɛnto abantenten a n’atifi bɛduru soro, na yɛmfa nnye din, na yɛanhwete asase nyinaa ani.

⁵ Na AWURADE siane bɛhwɛɛ kuro ne abantenten a nnipa mma retoɔ no.

⁶Na AWURADE kaa sɛ: Hwɛ, wɔyɛ ɔman baako, na wɔn nyinaa ka kasa korɔ; na deɛ wɔafiri aseɛ reyɛ nie; na afei, biribiara rentumi nsi wɔn deɛ wɔsusu sɛ wɔbɛyɛ no biara ho kwan.

⁷Wiɛ, momma yɛnsiane nkɔ hɔ na yɛnkɔyɛ wɔn kasa basabasa, na wɔn mu biara ante ne yɔnko kasa bio.

⁸ Na ɛfiri hɔnom na AWURADE bɔɔ wɔn hwetee asase nyinaa ani, na wɔgyaee kuro no kyekyerɛ.

⁹Enti na wɔfrɛ hɔ Babel,[7] ɛfiri sɛ ɛhɔ na AWURADE yɛɛ asase nyinaa kasa basabasa. Ɛfiri hɔ na AWURADE bɔɔ wɔn hwetee asase nyinaa ani.

¹⁰ Yeinom ne Sem awoɔ ntoatoasoɔ: Sem dii mfirinhyia ɔha na ɔwoo Arfaksad, nsuyire no akyiri mfeɛ mmienu.

¹¹Na Sem woo Arfaksad no akyiri no, ɔdii mfeɛ ahanum na ɔwoo mmammarima ne mmammaa.

¹²Na Arfaksad dii mfirinhyia aduasa nnum na ɔwoo Sela.

¹³Na ɔwoo Sela no akyi no, ɔdii mfeɛ ahanan ne mmiɛnsa, na ɔwoo mmammarima ne mmammaa.

¹⁴Na Sela dii mfirinhyia aduasa na ɔwoo Eber.

¹⁵Na Sela woo Eber no akyiri no, ɔdii mfeɛ ahanan ne mmiɛnsa na ɔwoo mmammarima ne mmammaa.

¹⁶Na Eber dii mfirinhyia aduasa nnan na ɔwoo Peleg.

¹⁷Na ɔwoo Peleg no akyi no, ɔdii mfeɛ ahanan aduasa na ɔwoo mmammarima ne mmammaa.

¹⁸Na Peleg dii mfirinhyia aduasa na ɔwoo Reu.

¹⁹Peleg woo Reu no akyiri no, ɔdii mfeɛ ahanu ne nkron na ɔwoo mmammarima ne mmammaa.

²⁰Na Reu dii mfirinhyia aduasa mmienu na ɔwoo Serug.

²¹Na Reu woo Serug no akyiri no, ɔdii mfeɛ ahanu ne nson, na ɔwoo mmammarima ne mmammaa.

²²Na Serug dii mfirinhyia aduasa na ɔwoo Nahor.

²³Na Serug woo Nahor no akyiri no, ɔdii mfeɛ ahanu na ɔwoo mmammarima ne mmammaa.

²⁴Na Nahor dii mfirinhyia aduonu nkron na ɔwoo Tera.

²⁵Na Nahor woo Tera no akyiri no, ɔdii mfeɛ ɔha ne dunkron na ɔwoo mmammarima ne mmammaa.

²⁶Na Tera dii mfirinhyia aduɔson na ɔwoo Abram, Nahor ne Haran.

²⁷Na yeinom ne Tera awoɔ ntoatoasoɔ: Tera woo Abram, Nahor ne Haran, na Haran woo Lot.

²⁸Na Haran wuu n’agya Tera anim, asase a wɔwoo no soɔ no so, ɛne Ur a ɛwɔ Kaldea.

²⁹ Na Abram ne Nahor waree yerenom, Abram yere din de Sarai, na Nahor yere din de Milka a ɔyɛ Haran babaa. Na Haran yɛ Milka ne Iska agya.

³⁰Na Sarai yɛ obonini, na ɔnni ba.

³¹ Na Tera faa ne ba Abram ne ne nana Lot, a ɔyɛ Haran ba, ne n’ase Sarai, ne ba Abram yere, na ɔne wɔn firii Ur a ɛwɔ Kaldea sɛ wɔrekɔ Kanaan asase so. Na wɔduruu Haran no, wɔtenaa hɔ.

³²Na Tera nna yɛ mfeɛ ahanu ne nnum, na Tera wuu wɔ Haran.