Read New Revised Asante Twi Bible Gyenesis 17 Bible Online

Gyenesis 17 - New Revised Asante Twi Bible bible

Gyenesis 17

¹ Na Abram dii mfirinhyia aduɔkron nkron no, AWURADE yii ne ho kyerɛɛ no kaa sɛ: Mene Onyankopɔn Tweaduampɔn, nante m’anim, na yɛ pɛ.

²Na mɛma m’apam ada me ne wo ntam, na mama woadɔ kɛse ara.

³Na Abram daa hɔ de n’anim butuu fam; na Onyankopɔn ne no kasaa sɛ:

⁴Me deɛ, hwɛ, m’apam da hɔ ma wo, na mɛyɛ wo aman pii agya.

⁵ Na wɔremfrɛ wo din Abram[12] bio, na mmom wɔbɛfrɛ wo Abraham,[13] ɛfiri sɛ mayɛ wo aman pii agya.

⁶Na mɛma woadɔ pii pa ara, na mɛyɛ wo aman, na ahemfo afiri wo mu.

⁷Na mɛma me ne wo ne w’asefoɔ a ɛbɛdi w’akyire no apam agyina wɔ wɔn awoɔ ntoatoasoɔ mu, na ayɛ daa apam, na mayɛ wo ne w’asefoɔ a ɛbɛdi w’akyire no Nyankopɔn.

⁸ Na mede asase a woyɛ so hɔhoɔ yi, Kanaan asase nyinaa, bɛma wo ne w’asefoɔ a ɛbɛdi w’akyire, sɛ daa agyapadeɛ, na mayɛ wɔn Nyankopɔn.

⁹Na Onyankopɔn ka kyerɛɛ Abraham sɛ: Wo deɛ, di m’apam so, wo ne w’asefoɔ a ɛbɛdi w’akyi wɔn awoɔ ntoatoasoɔ mu.

¹⁰ Yei ne me ne w’asefoɔ a ɛbɛdi w’akyire no ntam apam a monni soɔ: Wɔntwitwa mo mu mmarima nyinaa twetia.

¹¹Na montwitwa mo ho twetia, na ayɛ me ne mo ntam apam no ho nsɛnkyerɛnneɛ.

¹²Na ɔbabarima biara a wadi nna nwɔtwe no, montwa no twetia mo awoɔ ntoatoasoɔ mu, deɛ wɔawo no fie ne deɛ wɔde sika tɔɔ no wɔ ɔhɔhoɔ biara a ɔnyɛ w’aseni nkyɛn.

¹³Twa deɛ wɔawo no wɔ wo fie ne deɛ wɔde wo sika tɔɔ no twetia, na m’apam atena mo honam mu sɛ daa apam.

¹⁴Na ɔbarima momonoto biara a wɔntwaa no twetia no, saa onipa no wɔbɛtwa no afiri ne man mu, ɛfiri sɛ wato m’apam.

¹⁵Na Onyankopɔn ka kyerɛɛ Abraham sɛ: Wo yere Sarai deɛ, mfrɛ no Sarai bio, na mmom Sara.[14]

¹⁶Na mɛhyira no, na mama wo ne mu ɔba nso, ampa ara, mɛhyira no. Ɔbɛyɛ aman, na aman ahemfo bɛfiri ne mu.

¹⁷ Na Abraham de n’anim butuu fam seree, na ɔkaa no n’akomam sɛ: Yee! Wɔbɛwo ɔba ama deɛ wadi mfirinhyia ɔha, na Sara a wadi mfeɛ aduɔkron no bɛwo anaa?

¹⁸Na Abraham ka kyerɛɛ Onyankopɔn sɛ: O, ɛnneɛ anka ma Ismael nya w’anim adom ɛ!

¹⁹ Na Onyankopɔn kaa sɛ: Ampaneampa, wo yere Sara bɛwo ɔba ama wo, na woato ne din Isak.[15] Na mɛma me ne no apam no agyina ayɛ daa apam ama n’asefoɔ a ɛbɛdi n’akyire no.

²⁰ Na Ismael ho deɛ, matie wo. Hwɛ, mɛhyira no, na mama no awo, na wadɔɔso pii pa ara. Atitire dummienu na ɔbɛwoɔ, na mayɛ no ɔman kɛseɛ.

²¹Na m’apam deɛ, me ne Isak a Sara bɛwo no ama wo afeda sɛsɛɛ no na ɛbɛpam ama no agyina.

²² Na ɔne no wiee kasa no, Onyankopɔn firii Abraham nkyɛn kɔɔ ɔsoro.

²³Na Abraham faa ne ba Ismael ne wɔn a wɔawo wɔn wɔ ne fie ne wɔn a ɔde ne sika tɔɔ wɔn nyinaa, Abraham fiefoɔ mu mmarima nyinaa, na ɔtwitwaa wɔn twetia da no ara, sɛdeɛ Onyankopɔn ka kyerɛɛ no no.

²⁴Na Abraham adi mfirinhyia aduɔkron nkron na wɔtwaa no twetia.

²⁵Na ne ba Ismael adi mfeɛ dummiɛnsa na wɔtwaa no twetia.

²⁶Da no ara na wɔtwitwaa Abraham ne ne ba Ismael twetia.

²⁷Na ne fie mmarima nyinaa, wɔn a wɔwoo wɔn ne fie ne wɔn a wɔde sika totɔɔ wɔn wɔ ahɔhoɔ nkyɛn, wɔtwitwaa wɔn twetia kaa ne ho.