Read New Revised Asante Twi Bible Gyenesis 2 Bible Online

Gyenesis 2 - New Revised Asante Twi Bible bible

Gyenesis 2

¹Na wɔwiee ɔsoro ne asase ne deɛ ɛwɔ mu nyinaa bɔ.

² Na da a ɛtɔ so nson no, na Onyankopɔn awie n’adwuma a ɔyɛeɛ no, na da a ɛtɔ so nson no, ɔhome firii n’adwuma a ɔyɛeɛ nyinaa ho.

³ Na Onyankopɔn hyiraa da a ɛtɔ so nson no so, na ɔtee ho, ɛfiri sɛ ɛno mu na ɔhome firii n’adwuma a ɔyɛeɛ wɔ adebɔ mu no nyinaa ho.

⁴Yei ne sɛdeɛ AWURADE Nyankopɔn bɔɔ ɔsoro ne asase.

⁵Na afuo mu nnua nyinaa nnya mmaa asase so, na afuo mu nhahan nyinaa nnya mfifirii, ɛfiri sɛ na AWURADE Nyankopɔn nnya ntɔɔ nsuo nguu asase no so, na na onipa a ɔbɛdɔ asase nni hɔ.

⁶Na nsuo firi asase so foroe, na ɛfɔɔ asase ani nyinaa.

⁷ Na AWURADE Nyankopɔn de fam dɔteɛ nwonoo onipa, na ɔhuu nkwa home guu ne hwene mu, na onipa yɛɛ ɔkra teasefoɔ.

⁸Na AWURADE Nyankopɔn yɛɛ turo bi wɔ Eden a ɛwɔ apueeɛ fam, na ɔde onipa a ɔnwonoo no no tenaa hɔ.

⁹ Na AWURADE Nyankopɔn maa nnua ahodoɔ nyinaa a wɔhwɛ a, ɛyɛ fɛ, na ɛyɛ sɛ wɔdie asase no so, ne nkwa dua a ɛsi turo no mfimfini, ne papa ne bɔne ho nimdeɛ dua fifirii asase no so.

¹⁰Na asuo bi tene firi Eden bɛfɔ turo no, na ɛfiri hɔ ara na emu paapae yɛɛ nsutire nnan.

¹¹Deɛ ɛdi kan no din de Pison, ɛno na ɛkonton twa Hawila asase a sika wɔ soɔ no nyinaa ho hyiae.

¹²Na asase no so sika yɛ papa. Ɛhɔ na bedola aduhwam ne apopobibireboɔ wɔ.

¹³Na asuo a ɛtɔ so mmienu no din de Gihon. Ɛno na ɛkonton twa Kus[2] asase nyinaa ho hyia.

¹⁴Na asuo a ɛtɔ so mmiɛnsa no ne Tigri,[3] ɛno na ɛsene wɔ Asiria apueeɛ. Na asuo a ɛtɔ so nnan ne Eufrate.

¹⁵Na AWURADE Nyankopɔn de onipa no kɔtenaa Eden turom sɛ ɔnnɔ na ɔnwɛn hɔ.

¹⁶Na ɔhyɛɛ onipa no sɛ: Turom ha nnua nyinaa, di bi.

¹⁷ Na mmom papa ne bɔne ho nimdeɛ dua no deɛ, nni; ɛfiri sɛ da a wobɛdi bie no, wuo na wobɛwuo.

¹⁸ Na AWURADE Nyankopɔn kaa sɛ: Ɛnyɛ sɛ onipa nko tena; mɛyɛ ne nsɛsoɔ boafoɔ mama no.

¹⁹Na AWURADE Nyankopɔn de dɔteɛ nwonoo wiram mmoadoma, ne ewiem nnomaa nyinaa, na ɔde wɔn baa onipa no nkyɛn sɛ ɔbɛhunu sɛdeɛ ɔbɛfrɛ wɔn. Na deɛ onipa de frɛɛ abɔdeɛ a ɛte aseɛ biara no, ɛno ara ne ne din.

²⁰Na onipa totoo afiemmoa, ewiem nnomaa ne wiram mmoadoma nyinaa din. Nanso onipa deɛ wɔannya ne boafoɔ a ɔfata amma no.

²¹Na AWURADE Nyankopɔn maa nnahɔɔ tɔɔ onipa no so, na ɔdae. Na ɔyii ne mfe mpadeɛ mu baako, na ɔde nam tuaa ananmu.

²² Na AWURADE Nyankopɔn de mpadeɛ a ɔyi firii onipa no mu no yɛɛ ɔbaa, na ɔde no brɛɛ onipa no.

²³Na onipa no kaa sɛ: Ampa ara, me nnompe mu dompe, ne me honam mu nam ankasa nie. Oyi na wɔbɛfrɛ no Ɔbaa, ɛfiri sɛ Ɔbarima mu na wɔyii no firiiɛ.

²⁴ Saa nti na ɔbarima bɛgya n’agya ne na hɔ, na ɔde ne ho akɔbata ne yere ho, na wɔayɛ honam korɔ.

²⁵Na wɔn baanu no deda adagya, ɔbarima no ne ne yere, nanso wɔn ani anwu.