Read New Revised Asante Twi Bible Gyenesis 23 Bible Online

Gyenesis 23 - New Revised Asante Twi Bible bible

Gyenesis 23

¹Na Sara nkwa nna a ɔdiiɛ nyinaa yɛ mfirinhyia ɔha aduonu nson.

²Na Sara wuu wɔ Kiriat-arba, (ɛne Hebron) a ɛwɔ Kanaan asase soɔ no. Na Abraham ba bɛsuu Sara abia; ɔsuu no.

³Na Abraham sɔre firii n’amu no anim, na ɔne Het mma kɔkasaa sɛ:

⁴ Meyɛ mo nkyɛn hɔhoɔ ne mamfrani, momma me amusiebea wɔ mo nkyɛn, na mensie m’amu yi ma no mfiri m’ani so.

⁵Na Het mma no buaa Abraham see no sɛ:

⁶Owura, tie yɛn! Okunini bi ne wo wɔ yɛn mu. Yɛn ada mu deɛ wopɛ no, sie w’amu no wɔ mu. Yɛn mu biara renkame wo ne da, sɛ nsie w’amu wɔ mu.

⁷Na Abraham sɔre gyinae, na ɔbɔɔ ne mu ase maa asase no so nkurɔfoɔ, Het mma no,

⁸na ɔne wɔn kasaa sɛ: Sɛ ɛyɛ mo pɛ sɛ mesie m’amu yi ma no firi m’ani so a, montie me, na monsrɛ Efron, Sohar ba, mma me,

⁹na ɔmfa Makpela bodan a ɛyɛ ne deɛ, na ɛwɔ n’afuo ano no mma me; ɔnnye me n’abotene na ɔmfa mma me, na mennya asieeɛ wɔ mo ha.

¹⁰Na Efron te Het mma no mu. Na Hetini Efron buaa Abraham maa Het mma no tee wɔ wɔn a wɔhyɛne ne kuro pono mu no nyinaa anim sɛ:

¹¹Dabi, me wura, tie me: Mede afuo no mema wo, na ɔbodan a ɛwɔ mu no nso mede mema wo. Me man mma anim na mede ma woɔ yi, sie w’amu.

¹²Na Abraham bɔɔ ne mu ase wɔ asase no so nkurɔfoɔ no anim,

¹³na ɔkasa kyerɛɛ Efron maa asase no so nkurɔfoɔ no tee sɛ: Sɛ wotie me a, mede afuo no tiri dwetɛ bɛma wo; gye no me nsam, na mensie m’amu wɔ hɔ.

¹⁴Na Efron buaa Abraham see no sɛ:

¹⁵Me wura, tie, nnwetɛbena ahanan asase yɛ deɛn wɔ me ne wo ntam? W’amu ara na sie.

¹⁶Na Abraham tiee Efron, na Abraham karii dwetɛ a Efron bɔɔ din maa Het mma teeɛ no maa no, nnwetɛbena ahanan a adwadifoɔ die no.

¹⁷Na wɔde Efron afuo a ɛwɔ Makpela a ɛda Mamre ntentensoɔ no, afuo no ne ɔbodan a ɛwɔ mu no ne afuo no so nnua nyinaa, deɛ ɛwɔ n’ahyeɛ nyinaa soɔ,

¹⁸hyɛɛ Abraham nsa wɔ Het mma no anim, wɔn a wɔhyɛne ne kuro pono mu no nyinaa anim.

¹⁹Na ɛno akyiri no, Abraham siee ne yere Sara wɔ Makpela afuo mu ɔbodan mu, wɔ Mamre ntentensoɔ, (a ɛne Hebron) a ɛwɔ Kanaan asase soɔ no.

²⁰ Na Het mma de afuo no ne ɔbodan a ɛwɔ mu no hyɛɛ Abraham nsa sɛ amusiebea.