Read New Revised Asante Twi Bible Gyenesis 27 Bible Online

Gyenesis 27 - New Revised Asante Twi Bible bible

Gyenesis 27

¹Na Isak bɔɔ akɔkoraa na n’ani so yɛɛ no kusukusu na ɔnhunu adeɛ yie no, ɔmaa wɔfrɛɛ ne ba panin Esau ka kyerɛɛ no sɛ: Me ba! Na ɔgyee so sɛ: Agya, menie.

²Na ɔse: Mabɔ akora, na mennim me wuda.

³Afei fa w’ahayɔdeɛ, w’agyan kotokuo ne w’agyan kɔ wiram kɔpɛ hanam brɛ me,

⁴ na noa akɔnnɔduane sɛdeɛ mepɛ brɛ me, na menni, na me nhyira wo ansa na mawu.

⁵Ɛberɛ a Isak rekasa akyerɛ ne ba Esau no, Rebeka tee. Na Esau kɔɔ wiram sɛ ɔrekɔkum nam aba.

⁶Na Rebeka ka kyerɛɛ ne ba Yakob sɛ: Hwɛ, metee sɛ w’agya rekasa kyerɛ wo nua Esau sɛ:

⁷Kɔpɛ hanam brɛ me, na noa m’akɔnnɔduane, na menni, na menhyira wo AWURADE anim ansa na mawu.

⁸Na afei, me ba, tie me nne, sɛdeɛ merehyɛ woɔ yi:

⁹Kɔ mmoakuo no mu kɔkyere mmirekyie mma pa mmienu brɛ me, na memfa menyɛ akɔnnɔduane memma w’agya sɛdeɛ ɔpɛ;

¹⁰na fa kɔma w’agya, na ɔnni, na ɔnhyira wo ansa na wawu.

¹¹ Na Yakob ka kyerɛɛ ne na Rebeka sɛ: Hwɛ, me nua Esau ho wɔ nwi, na me deɛ, me ho yɛ toromtorom.

¹²Ebia m’agya bɛka me ho ahwɛ, na mayɛ n’ani so sɛ ɔdaadaafoɔ, na mede nnome maba me so, na ɛnyɛ nhyira.

¹³Ɛnna ne na ka kyerɛɛ no sɛ: Wo nnome mmra me so, me ba, tie me nne ara, na kɔkyere wɔn brɛ me.

¹⁴Na ɔkɔkyeree wɔn brɛɛ ne na, na ne na de yɛɛ akɔnnɔduane sɛdeɛ n’agya pɛ.

¹⁵Na Rebeka faa ne ba panin Esau ntadeɛ fɛfɛ a ɛwɔ ne nkyɛn wɔ ɛdan mu de hyɛɛ ne ba kumaa Yakob.

¹⁶Na ɔde mmirekyie mma no nwoma duraduraa ne nsa ne ne kɔn a ɛho yɛ toromtorom no ho.

¹⁷Na ɔde akɔnnɔduane ne paanoo a wasiesie no hyɛɛ ne ba Yakob nsa.

¹⁸Na ɔde kɔɔ n’agya nkyɛn, na ɔse: M’agya! Na ɔgyee so sɛ: Menie, ɛyɛ wo hwan a, me ba?

¹⁹Na Yakob ka kyerɛɛ n’agya sɛ: Ɛyɛ me, w’abakan Esau. Mayɛ sɛdeɛ wokyerɛɛ me no. Mesrɛ wo, sɔre, tena ase, na di me hanam, na wo kra nhyira me.

²⁰Na Isak bisaa ne ba no sɛ: Ɛyɛɛ dɛn na wonyaa no ntɛm sɛɛ yi, me ba? Na ɔse: Ɛfiri sɛ AWURADE wo Nyankopɔn na ɔmaa me hyiaa yie.

²¹Na Isak ka kyerɛɛ Yakob sɛ: Twe pini me, na menka wo menhwɛ, me ba, sɛ ampa ara sɛ me ba Esau ne wo anaasɛ ɛnyɛ ɔno a.

²²Na Yakob twe pinii n’agya Isak, na ɔde ne nsa kaa ne ho hwɛe, na ɔkaa sɛ: Ɛnne no yɛ Yakob nne, na nsa no deɛ, ɛyɛ Esau nsa.

²³Na wanhu no, ɛfiri sɛ na ne nsa ho wɔ nwi te sɛ ne nua Esau deɛ. Enti ɔhyiraa no.

²⁴Na ɔbisaa no sɛ: Ampa ara sɛ wone me ba Esau anaa? Na ɔse: Mene no.

²⁵Na ɔse: Fa pini me nkyɛn, na menni me ba hanam, na me kra nhyira wo. Na ɔde brɛɛ no, na ɔdii, na ɔde bobesa brɛɛ no, na ɔnomee.

²⁶Na n’agya Isak ka kyerɛɛ no sɛ: Twe pini bɛfe m’ano ɛ, me ba.

²⁷Na ɔtwe pinii kɔfee n’ano. Na Isak huaa n’atadeɛ mu hwa hwɛe, na ɔhyiraa no sɛ: Hwɛ, me ba ho hwa te sɛ afuo a AWURADE ahyira soɔ mu hwa.

²⁸Onyankopɔn mma wo ɔsoro bosuo ne asase mu sradeɛ bi, ne aburoo ne nsa pii.

²⁹ Aman nsom wo, na nkurɔfoɔ nkoto wo. Yɛ wo nuanom so wura, na wo na mma nkoto wo. Wɔadome wɔn a wɔdome woɔ, na wɔahyira wɔn a wɔhyira woɔ.

³⁰Na Isak wiee Yakob hyira na Yakob firii n’agya nkyɛn firii adi ara pɛ na ne nua Esau firi n’ahayɔ baeɛ.

³¹Na ɔno nso bɛnoaa akɔnnɔduane de brɛɛ n’agya ka kyerɛɛ n’agya sɛ: M’agya sɔre ɛ, na di wo ba hanam, na wo kra nhyira me!

³²Na n’agya Isak see no sɛ: Ɛyɛ wo hwan a? Na ɔse: Ɛyɛ me, wo ba, w’abakan Esau.

³³Na Isak de ahopopoɔ kɛseɛ pa ara kaa sɛ: Hwan mpo ne deɛ ɔkɔyɛɛ ha de brɛɛ me, na medii ne nyinaa na mehyiraa no ansa na woreba yi? Nso ɔbɛyɛ deɛ wɔahyira no.

³⁴ Esau tee n’agya nsɛm no, ɔde su kɛseɛ ne awerɛhoɔ pii teaa mu denden ka kyerɛɛ n’agya sɛ: M’agya, hyira me nso bi.

³⁵Na ɔse: Wo nua de nnaadaa aba abɛgye wo nhyira.

³⁶ Na ɔse: Ne din nne Yakob anaa? Mprenu ni na watwintwane m’anan mu. Wafa me panin, na hwɛ, afei nso wagye me nhyira. Na ɔse: Woamfa nhyira bi ansie me?

³⁷Na Isak bua see Esau sɛ: Hwɛ, mede no mayɛ wo so wura, na mede ne nuanom nyinaa mayɛ ne nkoa. Na mede aburoo ne nsa mawowa no. Na afei wo deɛ, ɛdeɛn na menyɛ woɔ, me ba?

³⁸Na Esau ka kyerɛɛ n’agya sɛ: M’agya, nhyira baako pɛ na wowɔ? Hyira me nso, m’agya. Na Esau maa ne nne so sui.

³⁹Na n’agya Isak bua see no sɛ: Hwɛ, asase a sradeɛ nni mu ne deɛ ɔsoro bosuo ngu soɔ so na wobɛtena.

⁴⁰ Wo nkrantɛ so na wonam bɛtena aseɛ, na wobɛsom wo nua. Nanso ɛbɛba sɛ wobɔ mmɔden kentene wo ho a, wobɛyi ne kɔnnua afiri wo kɔn so.

⁴¹Na Esau tanee Yakob wɔ nhyira a n’agya de hyiraa no no nti. Na Esau kaa no n’akoma mu sɛ: Nna a wɔde bɛsu m’agya no reyɛ abɛn, na merebɛkum me nua Yakob.

⁴²Na wɔkɔkaa ne ba panin Esau nsɛm yi kyerɛɛ Rebeka. Na ɔsoma maa wɔkɔfrɛɛ ne ba kumaa Yakob, na ɔka kyerɛɛ no sɛ: Hwɛ, wo nua Esau rekyekyere ne werɛ sɛ ɔrebɛku wo.

⁴³ Afei, me ba, tie me nne, na sɔre dwane kɔ me nua Laban nkyɛn wɔ Haran,

⁴⁴na tena ne nkyɛn nna tiaa kɔsi sɛ wo nua anibereɛ no bɛfiri ne mu,

⁴⁵kɔsi sɛ wo nua abufuo bɛdane afiri wo soɔ, na ne werɛ afiri deɛ woyɛɛ no no, ansa na masoma ama wɔabɛfa wo wɔ hɔ aba. Na adɛn nti koraa na ɛsɛ sɛ mehwere mo baanu da koro?

⁴⁶ Na Rebeka ka kyerɛɛ Isak sɛ: Het mmammaa nti m’asetena afono me. Sɛ Yakob kɔware yerɛ Het mmammaa mu, sɛ yeinom a wɔwɔ ɛha yi a, na me mmerɛ ngui, na mete ase reyɛ deɛn bio?