Read New Revised Asante Twi Bible Gyenesis 30 Bible Online

Gyenesis 30 - New Revised Asante Twi Bible bible

Gyenesis 30

¹Na Rahel hunuu sɛ ɔnwo mma Yakob no, ɔtwee ne nuabaa no ho kora, na ɔka kyerɛɛ Yakob sɛ: Ma me mma, na anyɛ saa a, mɛwu.

² Na Yakob bo fuu Rahel kaa sɛ: Mesi Nyankopɔn a ɔkame wo wo yam mma no ananmu anaa?

³ Na Rahel kaa sɛ: Hwɛ, m’afenaa Bilha nie, wo ne no nna, na ɔnwo ngu me srɛ so, na me nso mennya ne ho mma.

⁴Na ɔde n’abaawa Bilha maa no awareɛ, na Yakob ne no dae.

⁵Na Bilha nyinsɛnee, na ɔwoo ɔbabarima maa Yakob.

⁶Na Rahel kaa sɛ: Onyankopɔn adi m’asɛm, na watie me nne nso ama me ɔba. Enti ɔtoo no din Dan.[31]

⁷Na Rahel abaawa Bilha nyinsɛnee bio, na ɔwoo ɔbabarima a ɔtɔ so mmienu maa Yakob.

⁸Na Rahel kaa sɛ: Ako akɛseɛ na me ne me nuabaa adie, nso matumi no. Na ɔtoo no din Naftali.[32]

⁹ Na Lea hunuu sɛ n’awoɔ mu atwe no, ɔde n’abaawa Silpa maa Yakob awareɛ.

¹⁰Na Lea abaawa Silpa woo ɔbabarima maa Yakob.

¹¹Na Lea kaa sɛ: Aba yie. Na ɔtoo no din Gad.[33]

¹²Na Lea abaawa Silpa woo ɔbabarima a ɔtɔ so mmienu maa Yakob.

¹³Na Lea kaa sɛ: M’ahotɔ nie! Na mmaa bɛfrɛ me deɛ wɔahyira no. Na ɔtoo no din Aser.[34]

¹⁴Na ayuo twaberɛ mu no, Ruben firii adi kɔhunuu dudaim[35] wɔ wiram, na ɔde brɛɛ ne na Lea. Na Rahel ka kyerɛɛ Lea sɛ: Ma me wo ba dudaim yi bi ɛ!

¹⁵Na ɔka kyerɛɛ no sɛ: Ɛnnɔɔso sɛ woafa me kunu? Na worebɛgye me ba dudaim nso anaa? Na Rahel se: Wo ba dudaim no nti ma ɔne wo nkɔda anadwo yi.

¹⁶Na anwummerɛ a Yakob firi wiram reba no, Lea firii adi kɔhyiaa no kaa sɛ: Bra me nkyɛn, ɛfiri sɛ ampa ara mede me ba dudaim matɔ wo. Na ɔne no daa anadwo no.

¹⁷Na Onyankopɔn tiee Lea, na ɔnyinsɛnee, na ɔwoo ɔbabarima a ɔtɔ so nnum maa Yakob.

¹⁸Na Lea kaa sɛ: Onyankopɔn atua me ka, sɛ mede m’abaawa mama me kunu awareɛ. Na ɔtoo no din Isakar.[36]

¹⁹Na Lea nyinsɛnee bio, na ɔwoo ɔbabarima a ɔtɔ so nsia maa Yakob.

²⁰Na Lea kaa sɛ: Onyankopɔn akyɛ me akyɛdeɛ pa, afei deɛ, me kunu ne me bɛtena yie, ɛfiri sɛ mawo mmammarima baasia mama no. Na ɔtoo no din Sebulon.[37]

²¹Na ɛno akyiri no, ɔwoo ɔbabaa, na ɔtoo no din Dina.

²² Na Onyankopɔn kaee Rahel, na Onyankopɔn tiee no, na ɔbuee ne yam.

²³ Na ɔnyinsɛnee, na ɔwoo ɔbabarima, na ɔse: Onyankopɔn ayi m’ahohora.

²⁴Na ɔtoo no din Yosef[38] sɛ: AWURADE mma me ɔba foforɔ nka ne ho.

²⁵Na Rahel woo Yosef no, Yakob ka kyerɛɛ Laban sɛ: Gya me kwan na menkɔ me kurom ne m’asase so.

²⁶ Fa me yerenom ne me mma a wɔn nti mesomm woɔ no ma me. Wo ara wonim me som a masom woɔ.

²⁷ Na Laban ka kyerɛɛ no sɛ: Ma mennya w’anim animuonyam, na mahunu sɛ wo nti AWURADE ahyira me.

²⁸Kyerɛ me w’akatua a woregye me, na mɛma.

²⁹Na Yakob see no sɛ: Wo ara wonim sɛdeɛ masom wo afa ne sɛdeɛ wo mmoakuo ayɛ wɔ m’aseɛ.

³⁰Mebaa wo nkyɛn no, na deɛ wowɔ no sua, na afei aseɛ atrɛ ayɛ pii, na AWURADE ahyira wo baabiara a mefa. Na afei da bɛn na menhwɛ me fie nso?

³¹Na ɔbisaa sɛ: Ɛdeɛn na memma woɔ? Na Yakob se: Mma me biribiara; sɛ wobɛyɛ saa adeɛ yi ama me deɛ a, mɛsane mabɛyɛne wo nnwan na mahwɛ wɔn.

³²Ɛnnɛ mɛkɔ makɔfa wo nnwan nyinaa mu, na mayiyi emu nnwan a wɔn ho yɛ ntokontrama ne nworonnworan nyinaa ne nnwammire nyinaa wɔ nnwanten no mu ne mmirekyie no mu nworonnworan ne ntokontrama. Wɔn a wɔtete sɛɛ na ɛnyɛ m’akatua.

³³Na daakye bi a wobɛka m’akatua ho asɛm no, me tenenee abua ama me wɔ w’anim. Mmirekyie no mu biara a ne ho nyɛ ntokontrama ne nworonnworan, ne nnwanten no mu deɛ ɔnyɛ odwammire no, ma wɔmmu no awifodeɛ wɔ me nsam.

³⁴Na Laban se: Hwɛ, ma no nyɛ sɛdeɛ woaka yi ɛ!

³⁵Na da no ara ɔyiyii mpapo a wɔn ho yɛ nsensannsensan ne nworonnworan, ne mmirekyibereɛ a wɔn ho yɛ ntokontrama ne nworonnworan nyinaa, obiara a fufuo wɔ ne ho, ne nnwanten no mu nnwammire nyinaa. Na ɔde wɔn hyɛɛ ne mmammarima nsa.

³⁶Na ɔde nnansa kwan too ɔne Yakob ntam, na Yakob yɛnee Laban nnwan a ɛkaeɛ no.

³⁷Na Yakob faa sɛsɛ dua, ɛdwono dua ne kyɛnkyɛn dua mman mono, na ɔyiyii ho nsema fitafitaa maa mmaa no ho fitaa no fifirii adi.

³⁸Na ɔde mmaa a ɔyiyii ho no guu anomeeɛ adaaseɛ a nnwan no rebɛnom mu nsuo no mu wɔ nnwan no anim, na wɔba nsunom a, wɔanyenyem so.

³⁹Na nnwan no nyenyem mmaa no so, na wɔwowoo nsensannsensan, ntokontrama ne nworonnworan.

⁴⁰Na Yakob yiyii nnwammaa no, na ɔde nnwan no ani kyerɛɛ Laban nnwan no mu nsensannsensan ne nnwammire nyinaa. Na ɔyɛɛ ɔno ara nnwankuo nko wɔ fa baabi, na wamfa wɔn amfra Laban nnwan no mu.

⁴¹Na sɛ daa nnwan a wɔn ho yɛ den no nyenyem a, na Yakob de mmaa no akɔgu adaaseɛ no mu wɔ nnwan no anim, na wɔanyenyem mmaa no so.

⁴²Na nnwan no yɛ nofonofo deɛ a, ɔmfa ngu mu. Na wɔn a wɔyɛ mmerɛ no yɛɛ Laban dea, na wɔn a wɔn ho yɛ den no yɛɛ Yakob dea.

⁴³ Na ɔbarima no yɛɛ kɛseɛ pa ara, na ɔnyaa nnwan pii ne mfenaa ne nkoa ne yoma ne mfunumu.