Read New Revised Asante Twi Bible Gyenesis 37 Bible Online

Gyenesis 37 - New Revised Asante Twi Bible bible

Gyenesis 37

¹Na Yakob tenaa asase a n’agya yɛɛ so hɔhoɔ a ɛne Kanaan asase no so.

²Na yei ne Yakob abusua ho abakɔsɛm: Yosef dii mfirinhyia dunson no, ɔne ne nuanom kɔhwɛɛ nnwan; na aberantewaa no ne n’agya yerenom Bilha ne Silpa mma na ɛwɔ hɔ. Na Yosef bɛka wɔn ho asɛmmɔne kyerɛ n’agya.

³Na ɛsiane sɛ Yosef yɛ ne nkɔkoraaberɛ mu ba nti, na Israel dɔ no sene ne mma nyinaa; enti ɔpam batakari fɛfɛ bi maa no.

⁴Na ne nuanom hunuu sɛ wɔn agya dɔ no sene wɔn nyinaa no, wɔtanee no, na wɔmfa abodwoɔ ne no nkasa.

⁵Na Yosef soo daeɛ, na berɛ a ɔka kyerɛɛ ne nuanom no, wɔtanee no senee akane no.

⁶Na ɔka kyerɛɛ wɔn sɛ: Montie daeɛ a maso yi:

⁷Na hwɛ, na yɛrekyekyere ayuo afiafi wɔ afuom. Na m’afi no sɔre gyinaa kyirebenn, na hwɛ, mo afiafi no twaa m’afi ho hyiae, na ɛrekoto m’afi no.

⁸Na ne nuanom ka kyerɛɛ no sɛ: Kyerɛ sɛ worebɛdi yɛn so hene anaasɛ worebɛdi yɛn so tumi? Na ne daeɛ ne ne nsɛm no nti wɔkɔɔ so tanee no bebree.

⁹Na ɔsoo daeɛ foforɔ bio, na ɔka kyerɛɛ ne nuanom sɛ: Hwɛ, maso daeɛ bio, na hwɛ, owia ne ɔsrane ne nsoromma dubaako akoto me.

¹⁰Na ɔka kyerɛɛ n’agya ne ne nuanom no, n’agya kaa n’anim sɛ: Daeɛ bɛn na woaso yi? Kyerɛ sɛ, me ne wo na ne wo nuanom bɛba abɛkoto fam wɔ w’anim?

¹¹Na ne nuanom ani beree no; na n’agya deɛ, ɔde nsɛm no siee.

¹² Na ne nuanom de wɔn agya nnwan kɔɔ adidie wɔ Sekem.

¹³Na Israel ka kyerɛɛ Yosef sɛ: Sɛ wonim sɛ wo nuanom rewɛn mmoa wɔ Sekem. Bra na mensoma wo wɔn nkyɛn. Na ɔse: Menie.

¹⁴ Na ɔka kyerɛɛ no sɛ: Kɔ na kɔhwɛ sɛ wo nuanom ne nnwan no ho yɛ anaa; na sane bɛka kyerɛ me. Na ɔsomaa no firii Hebron bonhwa mu, na ɔkɔduruu Sekem.

¹⁵Na ɔbarima bi hunuu no, na hwɛ, na ɔrewɔ wira no mu ntwɛtwɛdɛ. Na ɔbarima no bisaa no sɛ: Worehwehwɛ deɛn?

¹⁶Na ɔka kyerɛɛ no sɛ: Me nuanom na merehwehwɛ wɔn; mesrɛ wo, kyerɛ me faako a wɔrehwɛ wɔn mmoa no.

¹⁷Na ɔbarima no se: Wɔatu ha; na metee sɛ wɔreka sɛ: Momma yɛnkɔ Dotan. Na Yosef tii ne nuanom, na ɔkɔhunuu wɔn wɔ Dotan.

¹⁸Na ne nuanom hunuu no akyirikyiri na ɔnnya nnuruu wɔn nkyɛn no, wɔpamm ne tiri so sɛ wɔbɛku no.

¹⁹Na wɔsesee wɔn ho wɔn ho sɛ: Hwɛ, ɔdaeɛsofoɔ no na ɔreba no.

²⁰Afei mommra mma yɛnku no mfa no nto mmura yi bi mu, na yɛnka sɛ: Aboa bɔne bi na awe no, na yɛahwɛ deɛ ne daeɛ no bɛyɛ.

²¹ Na Ruben teeɛ no, ɔgyee no firii wɔn nsam kaa sɛ: Mommma yɛnnku no.

²²Na ɔkaa sɛ: Monnhwie mogya nngu, na momfa no nto ɛserɛ so ha abura yi mu; na mommfa mo nsa nnka no. Ɔreyɛ na anka wayi no afiri wɔn nsam de no asane akɔma n’agya.

²³ Na Yosef duruu ne nuanom nkyɛn no, wɔworɔɔ n’atadeɛ ne batakari fɛfɛ a ɔhyɛ no,

²⁴ na wɔde no kɔtoo abura no mu. Nso na abura no da mpan a nsuo nni mu.

²⁵Na wɔtenaa ase didii. Na wɔmaa wɔn ani so hwɛe, wɔhunuu Ismaelfoɔ akwantufoɔkuo bi a wɔfiri Gilead rekɔ Misraim ne wɔn yoma a wɔsoso hyehwam ne akyenkyennuro ne kurobo sɛ wɔreba.

²⁶Na Yuda ka kyerɛɛ ne nuanom sɛ: Sɛ yɛkum yɛn nua na yɛsi ne mogya so a, mfasoɔ bɛn na ɛwɔ mu?

²⁷Mommra mma yɛntɔn no mma Ismaelfoɔ. Mommma yɛmmfa yɛn nsa nnka no, ɛfiri sɛ ɔyɛ yɛn nua ne yɛn mogya. Na ne nuanom no tiee no.

²⁸ Na Midianfoɔ adwadifoɔ bi rebɛsene. Na wɔtwetwee Yosef yii no firii abura no mu, na wɔtɔn no maa Ismaelfoɔ no gyee nnwetɛbena aduonu. Na wɔde Yosef kɔɔ Misraim.

²⁹ Na Ruben sane baa abura no so, na hwɛ, na Yosef nni abura no mu. Na ɔsunsuanee ne ntadeɛ mu,

³⁰na ɔsane baa ne nuanom nkyɛn bɛkaa sɛ: Abɔfra no nni hɔ, na afei ɛdeɛn na menyɛ?

³¹Na wɔfaa Yosef atadeɛ no, na wɔkumm ɔpapo bi, na wɔde atadeɛ no bɔɔ mogya no mu.

³²Na wɔsoma maa wɔde batakari fɛfɛ no brɛɛ wɔn agya bɛkaa sɛ: Yei na yɛahunu, hwɛ sɛ wo ba no atadeɛ ni anaa?

³³ Na ɔhwɛeɛ no, ɔkaa sɛ: Ɛyɛ me ba no atadeɛ a! Aboa bɔne bi na awe no, ampa ara wɔatete Yosef mu.

³⁴ Ɛnna Yakob sunsuanee ne ntadeɛ mu, na ɔde ayitoma bɔɔ n’asene, na ɔsuu ne ba no kyɛree.

³⁵Na ne mmammarima nyinaa ne ne mmammaa nyinaa bae sɛ wɔbɛkyekyere ne werɛ, nanso wamma wɔankyekyere ne werɛ. Na ɔkaa sɛ: Mede awerɛhoɔ yi ara bɛkɔ me ba nkyɛn wɔ Asamando. Na n’agya suu no.

³⁶Na Midianfoɔ no kɔtɔnee no wɔ Misraim maa Potifar a ɔyɛ Farao piani ne n’ankɔbeafoɔ so panin no.