Read New Revised Asante Twi Bible Gyenesis 39 Bible Online

Gyenesis 39 - New Revised Asante Twi Bible bible

Gyenesis 39

¹ Na wɔde Yosef kɔɔ Misraim. Na Farao piani Potifar a ɔyɛ ankɔbeafoɔ so panin na ɔyɛ Misraimni no tɔɔ no Ismaelfoɔ a wɔde no kɔɔ hɔ no nsam.

²Na AWURADE dii Yosef akyi, na ɔyɛɛ ɔbarima a ne ho wɔ siadeɛ, na ɔtenaa ne wura Misraimni no fie.

³Na ne wura hunuu sɛ AWURADE di n’akyi na AWURADE ma deɛ ɔyɛ nyinaa yɛ yie n’abasa soɔ no,

⁴Yosef nyaa n’anim adom, na ɔsom no; na ɔde no sii ne fie so, na ɔde deɛ ɔwɔ nyinaa hyɛɛ ne nsa.

⁵ Na ɛfiri berɛ a ɔde no sii ne fie ne deɛ ɔwɔ nyinaa soɔ no, Yosef nti AWURADE hyiraa Misraimni no fie, na AWURADE nhyira baa deɛ ɔwɔ nyinaa so, efie ne afuom.

⁶Na ɔde deɛ ɔwɔ nyinaa hyɛɛ Yosef nsa, na ɔwɔ hɔ nti, ɔnhwɛ biribiara gye aduane a ɔno ara die. Nso na Yosef ho ne n’anim yɛ fɛ.

⁷ Na ɛbaa sɛ akyire yi no, Yosef wura yere tuu n’ani sii ne so, na ɔkaa sɛ: Wo ne me mmɛda.

⁸Nanso wampene, na ɔka kyerɛɛ ne wura yere no sɛ: Hwɛ, sɛ me wura anya me nti ɔnhwɛ deɛ ɛwɔ ne fie, na ɔde deɛ ɔwɔ nyinaa ahyɛ me nsa.

⁹ Obiara nyɛ kɛseɛ nsene me efie ha, na ɔnkame me biribiara gye wo, ɛnam sɛ ne yere ne woɔ ntira. Na adɛn na menyɛ amumuyɛ kɛseɛ yi, na menyɛ bɔne mentia Onyankopɔn?

¹⁰Na ɔka kyerɛ Yosef saa daa daa, nanso Yosef antie sɛ ɔne no bɛda na ama ne nsa aka no.

¹¹Na da koro bi a ɔkɔɔ ɛdan no mu sɛ ɔrekɔyɛ n’adwuma, na efie hɔfoɔ no mu biara nni hɔ no,

¹²ne wura yere no sɔɔ n’atadeɛ mu kaa sɛ: Wo ne me mmɛda! Na Yosef gyaa n’atadeɛ no wɔ ne nsam dwane firii adi.

¹³Na ɔbaa no hunuu sɛ wagya n’atadeɛ wɔ ne nsam adwane afiri adie no,

¹⁴ɔfrɛfrɛɛ ne fiefoɔ ka kyerɛɛ wɔn sɛ: Monhwɛ, wakɔfa Hebrini yi aba rebɛdi yɛn ho fɛw; waba me nkyɛn sɛ ɔne me rebɛda, na mede nne kɛseɛ meteaa mu;

¹⁵na ɔtee sɛ memaa me nne soɔ meteaa mu no, ɔgyaa n’atadeɛ wɔ me nsam, na ɔdwane firii adi.

¹⁶Na ɔde n’atadeɛ no guu ne nkyɛn kɔsii sɛ ne wura baa fie.

¹⁷Na ɔkaa saa nsɛm yi ara kyerɛɛ no sɛ: Akoa Hebrini a wokɔfaa no brɛɛ yɛn no baa me nkyɛn sɛ ɔrebɛdi me ho fɛw;

¹⁸na memaa me nne so meteaa mu no, ɔgyaa n’atadeɛ wɔ me nsam, na ɔdwane firii adie.

¹⁹Na ne wura tee ne yere nsɛm a ɔka kyerɛɛ no sɛ: Saa adeɛ yi na w’akoa no ayɛ me no, ne bo fui.

²⁰Na Yosef wura no faa no de no kɔtoo afiase, deɛ ɔhene nneduafoɔ guo, na ɔdaa afiase hɔ.

²¹Na AWURADE dii Yosef akyi, na ɔdom no, na ɔmaa n’anim baa nyam wɔ afiasehwɛni no anim.

²²Na afiasehwɛni no de nneduafoɔ a wɔwɔ afiase hɔ nyinaa hyɛɛ Yosef nsa, na biribiara a na wɔyɛ no wɔ hɔ no, ɔno na na ɔhwɛ soɔ.

²³Afiasehwɛni no anha ne ho anhwɛ biribiara a ɛwɔ Yosef nsam, ɛfiri sɛ AWURADE dii n’akyi, na deɛ ɔyɛeɛ nyinaa, AWURADE maa no yɛɛ yie.