Read New Revised Asante Twi Bible Gyenesis 42 Bible Online

Gyenesis 42 - New Revised Asante Twi Bible bible

Gyenesis 42

¹Na Yakob hunuu sɛ aduane wɔ Misraim no, ɔka kyerɛɛ ne mmammarima no sɛ: Adɛn na mohwehwɛ mo ho anim yi?

²Na ɔse: Monhwɛ, mate sɛ aduane wɔ Misraim. Monsiane nkɔ hɔ nkɔtɔ bi wɔ hɔ mmrɛ yɛn, na yɛntena ase, na yɛanwu.

³Ɛnna Yosef nuanom mu du siane kɔɔ Misraim aduanetɔ.

⁴Na Yosef nua Benyamin deɛ, Yakob ansoma no anka ne nuanom no ho ankɔ, na ɔse: Ebia na mmusuo bi ato no.

⁵Na Israel mma no de wɔn ho fraa wɔn a wɔbaa aduanetɔ no mu, ɛfiri sɛ na ɛkɔm no aba Kanaan asase so bi.

⁶Na Yosef ne asase no so tumfoɔ, ɔne deɛ ɔtɔn aduane ma asase no sofoɔ nyinaa. Na Yosef nuanom ba bɛkotoo no de wɔn anim butubutuu fam.

⁷Na Yosef ani bɔɔ ne nuanom no anim no, ɔhunuu wɔn, nanso ɔyɛɛ ne ho sɛ ɔnanani wɔ wɔn anim, na ɔpoopoo n’ani kasa kyerɛɛ wɔn sɛ: Ɛhe na mofiri baeɛ? Na wɔse: Yɛfiri Kanaan asase so na yɛbaa aduanetɔ.

⁸Na Yosef hunuu ne nuanom no; na wɔn deɛ, wɔanhu no.

⁹ Na Yosef kaee daeɛ a ɔsosoo no wɔn ho no; na ɔka kyerɛɛ wɔn sɛ: Moyɛ akwansrafoɔ, asase yi adagya na morebɛhwehwɛ.

¹⁰Na wɔka kyerɛɛ no sɛ: Dabi, me wura, na aduanetɔ na wo nkoa baeɛ.

¹¹Yɛn nyinaa yɛ ɔbarima baako mma, yɛyɛ anokwafoɔ, wo nkoa nyɛ akwansrafoɔ.

¹²Na ɔka kyerɛɛ wɔn sɛ: Dabi, na asase yi adagya na moreba abɛhwehwɛ.

¹³Ɛnna wɔse: Wo nkoa yɛ anuanom dummienu. Yɛyɛ ɔbarima baako mma wɔ Kanaan asase so, na hwɛ, ɔkaakyire no wɔ yɛn agya nkyɛn nnɛ, na ɔbaako deɛ ɔnni hɔ.

¹⁴Ɛnna Yosef ka kyerɛɛ wɔn sɛ: Sɛ ɛteɛ ara ne sɛ meka mekyerɛɛ mo sɛ: Moyɛ akwansrafoɔ.

¹⁵Yei ho na mɛsɔ mo ahwɛ: Sɛ Farao te aseɛ yi, moremfiri ha nkɔ gye sɛ mo nua kumaa no ba ha ansa.

¹⁶Monsoma mo mu baako, na ɔnkɔfa mo nua no mmra, na mo deɛ, mongu afiase na wɔnhwehwɛ mo nsɛm mu, sɛ nokorɛ wɔ mu a; anyɛ saa deɛ a, sɛ Farao te aseɛ yi, moyɛ akwansrafoɔ.

¹⁷Na ɔde wɔn kɔguu afiase mu nnansa.

¹⁸Na da a ɛtɔ so mmiɛnsa no, Yosef ka kyerɛɛ wɔn sɛ: Monyɛ yei, na montena ase, na me deɛ, mesuro Onyankopɔn.

¹⁹Sɛ moyɛ anokwafoɔ a, momma wɔnkyere mo nuanom yi mu baako ntena mo nnedua fie ha, na mo deɛ, ɛkɔm a ɛwɔ mo afie mu nti, monsoa aduane nkɔ.

²⁰Na momfa mo nua kumaa no mmrɛ me, na mo nsɛm ayɛ nokorɛ, na moanwu. Na wɔyɛɛ saa.

²¹ Na wɔsesee wɔn ho wɔn ho sɛ: Ampa ara, yɛdi yɛn nua no ho fɔ, sɛ yɛhunuu n’ahohiahia, na ɔsrɛɛ yɛn mmɔborɔhunu, na yɛantie; enti na saa ɔhaw yi aba yɛn soɔ.

²² Na Ruben buaa wɔn sɛ: Manka ankyerɛ mo sɛ: Monnyɛ abɔfra no bɔne biara, na moantie? Na hwɛ, ne mogya na wɔrehwehwɛ yi.

²³Na wɔnnim sɛ Yosef te, ɛfiri sɛ ɔkyeame na ɔdi wɔn ntam yi wɔn ano.

²⁴Na ɔdanee ne ho firii wɔn nkyɛn kɔsui. Na ɔsane baa wɔn nkyɛn bio ne wɔn bɛkasae, na ɔyii Simeon wɔ wɔn mu, na ɔkyekyeree no wɔn anim hɔ ara.

²⁵Ɛnna Yosef hyɛɛ sɛ wɔmfa aburoo nhyehyɛ wɔn nkotokuo mama, na wɔnnane wɔn mu biara dwetɛ nhyɛ ne kotokuo mu, na wɔmma wɔn akwan so aduane. Na wɔyɛɛ wɔn saa.

²⁶Na wɔde wɔn aburoo no soasoaa wɔn mfunumu, na wɔfirii hɔ kɔe.

²⁷Na wɔn mu baako buee ne kotokuo ano sɛ ɔrema n’afunumu aduane wɔ asoɛeɛ no, ɔhunui, na hwɛ, na ne dwetɛ no hyɛ ne kotokuo ano.

²⁸Na ɔka kyerɛɛ ne nuanom sɛ: Wɔadane me dwetɛ no ama me, na hwɛ, ɛhyɛ me kotokuo mu. Na wɔn akoma tutui, na wɔde ahopopoɔ sesee wɔn ho wɔn ho sɛ: Ɛdeɛn na Onyankopɔn ayɛ yɛn yi?

²⁹Na wɔbaa wɔn agya Yakob nkyɛn Kanaan asase so, na wɔkaa deɛ ɛyɛɛ wɔn nyinaa kyerɛɛ no sɛ:

³⁰Ɔbarima a ɔyɛ asase no wura no poopoo n’ani kasa kyerɛɛ yɛn, na ɔbuu yɛn asase no so akwansrafoɔ.

³¹Na yɛsee no sɛ: Yɛyɛ anokwafoɔ, yɛnyɛ akwansrafoɔ.

³²Yɛyɛ yɛn agya mma anuanom dummienu, ɔbaako na ɔnni hɔ, na akumaa no wɔ yɛn agya nkyɛn wɔ Kanaan asase so seesei.

³³Na ɔbarima a ɔyɛ asase no wura no ka kyerɛɛ yɛn sɛ: Yei na mede bɛhunu sɛ moyɛ anokwafoɔ: Monnya mo nua baako wɔ me nkyɛn, na momfa aduane nkɔ nkɔhwɛ mo afiafi,

³⁴na momfa mo nua kumaa no mmrɛ me, na mahunu sɛ monyɛ akwansrafoɔ, na moyɛ anokwafoɔ, na mayi mo nua no ama mo, na moadi asase yi so dwa.

³⁵Na ɛbaa sɛ wɔreyiyi wɔn nkotokuo mu adeɛ no, na hwɛ, wɔn mu biara dwetɛ boa hyɛ ne kotokuo mu. Na wɔne wɔn agya hunuu wɔn dwetɛ mmoa no, wɔsuroe.

³⁶Na wɔn agya Yakob ka kyerɛɛ wɔn sɛ: Moagye me nsam mma: Yosef nni hɔ, Simeon nni hɔ, na morebɛfa Benyamin nso akɔ. Me so na yei nyinaa ba!

³⁷Na Ruben ka kyerɛɛ n’agya sɛ: Sɛ mamfa no mansane mammrɛ wo a, kum me mmammarima baanu. Fa no hyɛ me nsa, na mede no bɛsane abrɛ wo.

³⁸Na ɔse: Me ba ne mo renkɔ, ɛfiri sɛ ne nua awu, na aka ɔno nko, na sɛ mmusuo bi kɔto no wɔ kwan a morekorɔ no mu a, ɛnneɛ mode me dwono bɛkɔ Asamando awerɛhoɔ mu.