Read New Revised Asante Twi Bible Gyenesis 43 Bible Online

Gyenesis 43 - New Revised Asante Twi Bible bible

Gyenesis 43

¹Na ɛkɔm no mu yɛɛ den wɔ asase no so.

²Na wɔwiee aduane a wɔde firi Misraim baeɛ no die no, wɔn agya ka kyerɛɛ wɔn sɛ: Monsane nkɔtɔ aduane kakra mmrɛ yɛn.

³ Na Yuda ka kyerɛɛ no sɛ: Ɔbarima no hyɛɛ yɛn ketee sɛ: Sɛ mo nua no nka mo ho a, monnsi m’anim.

⁴Na sɛ worema yɛn nua ne yɛn akɔ a, ɛnneɛ yɛbɛsiane akɔtɔ aduane abrɛ wo.

⁵Na sɛ woremma no nkɔ a, ɛnneɛ yɛrensiane nkɔ hɔ, ɛfiri sɛ ɔbarima no ka kyerɛɛ yɛn sɛ: Sɛ mo nua no nka mo ho a, monsi m’anim.

⁶Na Israel kaa sɛ: Adɛn nti na moyɛ me bɔne seyie, sɛ moka kyerɛɛ ɔbarima no sɛ mowɔ nua bie?

⁷ Na wɔse: Bisa na ɔbarima no bisaa yɛn, yɛn ne yɛn abusua ho asɛm sɛ: Mo agya da so te ase anaa? Mowɔ nua bi anaa? Deɛ ɔbisabisaeɛ yi ara na yɛbuaeɛ. Yɛbɛyɛ dɛn ahunu sɛ ɔbɛbisa yɛn sɛ: Momfa mo nua mmra?

⁸Na Yuda ka kyerɛɛ n’agya Israel sɛ: Ma abɔfra no ne me nkɔ, na yɛnsim nkɔ, na yɛne wo ne yɛn mma atena ase, na yɛanwu.

⁹Medi ne ho agyinamu; me nsam na hwehwɛ no. Sɛ mamfa no mammrɛ wo ammɛgyina w’anim a, ɛnneɛ mayɛ wo bɔne daa nyinaa.

¹⁰Sɛ yɛantwentwɛn a, anka sɛsɛɛ yɛakɔ aba mprenu.

¹¹ Na wɔn agya Israel ka kyerɛɛ wɔn sɛ: Sɛ ɛte saa a, ɛnneɛ monyɛ yei: Momfa asase yi so nnepa ngu mo adeɛ mu, na momfa ayɛyɛdeɛ nkɔma ɔbarima no, akyenkyennuro kakra, ɛwoɔ kakra, ohwam, kurobo, nkateɛ ne sorɔno aba nkɔma ɔbarima no.

¹² Na momfa dwetɛ foforɔ nkura, ne dwetɛ a wɔdane maa mo wɔ mo nkotokuo ano no, monkura nsane nkɔ; ebia ɛyɛ anifasoɔ.

¹³Na momfa mo nua no, na monsim nsane nkɔ ɔbarima no nkyɛn.

¹⁴ Na Onyankopɔn Tweaduampɔn mma ɔbarima no nhu mo mmɔbɔ, na ɔnnyaa mo nua no ne Benyamin mma mo. Na me deɛ, me mma firi me nsa a, na wɔafiri me nsa!

¹⁵Na mmarima no faa ayɛyɛdeɛ no, na wɔfaa dwetɛ mmɔho kurae ne Benyamin, na wɔsɔre siane kɔɔ Misraim kɔgyinaa Yosef anim.

¹⁶Na Yosef hunuu Benyamin sɛ ɔka wɔn ho no, ɔka kyerɛɛ ne fie panin sɛ: Fa nnipa yi kɔ fie, na kum mmoa siesie yɛ aduane, na nnipa yi ne me rebɛdidi awia yi.

¹⁷Na ɔbarima no yɛɛ sɛdeɛ Yosef kaeɛ no, na ɔde nnipa no kɔɔ Yosef fie.

¹⁸ Na nnipa no suroo sɛ wɔde wɔn akɔ Yosef fie, na wɔkaa sɛ: Dwetɛ a ɛsane kekaa yɛn nkotokuo mu kane no nti na wɔde yɛn aba ha yi, na wabɛtoa yɛn ato ahyɛ yɛn so afa yɛn ne yɛn mfunumu ayɛ nkoa.

¹⁹Na wɔtwe pinii Yosef fie panin no ne no kasae wɔ efie no pono ano

²⁰sɛ: Owura, yɛpa wo kyɛw, yɛsiane baa ha kane bɛtɔɔ aduane.

²¹Na yɛkɔduruu asoɛeɛ na yɛsanesanee yɛn nkotokuo ano no, na hwɛ, yɛn nyinaa dwetɛ hyehyɛ yɛn nkotokuo ano, yɛn dwetɛ sɛdeɛ wɔkariiɛ no pɛ, na yɛkura de asane aba.

²²Nso yɛkura dwetɛ foforɔ aba de rebɛtɔ aduane. Yɛnnim onii ko a ɔde yɛn dwetɛ no hyehyɛɛ yɛn nkotokuo no mu.

²³ Na ɔse: Asomdwoeɛ nka mo, monnsuro. Mo Nyankopɔn ne mo agya Nyankopɔn ama mo mo nkotokuo mu ademudeɛ, mo dwetɛ no kaa me nsa. Na ɔyii Simeon brɛɛ wɔn.

²⁴ Na ɔbarima no de nnipa no hyɛnee Yosef fie, na ɔmaa wɔn nsuo hohoroo wɔn nan ho, na ɔmaa wɔn mfunumu aduane.

²⁵Na wɔsiesiee ayɛyɛdeɛ no twɛn ba a Yosef bɛba awigyina no, ɛfiri sɛ na wɔate sɛ wɔrebɛdidi hɔ.

²⁶Na Yosef baa fie no, wɔde ayɛyɛdeɛ a wɔkura no kɔɔ ɛdan mu kɔmaa no, na wɔkotoo fam wɔ n’anim.

²⁷ Na Yosef bisaa wɔn sɛ wɔn ho yɛ anaa; na ɔse: Mo agya akɔkoraa a mokaa ne ho asɛm no ho yɛ anaa? Ɔda so te ase anaa?

²⁸ Na wɔse: W’akoa, yɛn agya no ho yɛ, ɔda so te ase. Na wɔbobɔɔ wɔn mu ase kotoo no.

²⁹Na ɔmaa n’ani so hunuu ne nua Benyamin, ne na ba no, ɔbisaa sɛ: Mo nua kumaa a mokaa me ne ho asɛm no ni anaa? Na ɔse: Onyankopɔn nnom wo, me ba.

³⁰Na Yosef yɛɛ no ntɛm, ɛfiri sɛ na ɔnhunu deɛ ɔnyɛ wɔ ne nua no ho, na na ɔrehwehwɛ baabi akɔsu, na ɔhyɛnee ne pia mu kɔsuu wɔ hɔ.

³¹Na ɔhohoroo n’anim, na ɔfirii adi, na ɔhyɛɛ ne ho so kaa sɛ: Momfa aduane mmɛsisi hɔ.

³² Na wɔde ne deɛ sii fa, na wɔde wɔn deɛ sisii fa, na wɔde Misraimfoɔ a wɔne no redidie no deɛ sisii fa, ɛfiri sɛ Misraimfoɔ ne Hebrifoɔ ntumi nnidi, na Misraimfoɔ kyi.

³³Na wɔbɛtenatenaa n’anim, ɔpanin sɛdeɛ ne panin teɛ, ne akumaa sɛdeɛ n’akumaa teɛ, na ɛyɛɛ nnipa no nyinaa nwanwa.

³⁴ Na wɔgyegyee aduane no firii n’anim brɛɛ wɔn, na Benyamin deɛ boroo wɔn nyinaa deɛ so mprenum. Na wɔnonnomee, na wɔne no ani gyee.