Read New Revised Asante Twi Bible Gyenesis 49 Bible Online

Gyenesis 49 - New Revised Asante Twi Bible bible

Gyenesis 49

¹Na Yakob frɛɛ ne mma sɛ: Mommoaboa mo ano, na menka mo deɛ ɛbɛyɛ mo, nna a ɛdi akyire no mu.

²Yakob mma, monhyia na montie, montie mo agya Israel!

³ Ruben, m’abakan ne wo; m’ahoɔden ne me mmaninyɛ asefire. Woboro so anidie mu, woboro so tumi mu.

⁴ Wohinhim sɛ nsuo, enti wo kandie bɛfiri wo nsa, ɛfiri sɛ woforoo w’agya nnaeɛ. Ɛno mu na woguu ɛho fi, — me mpa na woforoeɛ!

⁵Simeon ne Lewi yɛ anuanom. Wɔn nkrantɛ yɛ aniɛden akodeɛ.

⁶ Me kra, nnkɔ wɔn agyina mu, na m’animuonyam nkɔfra wɔn asafo mu. Ɛfiri sɛ wɔn abufuo mu na wɔkum nnipa, na wɔn ahokyerɛ mu na wɔsɛee anantwie.

⁷ Wɔadome wɔn abufuo, sɛ ɛso, ne wɔn anibereɛ, sɛ emu yɛ den. Mɛkyekyɛ wɔn mu wɔ Yakob mu, na mabɔ wɔn ahwete Israel mu.

⁸ Yuda, wo na wo nuanom bɛyi wo ayɛ; wo nsa bɛtia w’atamfo kɔn so; w’agya mma bɛkoto w’anim.

⁹ Gyata ba ne Yuda; hanam so na wode anyini, me ba. Ɔkotoe, ɔbutuu sɛ gyata ne gyatabereɛ; hwan na ɔbɛhwanyan no?

¹⁰ Ahempoma remfiri Yuda nsa, na mmarahyɛ poma remfiri ne nan ntam de kɔsi sɛ ɛsodifoɔ a aman bɛyɛ setie ama no no bɛba.

¹¹ Ɔsa n’afunumu ba wɔ bobe mu, ne n’afunumu bereɛ ba wɔ bobe pa mu. Ɔsi n’atadeɛ wɔ nsa mu, ne ne ntoma wɔ bobe aba mogya mu.

¹²Bobesa bɛma n’ani ayɛ kɔɔ, na nufosuo ama ne se ayɛ fitaa.

¹³ Sebulon tenabea bɛkyerɛ mpoano, na wahwɛ deɛ ahyɛn gyinagyina, na ɔne Sidon abɔ hyeɛ.

¹⁴Isakar yɛ afunumu hoɔdenfoɔ, ɔbutu mmoaban ntam;

¹⁵na ɔhunu sɛ homebea no yɛ ne asase no sɛ ɛyɛ fɛ, na ɔbrɛ ne mmatiri ase de gye adesoa, na ɔde ɛsom adwuma ayi toɔ.

¹⁶ Dan bɛbu ne nkurɔfoɔ atɛn sɛ Israel mmusuakuo mu biara.

¹⁷Dan bɛyɛ ɔkwan so ɔwɔ, tempɔn so ahuritia. Ɔka ɔpɔnkɔ nantin, na ne so tenafoɔ ahwe n’akyi.

¹⁸ AWURADE, wo nkwagyeɛ na mehwɛ no kwan.

¹⁹Gad, asafo bi retoa no, na ɔno nso atoa wɔn aka wɔn nantin.

²⁰ Aser aduane bɛyɛ sradeduane, na ɔbɛma ahennuane a ɛyɛ akɔnnɔ.

²¹ Naftali yɛ ɔforoteɛ a wɔato no sraha; ɔka nsɛm dɛdɛ.

²² Yosef yɛ dua a ɛso aba mman, dua a ɛso aba wɔ nsuo aniwa soɔ mman; ne mman tratra ɔfasuo.

²³Mmɛmmatofoɔ hyɛɛ no yea, wɔtotoo no, na wɔtaa no.

²⁴Nanso na ne tadua kura no pintinn, na ne basa mu yɛɛ den. Ɛfiri Yakob Tumfoɔ no nsam, ɛfiri ɔhwɛfoɔ a ɔyɛ Israel botan no mu.

²⁵Ɛfiri w’agya Nyankopɔn, ɔmmoa wo, na ɛfiri Tweaduampɔn hɔ, ɔnhyira wo. Ɔmfa ɔsorosoro nhyira, ne ebunu a ɛtrɛtrɛ aseɛ mu nhyira, ne nufoɔ ne yafunu mu nhyira nhyira wo.

²⁶ W’agya nhyira a ɛyɛ kɛseɛ boro daa daa mmepɔ no nhyira a ɛkɔduru tete nteredee nkokoɔ no ahyeɛso nohoa; ɛmmra Yosef atifi, deɛ wɔyii no firii ne nuanom mu no mpampam.

²⁷ Benyamin yɛ pataku a ɔtete mmoa mu; ɔdi hanam anɔpa, na anwummerɛ nso ɔkyɛ asadeɛ mu.

²⁸Yeinom nyinaa ne Israel mmusuakuo dummienu no, na yei ne deɛ wɔn agya ka kyerɛɛ wɔn de hyiraa wɔn. Sɛdeɛ wɔn nhyira teɛ mmaako mmaako na ɔhyiraa wɔn.

²⁹ Na ɔhyɛɛ wɔn ka kyerɛɛ wɔn sɛ: Aka kumaa bi na maka m’ani agu so. Monkɔsie me me nananom nkyɛn, wɔ ɔbodan a ɛwɔ Hetini Efron afuo mu no mu,

³⁰ɔbodan a ɛwɔ Makpela afuo soɔ Mamre ntentensoɔ wɔ Kanaan asase so, asase a Abraham tɔeɛ wɔ Hetini Efron nkyɛn de yɛɛ amusieeɛ no mu.

³¹ Ɛhɔ na wɔsiee Abraham ne ne yere Sara, ɛhɔ na wɔsiee Isak ne ne yere Rebeka, na ɛhɔ na mesiee Lea.

³²Afuo no ne ɔbodan a ɛwɔ mu no, wɔtɔɔ no Het mma nsam.

³³Na Yakob hyɛɛ ne mma nsamanseɛ wieeɛ no, ɔboaa ne nan ano guu mpa no so, na ɔguu n’ahome a ɛdi akyire, na ɔtii ne nananom wɔ asamando.