Read New Revised Asante Twi Bible 2 Samuel 16 Bible Online

2 Samuel 16 - New Revised Asante Twi Bible bible

2 Samuel 16

¹ Na ɛberɛ a Dawid twaa mu firii bepɔ no atifi hɔ kakra no, hwɛ, Mefiboset somfoɔ Siba bɛhyiaa no; ɔde mfunumu mmienu a wɔahyehyɛ wɔn a wɔsoso paanoo mmua ahanu ne bobe aba a wɔabɔ no ntoantoa ɔha ne borɔdɔma ntoantoa ɔha ne nsa nwoma kotokuo ma.

²Na ɔhene bisaa Siba sɛ: Wode yeinom rebɛyɛ dɛn? Na Siba se: Mfunumu yi, wɔmfa mma ɔhene fiefoɔ na wɔntena so, na paanoo ne nnuaba yi, mmeranteɛ no nni, na nsa yi nso, wɔmfa mma wɔn a wɔabrɛ ɛserɛ soɔ na wɔnnom.

³ Na ɔhene bisaa sɛ: Na ɛhe na wo wura ba no wɔ? Na Siba buaa ɔhene sɛ: Ɔte Yerusalem, na deɛ ɔreka ne sɛ: Ɛnnɛ Israel fie bɛdane m’agya ahennie ama me.

⁴Ɛnna ɔhene ka kyerɛɛ Siba sɛ: Hwɛ, deɛ ɛyɛ Mefiboset deɛ nyinaa yɛ wo dea. Na Siba kaa sɛ: Mebɔ me mu ase ma wo, na ma mennya me wura ɔhene anim adom.

⁵ Na Ɔhene Dawid duruu Bahurim no, ɔbarima bi a ɔfiri Saulo abusua mu a wɔfrɛ no Simei a ɔyɛ Gera ba firii adi baa hɔ; na ɔreba no, na ɔredome.

⁶Na ɔpaa Dawid ne n’asomfoɔ nyinaa aboɔ; nso na ɔman no nyinaa ne mmarima akofoɔ no nyinaa wowɔ ne nifa ne ne benkum.

⁷Na Simei redome no, sɛ ɔkaeɛ nie: Firi adi, firi adi, mogyapɛfoɔ, onipa huhuni!

⁸AWURADE atua wo Saulo a wobɛdii n’adeɛ no fie mogya nyinaa so ka, na AWURADE de ahennie no ahyɛ wo ba Absalom nsa, na hwɛ, w’asotwe mu na woda yi, ɛfiri sɛ woahwie mogya agu!

⁹ Ɛnna Seruia ba Abisai ka kyerɛɛ ɔhene sɛ: Adɛn nti na ɔkraman funu yi dome me wura ɔhene yi? Ma menkɔ menkɔtwa ne tiri ɛ!

¹⁰Na ɔhene kaa sɛ: Ɛdeɛn na me ne mo Seruia mma wɔ yɛ? Ma no nnome ara, na sɛ AWURADE ase no sɛ: Dome Dawid! a, hwan na ɔbɛka akyerɛ no sɛ: Adɛn nti na woreyɛ sei?

¹¹Na Dawid ka kyerɛɛ Abisai ne ne nkoa sɛ: Hwɛ, me ba a ɔfiri me yam na ɔrehwehwɛ me aku me yi, na kampɛsɛ Benyaminni yi. Monnyaa no mma no nnome, ɛfiri sɛ AWURADE na wahyɛ no.

¹²Ebia AWURADE bɛhwɛ m’amanehunu, na AWURADE de papa ahyɛ me nnome a ɔredome me nnɛ yi ananmu.

¹³Na Dawid ne ne nnipa no nam kwan no so rekorɔ no, na Simei nso nam bepɔ no ho ntentensoɔ rekɔ; na ɔrekorɔ no, na ɔredome ara paa no aboɔ, na ɔtoo mfuturo peteeɛ.

¹⁴Na ɔhene ne nnipa a wɔka ne ho no nyinaa durui Yordan ho no; na wɔabrɛ, na wɔhomee wɔ hɔ.

¹⁵Na Absalom ne Israel mmarima nyinaa baa Yerusalem, na Ahitofel ka ne ho.

¹⁶ Na Arkini Husai a ɔyɛ Dawid adamfo baa Absalom nkyɛn no, Husai kyeaa Absalom sɛ: Ɔhene tiri nkwa, ɔhene tiri nkwa!

¹⁷Na Absalom bisaa Husai sɛ: W’adɔeɛ a wode yɛ w’adamfo nie? Adɛn nti na wo ne w’adamfo no ankorɔ?

¹⁸Na Husai ka kyerɛɛ Absalom sɛ: Dabi, na deɛ AWURADE ne ɔman yi ne Israel mmarima nyinaa afa no no, ɔno na mɛyɛ ne deɛ na me ne no atena.

¹⁹Bio nso, hwan na mɛsom no? Ɛnyɛ ne ba? Sɛdeɛ mesom w’agya no, saa ara na mɛyɛ no w’anim.

²⁰Ɛnna Absalom ka kyerɛɛ Ahitofel sɛ: Tu yɛn fo wɔ deɛ yɛnyɛ ho ɛ.

²¹ Na Ahitofel ka kyerɛɛ Absalom sɛ: Kɔ ne w’agya mpenafoɔ a ɔgyaa wɔn sɛ wɔnhwɛ fie no nna, na Israel nyinaa nte sɛ woama wo ho abɔn w’agya, na wɔn a wɔwɔ wo nkyɛn nyinaa nsa bɛyɛ den.

²² Ɛnna wɔsii Absalom ntomadan, aban no atifi, na Absalom ne n’agya mpenafoɔ no daeɛ, Israel nyinaa anim.

²³Na Ahitofel ɛfo a ɔtuu no nna no mu yɛɛ wɔn sɛ obi kɔbisa Nyankopɔn hɔ adeɛ, na saa na na Ahitofel afotuo nyinaa teɛ ma Dawid ne Absalom.