Read New Revised Asante Twi Bible 2 Samuel 7 Bible Online

2 Samuel 7 - New Revised Asante Twi Bible bible

2 Samuel 7

¹ Na ɔhene te ne fie na AWURADE maa no ɔhome firii n’atamfo nyinaa ho hyiaeɛ no,

² ɔhene ka kyerɛɛ Odiyifoɔ Natan sɛ: Hwɛ, me deɛ, mete tweneduro dan mu, na Nyankopɔn adaka si ntomadan mu.

³Na Natan ka kyerɛɛ ɔhene sɛ: Deɛ ɛwɔ w’akoma mu nyinaa kɔyɛ, na AWURADE di w’akyi.

⁴Na ɛbaa sɛ, anadwo no ara AWURADE asɛm baa Natan nkyɛn sɛ:

⁵ Kɔ na kɔka kyerɛ m’akoa Dawid sɛ: Sɛ AWURADE seɛ nie: Wo na wobɛsi dan ama matena mu?

⁶ Na ɛfiri da a meyii Israelfoɔ firii Misraim baeɛ de bɛsi nnɛ yi mentenaa efie mu da, na mmom menam ntomadan tenabea mu.

⁷Baabiara a me ne me man Israelfoɔ nyinaa anante akɔ no, me ne atemmufoɔ a mayi wɔn sɛ wɔnhwɛ Israel so no bi akasa sɛ adɛn nti na moansi ntweneduro dan amma me anaa?

⁸ Na afei kɔka kyerɛ m’akoa Dawid sɛ: Sɛ asafo AWURADE seɛ nie: Me na mefaa wo firii nnwanhwɛbea, firii nnwan akyiridie sɛ bɛyɛ me man Israel so hene.

⁹Na medii w’akyi baabiara a wokɔeɛ, na matwitwa w’atamfo nyinaa afiri w’anim, na mɛma woanya din kɛseɛ sɛ asase so nnipa akɛseɛ din.

¹⁰Na mɛsiesie tenabea ama me man Israel, na mɛdua wɔn ama wɔatena wɔn tenabea, na wɔanhwanyan wɔn bio, na amumuyɛ mma anha wɔn bio sɛ akane no,

¹¹ɛberɛ a mehyɛɛ atemmufoɔ sɛ wɔnni me man Israel soɔ no; na mɛma woahome afiri w’atamfo nyinaa nsam. Na AWURADE aka akyerɛ wo sɛ AWURADE na ɔbɛkyekyere efie ama woɔ.

¹² Sɛ wo nna wie duru na woti w’agyanom wɔ asamando a, mɛma w’aseni a ɔfiri wo yam so w’akyi, na mama n’ahennie atim.

¹³ Ɔno na ɔbɛsi dan ama me din, na mama n’ahennie adwa atim akɔsi daa.

¹⁴ Me na mɛyɛ no agya, na ɔno nso ayɛ me ɔba. Na sɛ ɔfom a, mede nnipa abaa ne nnipa mma mpire bɛtea no.

¹⁵ Na m’adɔeɛ remfiri ne ho sɛdeɛ ɛfirii Saulo a metuu no w’anim no ho no.

¹⁶ Na wo fie ne w’ahennie bɛtim akɔsi daa wɔ m’anim, w’ahennwa bɛtim pintinn akɔsi daa.

¹⁷Na sɛdeɛ nsɛm yi nyinaa ne anisoadehunu yi nyinaa teɛ no, saa ara na Natan ka kyerɛɛ Dawid.

¹⁸ Ɛnna Ɔhene Dawid ba bɛtenaa AWURADE anim, na ɔkaa sɛ: Ao, AWURADE Nyankopɔn, mene hwan, na me fie ne deɛn sɛ wode me abɛduru ha yi?

¹⁹Nanso yei da so yɛ w’ani so ketewa, O AWURADE Nyankopɔn; na woaka daakye a ɛwɔ akyirikyiri ho asɛm nso akyerɛ w’akoa fie; na woakyerɛ me awoɔ ntoatoasoɔ a ɛbɛba, AWURADE Nyankopɔn,

²⁰na ɛdeɛn na Dawid nkɔ so nka nkyerɛ wo bio? Na wo na wonim w’akoa, O AWURADE Nyankopɔn.

²¹Ɛsiane w’asɛm a woaka no nti ne sɛdeɛ w’akoma teɛ no na woayɛ ade kɛseɛ yi, sɛ wobɛma w’akoa ahunu.

²²Enti woso kokuroo, AWURADE Nyankopɔn, na obiara nni hɔ a ɔte sɛ woɔ, na onyame biara nso nni w’akyi, sɛ nsɛm a yɛde yɛn aso ateɛ no nyinaa teɛ no.

²³ Na ɔman foforɔ bɛn na ɛwɔ asase soɔ a ɛte sɛ wo man Israel, wɔn a Onyankopɔn akɔgye wɔn afa ayɛ ne man na ɔde agye din, na wayɛ nnoɔma akɛseakɛse a ɛyɛ hu ama wɔn, ɛberɛ a wogyee wo man firii Misraim maa wo ho, wɔ amanaman ne wɔn anyame nsam no anim?

²⁴Na woasiesie wo man Israel afa de wɔn ayɛ wo man kɔsi daa, na wo AWURADE, woayɛ wɔn Nyankopɔn.

²⁵Na afei, ao, AWURADE Nyankopɔn, asɛm a woaka no w’akoa ne ne fie ho no, ma no nnyina nkɔsi daa, na yɛ sɛdeɛ woaka no.

²⁶Na wo din bɛkorɔn akɔsi daa na wɔaka sɛ: Asafo AWURADE ne Israel so Nyankopɔn. Na w’akoa Dawid fie bɛgyina w’anim pintinn.

²⁷ Na wo, asafo AWURADE, Israel Nyankopɔn, woayi w’akoa asotire sɛ: Mɛkyekyere efie mama wo, enti na w’akoa asi ne bo rebɔ wo saa mpaeɛ yi.

²⁸ Na afei, O AWURADE Nyankopɔn, wo ara wone Onyankopɔn, na wo nsɛm yɛ nokorɛ, na wode adepa yi ahyɛ w’akoa bɔ,

²⁹na afei ma no nyɛ wo fɛ sɛ wobɛhyira w’akoa fie na agyina wɔ w’anim daa. Na wo, O AWURADE Nyankopɔn, wo na woaka, na wo nhyira mu na wɔbɛhyira w’akoa fie daa.