Read New Revised Asante Twi Bible 2 Ahemfo 11 Bible Online

2 Ahemfo 11 - New Revised Asante Twi Bible bible

2 Ahemfo 11

¹ Na Ahasia ne na Atalia hunuu sɛ ne ba awuo no, ɔsɔree na ɔsɛee adehyeɛ abusua no nyinaa.

²Na Ɔhene Yoram babaa Yehoseba, Ahasia nuabaa, faa Ahasia ba Yoas, na ɔwiaa no firii ɔhene mma a wɔreku wɔn no mu de no ne ne bagyegyefoɔ kɔɔ pia mu, na ɔde no hunta firii Atalia anim na wɔanku no.

³Na ɔne no huntaa AWURADE fie mfeɛ nsia. Na Atalia dii asase no so hemmaa.

⁴Na afe a ɛtɔ so nson mu no, Yehoiada soma maa wɔkɔfaa Karifoɔ ne awɛmfoɔ no ɔha ha so asafohene baa ne nkyɛn AWURADE fie, na ɔne wɔn pamee, na ɔmaa wɔkekaa ntam AWURADE fie, na ɔde ɔhene ba no kyerɛɛ wɔn.

⁵Na ɔhyɛɛ wɔn sɛ: Adeɛ a monyɛ nie: Mo mu nkyɛmu mmiɛnsa mu baako mmra adwuma homeda, na mommɛwɛn ɔhene fie,

⁶(na nkyɛmu baako ntena Sur pono ano, na nkyɛmu baako nso ntena awɛmfoɔ akyiri pono no ano); na monwɛn efie no mmɔ ho ban.

⁷Na mo mu asafokuo mmienu, wɔn a homeda wɔwɛn AWURADE fie no nkɔwɛn ɔhene no.

⁸Na montwa ɔhene no ho nhyia, monkurakura mo akodeɛ mo nsam; na deɛ ɔbɛba mo kuo no mu no, monku no; na montena ɔhene ho, n’adifire ne ne muba mu.

⁹Na asafohene no yɛɛ sɛdeɛ ɔsɔfoɔ Yehoiada hyɛeɛ no nyinaa, na wɔfaa wɔn nnipa a wɔba adwuma homeda ne wɔn a wɔmma homeda no, na wɔbaa Ɔsɔfoɔ Yehoiada nkyɛn.

¹⁰ Na ɔsɔfoɔ no de Ɔhene Dawid mpea ne akyɛm a ɛwɔ AWURADE fie no maa ɔha asafohene no.

¹¹Na awɛmfoɔ no gyinagyina ho kurakura wɔn akodeɛ wɔn nsam, ɛfiri ɛdan no anafoɔ fam ntwea so kɔsi ɛdan no atifi fam ntwea so, afɔrebukyia no ho ne ɛdan no ho, atwa ɔhene no ho ahyia.

¹² Na ɔyii ɔhene ba no firii adi, na ɔde ahemmotire no bɔɔ ne ti, na ɔde adanseɛ nwoma no hyɛɛ ne nsa, na wɔsii no hene, na wɔsraa no ngo, na wɔbobɔɔ wɔn nsam sɛ: Ɔhene tiri nkwa!

¹³Ɛnna Atalia tee awɛmfoɔ ne ɔman no gyegyeegye no, ɔbaa nkurɔfoɔ no nkyɛn AWURADE fie;

¹⁴na ɔbɛhunui, na hwɛ, na ɔhene no gyina simpie no so sɛdeɛ ne yɛbea teɛ no, na asafohene no ne ntotorobɛntohyɛnfoɔ wɔ ɔhene no nkyɛn, na asase no so nkurɔfoɔ no nyinaa ani agye, na wɔhyenhyɛnee ntotorobɛnto. Ɛnna Atalia sunsuanee ne ntadeɛ mu, na ɔteaa mu sɛ: Atirisopam, atirisopam!

¹⁵Na Ɔsɔfoɔ Yehoiada hyɛɛ ɔha ha so asafohene a wɔhwɛ dɔm no soɔ no, na ɔka kyerɛɛ wɔn sɛ: Monyi no mfa mo mu mfi, na deɛ ɔbɛdi n’akyire no, momfa nkrantɛ nku no. Na ɔsɔfoɔ no kaa sɛ: Wɔnnku no AWURADE fie.

¹⁶ Enti wɔsɔɔ ne mu de no kɔfaa kwan a apɔnkɔ nam so ba ahemfie no so; na wɔkumm no hɔ.

¹⁷Na Yehoiada de apam too AWURADE ne ɔhene ne ɔman no ntam, sɛ wɔnyɛ AWURADE man; na ɔde too ɔhene ne ɔman no nso ntam.

¹⁸ Ɛnna asase no so nkurɔfoɔ nyinaa kɔɔ Baal fie kɔdwirii n’afɔrebukyia ne n’ahoni no, wɔbubuu no pasaa, na Baal sɔfoɔ Matan nso, wɔkum no afɔrebukyia no anim. Na ɔsɔfoɔ no de awɛmfoɔ gyinagyinaa AWURADE fie no ho.

¹⁹Na ɔfaa asafohene ne Karifoɔ ne awɛmfoɔ ne asase no so nkurɔfoɔ nyinaa, na wɔde ɔhene no firii AWURADE fie siane bɛfaa awɛmfoɔ pono ano kwan so baa ahemfie, na ɔtenaa ahennwa no so.

²⁰Na asase no so nkurɔfoɔ nyinaa ani gyee, na kuro no mu dwoe; na Atalia deɛ, wɔde nkrantɛ kumm no ɔhene fie hɔ.

²¹Yehoas bɛdii hene no, na wadi mfirinhyia nson.