Read New Revised Asante Twi Bible 2 Ahemfo 13 Bible Online

2 Ahemfo 13 - New Revised Asante Twi Bible bible

2 Ahemfo 13

¹ Yudahene Ahasia ba Yoas afe a ɛtɔ so aduonu mmiɛnsa so na Yehu ba Yehoahas bɛdii Israel so hene Samaria mfeɛ dunson.

² Na ɔyɛɛ AWURADE ani so bɔne, na ɔdii Nebat ba Yeroboam a ɔmaa Israel yɛɛ bɔne no bɔne akyi; wamfiri ho.

³ Na AWURADE bo fu tiaa Israel, na ɔde wɔn hyɛɛ Siriahene Hasael nsa ne Hasael ba Ben-hadad nsa wɔn nna nyinaa.

⁴Na Yehoahas koto srɛɛ AWURADE, na AWURADE tiee no, ɛfiri sɛ ɔhunuu ɔhaw a Siriahene de reha Israel no.

⁵ Na AWURADE maa Israel ɔgyefoɔ, na wɔfirii Siriafoɔ nsa ase, na Israel mma tenaa wɔn ntomadan mu sɛ akane no.

⁶ Nanso wɔamfiri Yeroboam a ɔmaa Israel yɛɛ bɔne no fie bɔne ho; emu na wɔnanteeɛ. Na Asera nnua no nso sisii Samaria.

⁷Na wɔannya dɔm biara amma Yehoahas gye apɔnkɔsotefoɔ aduonum ne nteaseɛnam du ne anammɔnmufoɔ mpem du, ɛfiri sɛ na Siriahene asɛe wɔn, na wayɛ wɔn sɛ mfuturo a wɔtiatia soɔ.

⁸Na Yehoahas ho nsɛm nkaeɛ ne deɛ ɔyɛeɛ nyinaa ne ne mmaninneɛ, wɔantwerɛ no Israel ahemfo berɛsosɛm nwoma no mu?

⁹Na Yehoahas tii n’agyanom wɔ asamando, na wɔsiee no Samaria; na ne ba Yoas bɛdii n’adeɛ.

¹⁰Yudahene Yoas afe a ɛtɔ so aduasa nson so na Yehoahas ba Yehoas bɛdii Israel so hene wɔ Samaria mfeɛ dunsia.

¹¹ Na ɔyɛɛ AWURADE ani so bɔne, wamfiri Nebat ba Yeroboam a ɔmaa Israel yɛɛ bɔne no bɔne nyinaa ho; emu na ɔnanteeɛ.

¹² Na Yoas ho nsɛm nkaeɛ ne deɛ ɔyɛeɛ nyinaa ne ne mmaninneɛ, sɛ ɔne Yudahene Amasia dii ako no, wɔantwerɛ no Israel ahemfo berɛsosɛm nwoma no mu?

¹³ Na Yoas tii n’agyanom wɔ asamando, na Yeroboam bɛtenaa n’adwa so; na wɔsiee Yoas Samaria kaa Israel ahemfo ho.

¹⁴ Nso na Elisa yare ne yadeɛ a ɔde wuiɛ no. Na Israelhene Yoas siane baa ne nkyɛn bɛsuu n’anim, na ɔkaa sɛ: M’agya, m’agya! Israel nteaseɛnam ne n’apɔnkɔsotefoɔ!

¹⁵Ɛnna Elisa ka kyerɛɛ no sɛ: Kɔfa tadua ne agyan! Na ɔde tadua ne agyan brɛɛ no.

¹⁶Na ɔka kyerɛɛ Israel hene no sɛ: Fa wo nsa sɔ tadua no mu. Na ɔde ne nsa sɔɔ mu; na Elisa de ne nsa guu ɔhene no nsa so.

¹⁷Na ɔkaa sɛ: Hini apueeɛ mpomma no! Na ɔhiniiɛ. Na Elisa se: To! Na ɔtoe. Na ɔse: AWURADE nkonimdie agyan, Siria so nkonimdie agyan! Na wobɛbɔ Siria wɔ Afek akɔsi sɛ wobɛdwerɛ wɔn.

¹⁸Na ɔkaa sɛ: Fa agyan no! Na ɔtasee. Na ɔka kyerɛɛ Israel hene no sɛ: To bɔ fam! Na ɔto bɔɔ fam mprɛnsa, na ɔgyaeɛ.

¹⁹Ɛnna Nyankopɔn nipa no bo fuu no kaa sɛ: Anka ɛsɛ sɛ woto no mprɛnnum anaa nsia; ɛno na anka wobɛbɔ Siria akɔsi sɛ wobɛdwerɛ wɔn; enti nso mprɛnsa pɛ na wobɛbɔ Siria.

²⁰Na Elisa wui, na wɔsiee no. Na afe no baeɛ no, Moabfoɔ afomfafoɔ asafo baa asase no so.

²¹Na wɔrekɔsie onipa bi, na hwɛ, wɔhunuu asafokuo no, wɔtoo onipa no twenee Elisa da mu; na onipa no kɔkaa Elisa nnompe pɛ, ɔnyaa nkwa, na ɔsɔre gyinaa ne nan so.

²²Na Siriahene Hasael haa Israel, Yehoahas nna nyinaa.

²³ Nanso AWURADE dom wɔn, na ne yam hyehyee no maa wɔn, na ɔdanee ne ho kyerɛɛ wɔn n’apam a ɔne Abraham, Isak ne Yakob pameeɛ no nti, na wampɛ sɛ ɔsɛe wɔn, na wanto wɔn antwene amfiri n’anim de bɛsi seesei.

²⁴Na Siriahene Hasael wuiɛ; na ne ba Ben-hadad bɛdii n’adeɛ.

²⁵ Na Yehoahas ba Yehoas sane kɔgyee Hasael ba Ben-hadad nsam nkuro a ɔde ɔko bɛgyee no n’agya Yehoahas nsam no; mprɛnsa na Yoas bɔɔ no, na ɔgyee Israel nkuro no.