Read New Revised Asante Twi Bible 2 Ahemfo 19 Bible Online

2 Ahemfo 19 - New Revised Asante Twi Bible bible

2 Ahemfo 19

¹ Na Ɔhene Hesekia teeɛ no, ɔsunsuanee ne ntadeɛ mu na ɔfiraa ayitoma na ɔsii mu kɔɔ AWURADE fie.

²Na ɔsomaa Eliakim a na ɔdi efie no soɔ ne Ɔtwerɛfoɔ Sebna ne asɔfoɔ mu mpanimfoɔ a wɔfirafira ayitoma kɔɔ Amos ba Odiyifoɔ Yesaia nkyɛn,

³na wɔkɔka kyerɛɛ no sɛ: Sɛ Hesekia seɛ nie: Ahohiahia ne asotwe ne nsopa da ne nnɛ, na mma aduru awotwaa ano, na ahoɔden nni hɔ a wɔde bɛwo wɔn.

⁴ Ebia AWURADE wo Nyankopɔn bɛte Rabsake no a ne wura Asiria hene asoma no sɛ ɔmmɛsopa Onyankopɔn teasefoɔ no nsɛm, na nsɛm a AWURADE wo Nyankopɔn ateɛ no nti, watwe n’aso. Enti ma wo mpaebɔ so ma nnipa nkaeɛ a wɔwɔ hɔ no.

⁵Na Ɔhene Hesekia nkoa no baa Yesaia nkyɛn.

⁶Na Yesaia ka kyerɛɛ wɔn sɛ: Sɛ monka nkyerɛ mo wura nie: Sɛ AWURADE seɛ nie: Nsuro nsɛm a woteeɛ a Asiriahene nkoa de abɛya me no anim.

⁷ Hwɛ, mede honhom bi bɛhyɛ ne mu, na wate nsɛm bi, na wasane akɔ n’asase so, na mama no atɔ nkrantɛ ano n’asase so.

⁸Na Rabsake no sanee, na ɔkɔtoo Asiriahene sɛ ɔne Libna reko, ɛfiri sɛ na wate sɛ watu afiri Lakis.

⁹Na ɔtee Etiopiahene Tirhaka nka sɛ: Hwɛ, watu ne wo rebɛko. Na ɔsane somaa abɔfoɔ baa Hesekia nkyɛn bio sɛ:

¹⁰ Sɛ monkɔka nkyerɛ Yudahene Hesekia nie: Mma wo Nyankopɔn a wode wo ho ato ne soɔ no nnaadaa wo sɛ: Wɔremfa Yerusalem nhyɛ Asiriahene nsa.

¹¹Hwɛ, wo ara woate deɛ Asiria ahemfo ayeyɛ nsase nyinaa, asɛe no pasapasa no, na wo na wɔbɛgye woɔ anaa?

¹² Amanaman a m’agyanom asɛe wɔn, Gosan, Haran, Resef ne Edenfoɔ a wɔwɔ Telasar no anyame no gyee wɔn anaa?

¹³Ɛhe na Hamathene, Arpadhene, Sefarwaim kuro, Hena ne Iwahene no wɔ?

¹⁴Na Hesekia gyee nwoma no abɔfoɔ no nsam, na ɔkenkanee; na ɔforo kɔɔ AWURADE fie, na Hesekia trɛɛ mu too AWURADE anim.

¹⁵ Na Hesekia bɔɔ AWURADE anim mpaeɛ sɛ: AWURADE Israel Nyankopɔn a wote Kerubim soɔ, wo nko wone Onyankopɔn asase so ahennie nyinaa mu; wo na woyɛɛ ɔsoro ne asase.

¹⁶ Brɛ w’aso ase, AWURADE, na tie! Bue w’ani, AWURADE, na hwɛ! Na tie Sanaherib nsɛm a wasoma sɛ wɔmfa mmɛsopa wo, Onyankopɔn teasefoɔ no.

¹⁷Ɛwom, AWURADE, Asiria ahemfo asɛe amanaman ne wɔn nsase,

¹⁸na wɔatoto wɔn anyame agu ogya mu, ɛfiri sɛ wɔnyɛ anyame, na ɛyɛ onipa nsa ano adwuma, dua ne ɔboɔ nko ara, na wɔasɛe wɔn.

¹⁹Enti afei, AWURADE yɛn Nyankopɔn, gye yɛn firi ne nsam, na asase so ahennie nyinaa nhunu sɛ wo, AWURADE, ne Onyankopɔn, wo nkutoo ara nko!

²⁰Ɛnna Amos ba Yesaia soma maa wɔkɔɔ Hesekia nkyɛn sɛ: Sɛ AWURADE Israel Nyankopɔn seɛ nie: Deɛ wobɔɔ me ɛho mpaeɛ Asiriahene Sanaherib ho no, mate.

²¹Yei ne asɛm a AWURADE aka agu ne soɔ no: Ɔbaabunu Sion babaa no bu wo animtia yi wo ahi, Yerusalem babaa rewoso ne ti wɔ w’akyiri.

²²Hwan na woasopa no na woaya no? Na hwan so na woama wo nne soɔ na woama w’ani atra wo ntɔn? Wode atia Israel Kronkronni no.

²³W’abɔfoɔ so na wonam asopa AWURADE, na woaka sɛ: Mede me nteaseɛnam dodoɔ no maforo kɔ mmepɔ atifi Lebanon mu nohoa tɔnn; na mɛtwitwa ne ntweneduro atentene ne pepeaa a ɛyɛ fɛ no agu na makɔduru, n’atenaeɛ a ɛwɔ akyirikyiri, ne kwaeɛbirentuo mu.

²⁴Me na matutu mmura manom amannɔne nsuo, na mede me nammuromu mawe Misraim nsubɔntene nyinaa.

²⁵Adɛn wontee, sɛ mefiri meyɛeɛ akyɛreɛ? Na mefiri tete mmerɛ mu na mehyɛɛ no saa, na mama no aba mu, sɛ wɔnsɛe nkuro a afasuo atwa ho ahyia mma no nnanedane akurofo akuakuo,

²⁶na emufoɔ no, wɔn nsa anso hwee yɛ, wɔn akoma tui na wɔn ani wui, wɔdanedanee mfofowa so ahahan ne wira mono, adan atifi wira ne ayuo a amma ne ho soɔ na ahoa.

²⁷Na menim w’asetena, ne w’adifire ne wo muba no, ɛne wo dam a wobɔ no me soɔ no.

²⁸Ɛsiane sɛ wobɔ me so dam, na w’ahantan aforo abɛduru m’aso mu nti, mede me kawa bɛhyɛ wo hwenem na mede me nnareka bɛto w’ano mu, na masane wo afa ɔkwan a wonam so baeɛ no so akɔ.

²⁹Na yei nyɛ wo nsɛnkyerɛnneɛ: Afe yi mu monni ntwakaeɛ a ɛfifiriiɛ, na afe a ɛtɔ so mmienu no mu, deɛ ɛbɛdi akyire aba. Na afe a ɛtɔ so mmiɛnsa mu no, mongu na montwa, na montɛ bobe nturo, na monni mu aba.

³⁰Na Yuda fie mu wɔn a wɔagye wɔn afiri mu a wɔaka no, wɔn ase bɛgye nhini bio, na wɔaso aba wɔ soro.

³¹ Na Yerusalem na nnipa nkaeɛ bi bɛfire, na nnipa a wɔafiri mu anya nkwa nso afiri Sion bepɔ so, AWURADE ninkuntwe na ɛbɛyɛ yei.

³²Enti sɛ AWURADE se Asiriahene ho nie: Ɔremma kuro yi mu, na ɔrento agyan mma ha, na ɔremfa ɛkyɛm mmɛhyia no, na ɔrenhɔre pie ntia no.

³³Ɔkwan a ɔnam so baeɛ no so na ɔnam bɛsane akorɔ, na kuro yi deɛ, ɔremma mu, AWURADE na ɔseɛ.

³⁴ Na mɛbɔ kuro yi ho ban na magye no, me ara ne m’akoa Dawid nti!

³⁵Na anadwo no ara AWURADE bɔfoɔ firi kɔkumm Asiria nsra mu nnipa mpemha aduɔwɔtwe nnum; na wɔsɔree anɔpa no, na hwɛ, na wɔn nyinaa yɛ awufoɔ afunu.

³⁶Ɛnna Asiriahene Sanaherib sii mu saneeɛ, na ɔkɔtenaa Ninewe.

³⁷ Na ɔresɔre ne nyame Nisrok fie no, ne mma Adramelek ne Sareser de nkrantɛ kumm no, na wɔfiri hɔ dwane kɔɔ Ararat asase so. Na ne ba Esarhadon bɛdii n’adeɛ.