Read New Revised Asante Twi Bible 2 Ahemfo 9 Bible Online

2 Ahemfo 9 - New Revised Asante Twi Bible bible

2 Ahemfo 9

¹Na Odiyifoɔ Elisa frɛɛ adiyifoɔ mma no mu baako ka kyerɛɛ no sɛ: Bɔ abɔsoɔ, na fa ngo toa yi kura wo nsam, na kɔ Ramot-gilead.

²Na sɛ woduru hɔ a, hwehwɛ Nimsi ba Yehosafat ba Yehu hɔ, na kɔ mu, na ma no nsɔre mfiri ne nuanom mu, na fa no kɔ mpiakyire pia mu,

³ na fa ngo toa no hwie gu n’atifi, na ka sɛ: Sɛ AWURADE seɛ nie: Masra wo ngo asi Israel so hene; na hini ɛpono no na dwane, na nnyina.

⁴Ɛnna aberanteɛ a ɔyɛ odiyifoɔ aberanteɛ no sii mu kɔɔ Ramot-gilead.

⁵Na ɔduruiɛ no, na hwɛ, ɛdɔm so asafohene tete hɔ; na ɔkaa sɛ: Mewɔ asɛm bi mese wo, ɔsafohene. Na Yehu bisaa sɛ: Wone yɛn nyinaa mu hwan? Na ɔse: Mene wo, ɔsafohene.

⁶Ɛnna ɔsɔre kɔɔ ɛdan no mu, na ɔhwiee ngo no guu n’atifi, na ɔka kyerɛɛ no sɛ: Sɛ AWURADE Israel Nyankopɔn seɛ nie: Masra wo masi wo AWURADE man Israel so hene.

⁷ Na wobɛbɔ wo wura Ahab fie, na matɔ me nkoa adiyifoɔ no mogya ne AWURADE nkoa nyinaa mogya so were Isebel nsam;

⁸ na Ahab fie nyinaa asɛe, na matwa Ahabni barima biara atwene, akoa oo, ɔdehyeɛ oo, Israel mu.

⁹ Na mɛyɛ Ahab fie sɛ Nebat ba Yeroboam fie ne Ahia ba Baasa fie.

¹⁰ Na akraman bɛwe Isebel nam, Yesreel asase so, na obiara nni hɔ a ɔbɛsie no. Na ɔhinii ɛpono no dwanee.

¹¹Na Yehu firii adi baa ne wura nkoa nkyɛn. Na obi bisaa no sɛ: Ɛyɛ anaa? Adɛn nti na ɔbɔdamfoɔ yi baa wo nkyɛn yi? Na ɔka kyerɛɛ wɔn sɛ: Mo ara monim ɔbarima no ne ne nsɛnkeka.

¹²Na wɔse: Atorɔ! Ka kyerɛ yɛn ɛ! Na ɔse: Sɛɛ ne sɛɛ na ɔka kyerɛɛ me sɛ: Sɛ AWURADE seɛ nie: Masra wo ngo masi wo Israel so hene.

¹³ Ɛnna wɔyɛɛ ntɛm yiyii wɔn ntadeɛ de hyehyɛɛ n’ase wɔn nan ase wɔ ntwedeɛ no ara soɔ, na wɔhyɛnee totorobɛnto sɛ: Yehu adi hene!

¹⁴Na Nimsi ba Yehosafat ba Yehu pam Yoram tiri so; nso na Yoram ne Israel nyinaa rewɛn wɔ Ramot-gilead, Siriahene Hasael nti;

¹⁵ na Ɔhene Yehoram deɛ, na wasane aba Yesreel sɛ ɔrebɛsa pira a ɔne Siriahene Hasael reko no, Siriafoɔ piraa no no. Na Yehu kaa sɛ: Sɛ sei ne w’adwene a, ɛnneɛ mommma obiara mmfiri adi nnnwane mmfiri kuro yi mu nnkɔka no wɔ Yesreel.

¹⁶ Na Yehu tenaa teaseɛnam mu kɔɔ Yesreel. Na ɛhɔ na na Yoram da, na Yudahene Ahasia asiane aba sɛ ɔrebɛhwɛ Yoram.

¹⁷Na ɔwɛmfoɔ gyina Yesreel abantenten so; na ɔhunuu Yehu asafokuo no sɛ wɔreba, na ɔkaa sɛ: Mehunu asafokuo bi. Na Yehoram se: Fa ɔpɔnkɔsoteni soma no ma no nkɔhyia wɔn, na ɔmmisa sɛ: Asomdwoeɛ anaa?

¹⁸Na ɔpɔnkɔsoteni bi kɔ kɔhyiaa no, na ɔkaa sɛ: Sɛ ɔhene seɛ nie: Asomdwoeɛ anaa? Na Yehu se: Wo ne asomdwoeɛ wɔ deɛn na ɛyɛ? Bra bɛdi m’akyi! Na ɔwɛmfoɔ no de nkra kɔmaa ɔhene sɛ: Ɔbɔfoɔ no aduru wɔn nkyɛn, nso ɔnsane mma.

¹⁹Ɛnna ɔsomaa ɔpɔnkɔsoteni a ɔtɔ so mmienu; na ɔkɔduruu wɔn nkyɛn no, ɔkaa sɛ: Sɛ ɔhene seɛ nie: Ɛyɛ asomdwoeɛ anaa? Na Yehu se: Asomdwoeɛ fa wo ho bɛn? Bra bɛdi m’akyi!

²⁰Na ɔwɛmfoɔ no kaa sɛ: Waduru wɔn nkyɛn, nso ɔnsane mma. Na ɔka pɔnkɔ no sɛdeɛ Nimsi ba Yehu ka no, na ɔka no denden pa ara.

²¹ Ɛnna Yehoram kaa sɛ: Monsiesie! Na wɔsiesiee ne teaseɛnam no. Na Israelhene Yehoram ne Yudahene Ahasia firii adi, wɔn nteaseɛnam mu, na wɔfiri kɔhyiaa Yehu, na wɔkɔtoo no Yesreelni Nabot asase no so.

²²Na Yehoram hunuu Yehu no, ɔbisaa sɛ: Yehu, asomdwoeɛ anaa? Na ɔse: Asomdwoeɛ bɛyɛ dɛn aba, berɛ a wo na Isebel adwamammɔ ne n’abayigorɔ bebree no rekɔ soɔ yi?

²³Ɛnna Yehoram danee ne ho dwaneeɛ, na ɔka kyerɛɛ Ahasia sɛ: Atirisopamsɛm nie, Ahasia!

²⁴Na Yehu de n’ahoɔden nyinaa twee n’agyan mu to bɔɔ Yehoram abasa ntam, na agyan no hwiree n’akoma mu, na ɔhwee ne teaseɛnam mu.

²⁵ Ɛnna ɔka kyerɛɛ ne kunini Bidkar sɛ: Ma no so to no twene Yesreelni Nabot asase no so! Na kae sɛ me ne wo te apɔnkɔ so bɔɔ anan dii n’agya Ahab akyiri no, AWURADE de atemmusɛm yi too ne so sɛ:

²⁶Ampa ara, mehunuu Nabot mogya ne ne mma mogya nnora! AWURADE na ɔseɛ: Na mɛtua wo ɛso ka, asase yi so! AWURADE na ɔseɛ. Na afei ma no so to no twene asase yi so, sɛdeɛ AWURADE asɛm no teɛ no.

²⁷ Na Yudahene Ahasia hunuiɛ no, ɔfaa turom dan kwan so dwanee. Na Yehu tii no, na ɔkaa sɛ: Mommɔ ɔno nso teaseɛnam no mu. Wɔyɛɛ saa Gur aforoeɛ a ɛwɔ Yibleam ho no; na ɔdwane kɔɔ Megido, na ɔkɔwuu wɔ hɔ.

²⁸ Na ne nkoa de no nam teaseɛnam mu kɔɔ Yerusalem; na wɔsiee no n’asieeɛ kaa n’agyanom ho, Dawid kuro mu.

²⁹Na Ahab ba Yoram afe a ɛtɔ so dubaako mu na Ahasia bɛdii Yuda so hene.

³⁰Ɛnna Yehu baa Yesreel. Na Isebel teeɛ no, ɔkekaa n’ani ho adubire, na ɔhyehyɛɛ ne ti, na ɔhwɛɛ mpomma mu.

³¹ Na Yehu duruu ɛpono no ano no, ɔbisaa sɛ: Ɛyɛ asomdwoeɛ anaa, wo Simri a, wokumm wo wura?

³²Na ɔmaa n’ani so hwɛɛ mpomma no, na ɔbisaa sɛ: Hwan na ɔwɔ m’afa, hwan? Ɛnna pia mufoɔ baanu anaa baasa firi bɔɔ wɔn ani kyerɛɛ no.

³³Na ɔkaa sɛ: Monto no nhwe fam! Ɛnna wɔtoo no hwee fam, na ne mogya bi petee ɔfasuo ho ne apɔnkɔ no ho, na ɔde teaseɛnam faa ne so.

³⁴Na ɔhyɛnee mu; na ɔdidiiɛ na ɔnomeeɛ no, ɔkaa sɛ: Monkɔ nkɔhwɛ ɔbaa a wɔadome no no, na monsie no, ɛfiri sɛ ɔyɛ ɔhene babaa.

³⁵Na wɔkɔɔ sɛ wɔrekɔsie no, na wɔanhunu ne ho biribiara gye ne tikwankoraa ne ne nan ne ne nsayam.

³⁶ Na wɔsane bɛka kyerɛɛ no; na ɔkaa sɛ: AWURADE asɛm a ɔnam n’akoa Elia Tisbini no so kaeɛ no nie sɛ: Yesreel asase so na akraman bɛwe Isebel nam,

³⁷na Isebel funu bɛhwete ayɛ sɛ sɛbeɛ wɔ wiram, Yesreel asase no so, na obiara anhunu anka sɛ: Isebel nie!