Read New Revised Asante Twi Bible 2 Berɛsosɛm 12 Bible Online

2 Berɛsosɛm 12 - New Revised Asante Twi Bible bible

2 Berɛsosɛm 12

¹ Na Rehoboam ahennie timiiɛ, na ɔyɛɛ den no, ɔgyaa AWURADE mmara, na Israel nyinaa ka ne ho.

²Na Ɔhene Rehoboam afe a ɛtɔ so nnum no Misraimhene Sisak foro baa Yerusalem so, ɛfiri sɛ na wɔafom AWURADE.

³Ɔde nteaseɛnam apem ahanu ne apɔnkɔsotefoɔ mpemaduosia bae, na ɛdɔm a wɔne no baeɛ no nni ano, wɔfiri Misraim: Libiafoɔ, Sukifoɔ ne Etiopiafoɔ.

⁴ Na ɔgyee Yuda nkuro a ɛyɛ den no, na ɔbɛduruu Yerusalem.

⁵Ɛnna Odiyifoɔ Semaia baa Rehoboam ne Yuda mmapɔmma a wɔaboa wɔn ano aba Yerusalem afiri Sisak anim no nkyɛn, na ɔka kyerɛɛ wɔn sɛ: Sɛ AWURADE seɛ nie: Mo deɛ, moagya me, na me nso magyaa mo ahyɛ Sisak nsa.

⁶Ɛnna Israel mmapɔmma ne ɔhene no brɛɛ wɔn ho aseɛ, na wɔkaa sɛ: Ɔteneneeni ne AWURADE.

⁷Na AWURADE hunuu sɛ wɔabrɛ wɔn ho aseɛ no, AWURADE asɛm baa Semaia nkyɛn sɛ: Wɔabrɛ wɔn ho ase nti, merensɛe wɔn, na ɛyɛ kakra a mɛma wɔafiri mu afi, na m’abufuo amfa Sisak nsa so anhwie angu Yerusalem so.

⁸Nanso wɔbɛyɛ no nkoa, na wɔahunu me som ne nsase so ahennie som no.

⁹Na Misraimhene Sisak foro baa Yerusalem bɛfaa AWURADE fie akoradeɛ ne ɔhene fie akoradeɛ no, — ne nyinaa na ɔfaeɛ, — na ɔfaa sika akyɛm a Salomo yɛeɛ no nso.

¹⁰Na Ɔhene Rehoboam yɛɛ kɔbere mfrafraeɛ akyɛm sisii ananmu, na ɔde hyehyɛɛ awɛmfoɔ a wɔwɛn ɔhene fie pono ano no asafohene no nsa.

¹¹Na da biara a ɔhene ba AWURADE fie no, awɛmfoɔ no bɛsoa kɔ na wɔde asane aba awɛmfoɔ no dan mu.

¹²Na ɛnam sɛ ɔbrɛɛ ne ho aseɛ nti, AWURADE abufuo no sane firii ne so, sɛ ɔrensɛe no nwie; na ɔmannwoeɛ wɔ Yuda mu nso.

¹³ Na Ɔhene Rehoboam hyɛɛ ne ho den wɔ Yerusalem, na ɔdii hene. Na ɔbɛdii hene no, na wadi mfeɛ aduanan baako, na ɔdii hene mfirinhyia dunson wɔ Yerusalem a ɛne kuro a AWURADE yii Israel mmusuakuo nyinaa mu sɛ ɔde ne din bɛto hɔ no. Na ne na din de Naama a ɔyɛ Amonni.

¹⁴Na ɔyɛɛ bɔne, na wamfa n’akoma anhwehwɛ AWURADE.

¹⁵ Na Rehoboam ho nsɛm, kane deɛ ne akyire yi deɛ nso, wɔantwerɛ no Odiyifoɔ Semaia ne ɔdehunufoɔ Ido nsɛm mu antoatoa so? Na akodie daa Rehoboam ne Yeroboam ntam nna nyinaa.

¹⁶Na Rehoboam tii n’agyanom wɔ asamando, na wɔsiee no Dawid kuro no mu. Na ne ba Abia bɛdii n’adeɛ.