Read New Revised Asante Twi Bible 2 Berɛsosɛm 13 Bible Online

2 Berɛsosɛm 13 - New Revised Asante Twi Bible bible

2 Berɛsosɛm 13

¹ Ɔhene Yeroboam afe a ɛtɔ so dunwɔtwe soɔ no, Abia bɛdii Yuda so hene.

²Mfeɛ mmiɛnsa na ɔdii hene Yerusalem, na ne na din de Mikaia, Uriel ba a ɔfiri Gibea. Na ɛko baa Abia ne Yeroboam ntam.

³Na Abia de mmarima akofoɔ dɔm a ano si nnipa a wɔayi wɔn mpemahanan kɔɔ ɔsa no, na Yeroboam de nnipa mpemahanwɔtwe, mmarima a wɔtumi wɔn ho a wɔayi wɔn ne no de bɛbɔɔ ani.

⁴Na Abia sɔree Semaraim bepɔ a ɛwɔ Efraim mmepɔ soɔ no atifi, na ɔkaa sɛ: Yeroboam ne Israel nyinaa, montie me.

⁵ Ɛnyɛ mo deɛ, sɛ mobɛhunu sɛ AWURADE Israel Nyankopɔn no de Israel so ahennie ama Dawid, de rekɔsi daa sɛ nkyene apam ama ɔno ne ne mma anaa?

⁶Na Nebat ba Yeroboam a ɔyɛ Dawid ba Salomo akoa no asɔre ate ne wuranom so atua,

⁷na nnipa hunu ahuhufoɔ ne no boom hyɛɛ wɔn ho den tiaa Salomo ba Rehoboam, na Rehoboam yɛ abɔfra, na n’akoma yɛ mmerɛ, na wanhyɛ ne ho den wɔn anim.

⁸ Na afei, mo deɛ, mose mobɛhyɛ mo ho den, AWURADE ahennie a ɛwɔ Dawid mma nsam no anim, na moyɛ asafo yuu, na mowɔ sika anantwie a Yeroboam ayɛ ama mo sɛ anyame.

⁹ Montutuu AWURADE asɔfoɔ, Aaron mma no ne Lewifoɔ no na monyɛɛ asɔfoɔ mfaeɛ sɛ nsase so aman no? Obiara a ɔde nantwinini ba, anaa adwennini nson ba sɛ ɔrebɛdwira ne ho no bɛyɛ ɔsɔfoɔ ma deɛ ɛnyɛ anyame.

¹⁰Na yɛn deɛ, AWURADE ne yɛn Nyankopɔn, na yɛnnyaa no, na asɔfoɔ a wɔsom AWURADE no yɛ Aaron mma, na Lewifoɔ no kura wɔn adwuma mu.

¹¹ Na wɔhye ɔhyeɛ afɔdeɛ ma AWURADE daa anɔpa ne anwummerɛ ne ɔhyeɛ aduhwam no. Na wɔsiesie kyerɛ paanoo wɔ ɔpono kronkron no so, na sika kaneadua ne ne kanea no, wɔsɔ no daa anwummerɛ. Na yɛn deɛ, yɛyɛ AWURADE yɛn Nyankopɔn ahyɛdeɛ no, na mo deɛ, moagya no.

¹² Na hwɛ, Onyankopɔn ka yɛn ho, di kan, ne n’asɔfoɔ a wɔhyɛne osebɔ ntotorobɛnto, sɛ wɔde bɛfrɛ ɔko atia mo. Israel mma, mo ne AWURADE mo agyanom Nyankopɔn no nnko, na ɛrensi mo yie.

¹³Na Yeroboam maa atɛfoɔ buu wɔn ho braka na wɔabɛfiri wɔn akyi. Na wɔwɔ Yuda anim, na atɛfoɔ no wɔ wɔn akyire.

¹⁴Na Yuda danedanee wɔn ani no, na hwɛ, ɛdɔm no wɔ anim ne akyire. Ɛnna wɔteaa mu frɛɛ AWURADE, na asɔfoɔ no hyenhyɛnee ntotorobɛnto.

¹⁵Na Yuda mmarima no bɔɔ ose. Na ɛbaa sɛ Yuda mmarima no bɔɔ ose no, Onyankopɔn kaa Yeroboam ne Israel nyinaa gui, Abia ne Yuda anim.

¹⁶Na Israelfoɔ no dii nkoguo wɔ Yuda anim, na Onyankopɔn de wɔn hyɛɛ wɔn nsa.

¹⁷Na Abia ne ne man kunkumm wɔn okumkɛseɛ, na asraafoɔ a wɔtotɔɔ Israel mu yɛ nnipa a wɔayi wɔn mpemahanum.

¹⁸Na wɔbrɛɛ Israelfoɔ no ase berɛ no mu, na Yudafoɔ no ho yɛɛ den, ɛfiri sɛ na wɔtwere wɔn agyanom Nyankopɔn no.

¹⁹Na Abia tii Yeroboam, na ɔkɔgyee ne nsam nkuro, Betel ne ɛho nkurowa ne Yesana ne ɛho nkurowa ne Efron ne ɛho nkurowa.

²⁰Na Yeroboam annya tumi biara bio Abia berɛ so. Na AWURADE kaa no maa no wui.

²¹Na Abia hyɛɛ ne ho den, na ɔwarewaree yerenom dunan, na ɔwowoo mmammarima aduonu mmienu ne mmammaa dunsia.

²² Na Abia ho nsɛm nkaeɛ ne n’akwan ne ne nsɛm, wɔatwerɛ no Odiyifoɔ Ido nkyerɛaseɛ nwoma no mu.