Read New Revised Asante Twi Bible Eksodɔs 1 Bible Online

Eksodɔs 1 - New Revised Asante Twi Bible bible

Eksodɔs 1

¹ Na yeinom ne Israel mma a wɔne Yakob baa Misraim no din. Wɔn mu biara ne ne fiefoɔ na ɛbaeɛ.

²Ruben, Simeon, Lewi, Yuda,

³Isakar, Sebulon, Benyamin,

⁴Dan, Naftali, Gad ne Aser.

⁵ Na nnipa a wɔfiri Yakob asene mu nyinaa yɛ aduɔson. Na Yosef wɔ Misraim dada.

⁶ Na Yosef ne ne nuanom nyinaa ne wɔn berɛ sofoɔ no nyinaa wuwui.

⁷ Na Israel mma no wowoe, na wɔdɔree bebree, na wɔn ase kyenee, na wɔn ho yɛɛ den papaapa; na wɔyɛɛ asase no so ma.

⁸Na ɔhene foforɔ bi sɔree Misraim a na ɔnnim Yosef.

⁹Na ɔka kyerɛɛ ne man sɛ: Hwɛ, Israelfoɔ no dɔɔso, na wɔn ho yɛ den sene yɛn.

¹⁰Momma yɛmfa nyansa kwan bi so ne wɔn nni, na wɔannɔɔso, na sɛ ɛsa bi ba a, wɔankɔka yɛn atamfoɔ ho ne yɛn ammɛko, na wɔansɔre asase yi so ankɔ.

¹¹ Na wɔsisii wɔn so adwumayɛfoɔ so mpanimfoɔ sɛ wɔmfa nnesoadeɛ a emu yɛ duro nhyɛ wɔn so. Na wɔkyekyeree adekora nkuro Pitom ne Raamses maa Farao.

¹²Nanso dodoɔ a wɔhyɛɛ wɔn soɔ no, dodoɔ no ara na wɔdɔreeɛ, na wɔtrɛe. Na Misraimfoɔ suroo Israelfoɔ no.

¹³Na wɔde nyadie yaya dii Israelfoɔ.

¹⁴Wɔmaa wɔn asetena fonoo wɔn wɔ dɔteɛ ne ntaayaa ho adwuma a ɛyɛ den ne afuom adwumayɛ ahodoɔ ne nnwuma ahodoɔ nyinaa mu nyadie yaya a wɔde dii wɔn mu.

¹⁵Na Misraimhene ka kyerɛɛ Hebrifoɔ awogyefoɔ a wɔn mu baako din de Sifra, na ɔbaako din de Pua no sɛ:

¹⁶Sɛ mokɔgye Hebrifoɔ mmaa awoɔ, na awoeɛ hɔ mohunu sɛ ɔyɛ ɔbarima a, monku no; na sɛ ɔyɛ ɔbaa deɛ a, momma no ntena ase.

¹⁷Na awogyefoɔ no suro Onyankopɔn, enti wɔanyɛ sɛdeɛ Misraimhene ka kyerɛɛ wɔn no, na mmom wɔgyee mmabanin no nkwa.

¹⁸Na Misraimhene frɛɛ awogyefoɔ no bisaa wɔn sɛ: Adɛn nti na moyɛ saa, na momma mmarima no tena aseɛ?

¹⁹Na awogyefoɔ no buaa Farao sɛ: Hebrifoɔ mmaa nte sɛ Misraimfoɔ mmaa, ɛfiri sɛ wɔn deɛ, wɔyɛ pirimpirim; awogyefoɔ no nnya nnuruu wɔn nkyɛn no, na wɔawo dada.

²⁰Enti Onyankopɔn ne awogyefoɔ no dii no yie. Na nkurɔfoɔ no dɔɔso ara, na wɔyɛɛ den yie.

²¹Na ɛsiane sɛ awogyefoɔ no suro Onyankopɔn nti, ɔmaa wɔn afie mu yɛɛ yie.

²²Ɛnna Farao hyɛɛ ne man nyinaa sɛ: Ɔbabanin biara a wɔbɛwo no no, monkɔto no ntwene asubɔnten no mu, na mmammaa nyinaa deɛ, momma wɔntena ase.