Read New Revised Asante Twi Bible Eksodɔs 2 Bible Online

Eksodɔs 2 - New Revised Asante Twi Bible bible

Eksodɔs 2

¹ Na ɔbarima bi a ɔfiri Lewi fie kɔwaree Lewi babaa bi.

² Na ɔbaa no nyinsɛnee, na ɔwoo ɔbabanin; na ɔhunuu sɛ ne ho yɛ fɛ no, ɔde no siee abosome mmiɛnsa.

³Na ɔntumi nkora no bio no, ɔfaa mmɛwa adaka bi de ama ne ɛhyɛ sraa ho, na ɔde abɔfra no too mu, na ɔde kɔsii wira mu wɔ asuo no ano.

⁴ Na ne nuabaa kɔgyinaa akyirikyiri sɛ ɔrehwɛ deɛ ɛbɛyɛ no.

⁵Na Farao babaa siane baa asuo no ano adwareɛ, na ne mmaawa repasa asuo no nsunoa. Berɛ a Farao babaa hunuu adaka no wɔ wira no mu no, ɔsomaa n’abaawa sɛ ɔnkɔfa mmra.

⁶Na ɔbuee soɔ no, ɔhunuu akɔkoaa no, na hwɛ, na ɔyɛ abarimaa a ɔresu. Na ɔyɛɛ no mmɔbɔ, na ɔse: Hebrifoɔ mma no bi nie.

⁷Ɛnna ne nuabaa no ka kyerɛɛ Farao babaa no sɛ: Menkɔ menkɔfrɛ Hebrifoɔ mmaa no mu nufomafoɔ bi memmrɛ wo, na ɔmmɛma akɔkoaa no nufoɔ mma wo anaa?

⁸Na Farao babaa no ka kyerɛɛ no sɛ: Kɔ! Na ababaa no kɔ kɔfrɛɛ abɔfra no na bae.

⁹Na Farao babaa no ka kyerɛɛ no sɛ: Fa abɔfra yi kɔ kɔma no nufoɔ ma me, na mɛtua wo ka. Na ɔbaa no faa abɔfra no kɔmaa no nufoɔ.

¹⁰Na abɔfra no nyinii, na ɔde no kɔmaa Farao babaa no, na ɔdanee ne ba. Na ɔtoo no din Mose, ɛfiri sɛ ɔse: Nsuo mu na meyii no firiiɛ.

¹¹ Na Mose nyiniiɛ no, da bi ɔfirii adi kɔɔ ne nuanom nkyɛn sɛ ɔrekɔhwɛ wɔn adwumayɛ no; na ɔhunuu sɛ Misraimni bi reboro ne nuanom mu bi a ɔyɛ Hebrini.

¹² Na ɔhwɛɛ ha ne ha, na ɔhunuu sɛ obiara nni hɔ no, ɔbɔɔ Misraimni no kumm no, na ɔde no siee anwea mu.

¹³Na adeɛ kyeeɛ no, ɔfirii adi, na hwɛ, na Hebrifoɔ baanu reko. Na ɔbisaa deɛ ɔdi fɔ no sɛ: Adɛn nti na woboro wo yɔnko?

¹⁴ Na ɔbuaa sɛ: Hwan na ɔde wo sii yɛn so otitire ne osennifoɔ? Wopɛ sɛ woku me sɛdeɛ wokum Misraimni no anaa? Na Mose suroe, na ɔse: Ampa ara, asɛm no apue!

¹⁵ Na Farao tee asɛm yi no, anka ɔrehwehwɛ Mose aku no, nanso Mose dwane firii n’anim kɔtenaa Midian asase so wɔ subura bi ho.

¹⁶ Nso na Midian sɔfoɔ wɔ mmammaa baason; na wɔba bɛtoo nsuo de hyehyɛɛ adaaseɛ no amaama sɛ wɔrema wɔn agya nnwan anom.

¹⁷ Na nnwanhwɛfoɔ bi ba bɛpamm wɔn; na Mose sɔre boaa wɔn, na ɔmaa wɔn nnwan no nomee.

¹⁸Na wɔbaa wɔn agya Reuel nkyɛn no, ɔbisaa wɔn sɛ: Ɛyɛɛ dɛn na ɛnnɛ deɛ, moaba ntɛm seyie?

¹⁹Na wɔbuaa sɛ: Misraimni bi na ɔgyee yɛn firii nnwanhwɛfoɔ no nsam, na ɔtoo nsuo mpo maa yɛn, na ɔmaa nnwan no nomee.

²⁰Na ɔbisaa ne mmammaa no sɛ: Na ɔwɔ he? Adɛn nti na mogyaa ɔbarima no hɔ? Monkɔfrɛ no na ɔmmɛdidi.

²¹Na Mose penee sɛ ɔne Midian sɔfoɔ no bɛtena. Na ɔde ne babaa Sipora maa Mose awareɛ.

²² Na ɔwoo ɔbabanin, na Mose too no din Gersom,[1] ɛfiri sɛ ɔse: Mayɛ hɔhoɔ wɔ ananafoɔ asase so.

²³ Na nna dodoɔ yi akyiri no, ɛbaa sɛ Misraimhene wui. Na nkoasom no nti Israelfoɔ no sii apini, na wɔsu frɛe, na wɔn sufrɛ no kɔduruu Nyankopɔn anim.

²⁴ Na Onyankopɔn tee wɔn apinisie no, ɔkaee n’apam a ɔne Abraham ne Isak ne Yakob pameeɛ no.

²⁵Na Onyankopɔn hwɛɛ Israelfoɔ no, ɔhunuu wɔn tebea a wɔwɔ mu no.